JEREMIAH 2
2
Pathian Nih Israel Mi Kha A Lem Hna
1 Bawipa bia cu ka sinah a ra i, 2“Va kal law Jerusalem vialte nih an theih nakhnga va au tuah, Bawipa bia cu hi bangin a si:
Na ngaknut lio i na ka tlaihchannak le
Hammi na si lio i na ka dawtnak kha
ka hngalh camcin ko,
Thetse ram, zeihmanh cinthlak lonak
ram ah khan na rak ka zulh
lengmang ko.
3Cu lioah khan cun Israel cu
Bawipa caah a rak thiang,
A rawl ṭuanmi lak i theitlai hmasa bik
a rak si.
Amah a rak eitu vialte hna cu dantat
loin a luatmi an um lo i
Ṭhat lonak nih khan a tlunhnawh
zungzal hna, tiah Bawipa nih a ti,” tiah a ti.
4 Bawipa bia cu ngai tuah u, maw Jakob tefa hna le Israel chungkhar vialte hna.
5 Bawipa nih hi bangin a ti:
“Nan pupa hna nih zei palhnak dah
ka cungah an hmuh i
Ka sinin lamhlatpi ah an kal i
pakpalawng kha an zulh i
pakpalawng ah an can?
6Annih nih, ‘Izipt ram chungin
a kan chuahpitu Bawipa,
Ramlak ah a kan hruai i thetse ram le
khor tampi umnak ram,
Ram ro ram car le muihnak ram,
ahohmanh nih an pal lomi,
ahohmanh an um lonak ram
chungah a kan hruaitu kha,
Khuazei ah dah a um?’ an ti lo.
7Keimah nih thil tampi a chuahnak
ram ah,
A theitlai hna le a thil ṭha hna kha
ei awkah kan luhpi hna.
Sihmanhsehlaw nan rung luh tikah
ka ram kha nan thurhhnawmh i
Ka ro kha fihnung ah nan ser.
8Tlangbawi hna nih khan, ‘Bawipa cu
khuazei ah dah a um?’ an ti ti lo.
Phungbia a tlaimi hna nih khan
keimah kha an ka ruat lo;
Ka mi tuukhal hna nih khan
keimah cu an ka doh;
Profet hna nih khan Baal min in
bia an chim i
Bawmh khawhnak zeihmanh
a ngei lomi pathian kha
an zulh hna.
9Cucaah nannih cu taza kan cuai peng
ko hna lai i
Nan fale hna fale zong ka cuai peng
ko hna lai, tiah Bawipa nih a ti.
10Nitlaklei ah Saipras tikulh tiangin
va kal hmanh u law va zoh hmanh u,
Nichuahlei ah Kedar tiangin mi
hei thlah hna u law
ṭha tein va zoh hna seh,
Hi bantuk thil hi a um bal hnga maw?
11Miphun pakhatkhat nih a pathian hna
kha, pathian an si lo hmanh ah,
a thleng bal hna maw?
Sihmanhsehlaw ka mi hna nih cun
an Sunparnak kha zeihmanh a
ṭhahnem lomi thil ah an thlen.
12Maw van hna, hi kong ah hin
khuaruahhar in um tuah u,
Ka mi hna ruangah hin hnabei dong
cikcek in ther len tuah u, tiah
Bawipa nih a ti.
13Zeicahtiah ka mi hna nih hin ṭhat
lonak pahnih an tuah:
Ti nung a chuahnak cerh keimah cu
an ka hlawt i
Tikuang, a chungah ti a zawi kho
lomi, a zutmi tikuang kha an i ser.
14Israel cu sal maw a si? Amah cu
ṭuang chuak sal maw a si?
Zeicahdah a rawh kun?
15Zeicahdah chiandeih nih
an hukhnawh i an aihnawh?
Zeicahdah a ram cu pakpalawng
ah a can?
Zeicahdah a khuapi hna cu an rawk i
mi nih an chuahtak hna?
16Memfis mi hna le Tahpanhes mi hna
nih nan lu an in khuai hna lai.
17 Bawipa nan Pathian nih lam an hruai
hna tikah,
Nanmah nih amah kha
nan zamtak caah,
Mah hi vialte hi nanmah nih
nanmah lila
cungah nan i tlunter, a si lo mei?
18Cun Nail tiva ti, va din awkah Izipt
ram i na va kal lai cu,
Na caah zei miaknak dah a um lai?
Asiloah, Zufrates tiva ti va din awkah
Assiria ram i na va kal lai cu,
Zeidah na miakmi a um lai?
19Nangmah dan an tattu cu na ṭhat
lonak kha a si ko lai i
Sual an phawtu cu na tlaunak
kha a si ko lai.
Bawipa na Pathian hlawt le keimah
upat ti lo cu
Na caah zeitluk in dah a ṭhat lo i
zeitluk in dah a khaat fawn,
ti kha hngal tuah;
Mah hihi Ralkapbu Bawipa Pathian
bia hrimhrim a si.
20“Hlanpi ah na hngawngkual cu
na khiah cang i
na hri cu na chah cang hna i,
‘Na sal ka si ti lai lo,’ na ti.
Asinain, tlang sang kip cungah le
thing hring kip toiah hlawhhlangnu
bangin na it.
21Nangmah cu mitsur ruang ṭha bikcem
in kan phun,
Ci ṭha in lakmi na si.
A si kun ahcun, zeitindah na rawh i
ramlak mitsur ruang ah na can kun?
22Cangal in naa kholh nain le chatpiat
tampi na hmang nain,
Na sualnak cu ka hmaiah a lang
ṭhiamṭhiam ko, tiah
Bawipa Pathian nih a ti.
23Zeitindah, ‘Kaa thurhhnawmh lo,
Baal kha ka zul hna lo,’
na ti khawh?
Nelrawn i na kalnak na lam khi
zoh ngat;
Na thil tuahmi kha philh hlah ngat.
Hrem khawh lomi kalauk-la, a tlik
tik i a ping le a pang i a tlimi,
24Ramlak ah amah lawngin a le
i A phol tikah a hnar in pa rim
a kawlmi bantuk na si!
A duhnak ahcun aho nih dah
an kham khawh lai?
A kawltu hna nih khan an tha i batter
len duh hna hlah seh;
A phol thla ah cun fawi tein hmuh
khawh a si ko lai.
25Lung tamnak hmun kal kha i sum law
Na hrom cu a ti halter loin um
ko hen aw.
Sihmanhsehlaw naa thawh i,
‘Ka hnabei a dong cang,
Ram dang pathian kha ka duh
hna i anmah kha ka zulh
ko hna lai,’ na ti.
26Mifir cu tlaih a si tikah a ning
a zah bantukin
Israel innchungkhar cu an ning
a zak lai;
Anmah le an siangpahrang hna le
an bawi hna le an tlangbawi hna le
an profet hna zong an ning
a zak lai;
27Thingkung kha, ‘Nangmah cu ka pa
na si,’ an ti i
Lung kha, ‘Nangmah nih na ka hrin,’ an ti.
Annih nih an hnulei an ka chit i
an hmai kha an ka hoih lo.
Sihmanhsehlaw harnak an ton
ni ah cun, ‘Tho law,
kan khamh tuah,’ an ti.
28Nan ca i nan i sermi nan pathian
hna cu khuazei ah dah an si kun?
An in khamh khawh hna ahcun,
harnak nan ton ni ah cun tho
hna ngat seh;
Zeicahtiah, maw Judah, na khua le
na pathian an i zat.
29Zeicahdah ka cungah nan phunzai?
Nannih nih nan dihlak in nan ka doh,
tiah Bawipa nih a ti.
30Nan fale ka velh hna cu pakpalawng
men a si, an i remh hlei lo;
Chiandeih hrang bantukin nanmah
vainam nih nan profet kha a ei hna.
31Israel mi cungah hin tlun inn donh
hmang maw ka si?
Ram car le ti um lonak hmun bantuk
maw ka si?
A si kun ahcun zeicahdah
ka mi hna nih hin,
‘Kan i ṭhen cang, na sinah kan ra
ti lai lo,’ an ti?
32Ngaknu nih a hlawn kha a philh
khawh lai maw?
Mo nih a thuam kha a philh
khawh lai maw?
Sihmanhsehlaw ka mi hna nih cun
atu le atu an ka philh.
33Duhtu kawlnak caah na lam naa
thimmi cu na hei thiam dah!
Cucaah nu ṭhalo cem hmanh nih
na sinin fimnak aa cawn khawh lai.
34Na puan ki ah thisen aa neh — a sual
lomi misifak nunnak thi kha.
Hi thi cu inn na bauhnak in naa nehmi
a si lo,
Kuhthing toi kip i rai na thawinak in
naa nehmi a si deuh.
35Nangmah nih cun naa thawh i,
‘ka sual lo, a thinhunnak a dam
diam cang,’ na ti.
Zohhmanh, ‘Ka sual lo,’ na timi cu
kan zuam lai.
36Zeicahdah fawi tehlek in na kalnak
lam cu naa thlen?
Assiria nih an deuh bantuk khan
Izipt zong nih an deuh ve lai,
37Izipt ram in hmaichia in
nan kir ko lai,
Zeicahtiah nan i bochanmi cu Bawipa
nih a hlawt cang hna i
Anmah thawng in khuaawng
zeihmanh nan pem lai lo.
Currently Selected:
JEREMIAH 2: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006