JEREMIAH 13
13
Biar Chia Tahchunhnak In Cawnpiaknak
1 Bawipa nih a ka thawh i, “Va kal law puan biar vaa cawk law na tai ah i kaih, sihmanhsehlaw ti tawnghter hlah,” a ti. 2Cucaah Bawipa bia bang cun kaa cawk i ka tai ah kaa kaih. 3Cun Bawipa bia cu a voi hnihnak ka sinah a ra ṭhan i, 4“Tho law Zufrates tiva ah va kal tuah. Khika ah na tai i naa kaihmi na biar kha lungkak chungah va thup tuah,” a ti. 5Cucaah ka tho i Bawipa nih nawl a ka pek bangin Zufrates tiva pawngah ka va thuh. 6Cun caan saupi hnuah khin Bawipa nih a ka thawh i, “Tho law, Zufrates tiva ah khan va kal tuah, cun khika ah va thup tiah nawl ka rak in pekmi biar kha va la,” tiah a ti. 7Cun Zufrates tiva ah cun ka va kal i ka thuhnak hmun kha ka va zoh, sihmanhsehlaw ka vun lak tikah, biar cu a rawk dih cang, zeihmanh ah a ṭha ti lo. 8Cun Bawipa nih cun a ka chawnh ṭhan i a bia cu hi bangin a si: 9Hi bantuk hin Judah aa porhlawtnak a nganmi le Jerusalem aa porhlawtnak a nganmi kha ka hrawh lai.
10Hi miṭhalo hna nih hin ka bia ngaih kha an duh lo; pathian dang kha an zulh hna i an rian an ṭuan hna i an kunhnawh hna. Cucaah annih cu, zeihmanh ah a ṭha ti lomi biar bantuk hi an si lai. 11Biar cu tai ah hren chih a si bantukin Israel mi vialte hna le Judah mi vialte hna cu an ning piin keimah ah kaa hren chih hna. Zeicahdah mahtin ka tuah ti ahcun, annih kha ka mi an si i ka caah min ṭhatnak le sunparnak an chuahpi nakhnga, ti caah a si; sihmanhsehlaw ka bia cu ngaih an duh lo.
A Khatmi Thawl Tahchunhnak
12Annih cu hi bia hi na va chimh hna lai; “Hi bangin Bawipa, Israel Pathian nih a ti, ‘Ralca vialte cu mitsur hang in an khat lai,’ va ti. Cun annih nih an in thawh lai i, ‘Ralca vialte cu mitsur hang in an khat lai ti kha kan hngalh ko pei,’ an ti lai. 13Khi tikah na thawh hna lai i, ‘Hi bangin Bawipa nih a ti: Hi ram chung i a ummi vialte hna hi an rit hlan tiang, mitsur hang in ka khahter hna lai — bawiṭhutdan ah a ṭhumi siangpahrang David tefa hna, tlangbawi hna le profet hna le Jerusalem i a ummi vialte hna hi ka ritter hna lai. 14Cun ralca pakhat le pakhat an i khawn bantukin annih cu ka den cikcek hna lai, pale zong hual lo, fapa hna zong hual loin. An cungah zaangfahnak siseh, velngeihnak siseh, nemnak siseh, ka ngei lai lo; annih hrawh kha kaa sum hrimhrim lai lo,” tiah Bawipa nih a ti.
Judah Cu Aa Ngaihchih Lo Caah Sal Ah A Kal Lai
15Ngai u law nan hna chi tuah u,
nan lung puam hlah u,
Zeicahtiah bia a chimtu hi Bawipa a si.
16 Bawipa nan Pathian cu sunparnak
pe tuah u,
Khua a muih hlan le huaphap lawngin
a ceumi tlang pang i nan ke
a nal hlan le
Nannih nih nan kawlmi ceunak
cu mui padap i a ser hlanah hin.
17Cu bantukin a thukmi muihnak
chung i nan um hmanh i
nan ngaih duh lo ahcun,
Lungthin fah tuk ah a ṭah lawng
ka ṭap lai i ka mitthli lawng
a tla ko lai;
Zeicahtiah Bawipa tuurun cu sal ah
kalpi an si cang.
18Siangpahrang le a nu sinah cun,
“Nan i porhlawtnak nan bawiluchin
cu nan lu cungin an tlak cang caah
Ṭhutdan niam ah ṭhu tuah u,” va ti.
19Negeb ram khua cu kulh
an si dih cang,
Ahohmanh nih an chanh kho hna lo;
Judah ram mi vialte cu sal ah hruai
an si cang,
An ning piin kalpi an si cang.
20Jerusalem khuami hna, hei cuan
u law chaklei in a rami khi
hei zoh tuah hna u,
Nanmah an in pekmi hna tuurun
kha khuazei ah dah a si?
Naa porhlawt ngaimi tuurun kha?
21Ka hawikom an si tiah na ruahmi
hna kha na cung i uktu ah
chiah an si tikah
zeidah na chim lai?
Nau nganfah a ingmi nu bantukin
nganfahnak kha na in lai.
22“Zeicahdah mah thil hi ka cungah
a tlun hnga?” tiah na ti ahcun,
Na sualnak a tam ruangah na hni cu
phoih na si i
Na ke cu langhter an si.
23Ethiopia mi nih a cuar kha
aa thlen khawh maw?
Cakei nih tah a ṭial kha aa thlen
khawh maw?
I thleng kho hna seh law cu, nannih
ṭhat lonak dah ti lo zeidang tuah
a thiam lomi zong nih hin
ṭhatnak kha nan tuah ve hnga.
24Cucaah thetse ram thli nih a choihmi
favai bantukin nannih cu
kan ṭhek hna lai.
25Nannih nih keimah kha nan ka hlawt i
pathian deu kha nan i bochan
hna caah
Mah hihi nan covo, ral thawh
hmangmi hna covo,
Keimah nih kan tahpiakmi hna cu
a si, tiah Bawipa nih a ti.
26Cucaah keimah hrimhrim nih nan hni
kha kan phoih hna i
Nan ningzahnak kha ka langhter.
27Va cungin pa nan i duhnak,
hor au in nan aunak,
nan thurhnawmhnak hna hi
ka huat hna.
Tlang cungah le ram lakah thil ṭhalo
nan tuahmi kha ka hmuh hna.
Aize, Jerusalem, nang cu khua
thurhnawm na si ai!
Zei can dah, zei can dah na rauh
rih lai?
Currently Selected:
JEREMIAH 13: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
