JEREMIAH 10
10
Pathian Deu le Pathian Tak
1Maw Israel chungkhar hna, Bawipa nih nan sin i a chimmi bia hi ngai tuah u. 2Hi bangin Bawipa nih a ti:
Miphun dang hna lam kha
i cawn hlah u,
Van i hmelchunhnak nan hmuhmi
hna ruang zongah khin nan
khuaruah har hlah u,
Khi bantuk i khuaruah a harmi cu
miphun dang hna khi pei
an si ko cu.
3Miphun dang hna i an siasal hna cu
hlennak men a si,
Tupi chung i va haumi thing,
Zungthiampa nih cop in a hei saih i
4Sui le ngun in a ṭamh i a tluk nakhnga
lo sobul le thir in a khenh chihmi
pei an si ko cu.
5Cu bantuk siasal hna cu zil dum i
ritṭih thlaimi bantuk ceo an si ko,
an holh kho lo;
An kal khawh lo caah a phorh in
phorh an herh.
Annih cu ṭih hna hlah u, harnak
zeihmanh an tuah kho lo,
Ṭhatnak zong zeihmanh an tuah
kho fawn lo.
6Maw Bawipa, nangmah bantukin
ahohmanh an um lo,
Nangmah cu na lianngan ko,
Na min cu a lianngan i a ṭhawng.
7Maw miphun vialte hna
Siangpahrang,
Nangmah cu ahodah ṭih loin
a um hnga?
Zeicahtiah nangmah cu ṭih
awk tlak hrimhrim na si;
Miphun a fim bikbik hna lak le
an bawi bikbik hna lakah,
Khuazei tal ah nangmah bantuk hi
hmuh khawh an si hnga maw? #Biat 15.4
8Annih cu an dihlak in mihrut an si i
an nga fawn;
An fimnak pakpalawng cu thingtum
sinin an cawnmi a si.
9Denmi sui cu Tarshish in rak phorhmi
a si i
Sui cu Ufaz in rak phorhmi a si;
An dihlak in zungthiampa le
suisertupa sermi an si dih.
Maimaw le kadipa in an thuamh hna,
An zate in zungthiam sermi an si.
10Sihmanhsehlaw Bawipa cu
Pathian taktak a si,
Pathian nung le zungzal
Siangpahrang a si.
A thin a hun ciammam ah vawlei
aa hnin i
Miphun hna nih a thinhunnak
kha an ing kho lo.
11(Nannih nih annih cu hi bangin nan chimh hna lai: “Van le vawlei sertu a si lo pathian hna cu hrawh an si lai. Vawlei cungah khuazei hmanh ah an um ti lai lo,” ti in.)
12Pathian nih vawlei hi a ṭhawnnak
in a ser
Vawlei hi a fimnak in a umnak hmun
ah hin a umter
Van khi a thiamnak in a samh hna.
13A aw thawng ah van i ti khi an awn,
Van hram deng in minmei kha
a thawhter,
Ruah caah awng kha a ser hna i
A thil khonnak inn chungin thli kha
a chuahter hna.
14Mi vialte hi mihrut, hngalhnak
zeihmanh a ngei lomi an si dih;
Sui sertu vialte hna hi an siasal sermi
hna nih hin zumhawktlak lo ah
an canter dih hna;
Zeicahtiah milem an sermi hna cu
hlennak men an si i
An chungah thaw zeihmanh a um lo.
15Zeihmanh an ngei lo, nihchuak
men an si,
An biaceih ni a phak tik i a rawk
menmi an si.
16Jakob sertu Pathian cu mah hna
bantuk hi a si lo,
Amah cu zeizong vialte sertu a si i
Israel hi amah ca hrimhrim i
aa kawhmi miphun a si;
Amah a min cu Ralkapbu Bawipa a si.
Judah Rawknak
17Nan thil kha hmunkhat ah pum hna
u law ram chung hin
i chuahpi hna u,
Nannih hrenkanhmi hna.
18Zeicahtiah Bawipa nih hitin a ti:
Atu tan hi cu, hi ram chung mi hi
an dihlak in ka phawi hna lai,
Fak piin ka hmeh hna lai i ro lak in
ka sur hna lai.
19A, ka hma cu an va fak
hringhran dah,
Ka inmi tuknak cu an zualhma ko.
Sihmanhsehlaw hihi cu ka sining pei
a si cu, ka in awk pei a herh cu,
ka ti.
20Ka inn cu a rawk cang, ka thlam hri
vialte cu an cat dih cang;
Ka fale nih an ka kaltak i
an lo diam cang;
Ka thlam a bunh ṭhantu ding
ahohmanh an um lo,
A puanzar hna a phun ṭhantu
ding ahohmanh an um lo.
21Ka mi hna a khaltu hna cu mihrut
minga men an si i
Bawipa kha ruahnak an hal bal lo,
Cucaah khuaawng an tong lo i
an tuurun hna cu an i ṭhek dih.
22Ngaihmanh, bia chawkvai pakhat
a rung thang,
A thawng a ngan chin lengmangmi
thawngpang cu chaklei ram in
a rung;
Judah ram khua hna cu ṭhio awk le
cenghngia riahhmun i ser awkah
a rami ralkapbu thawng a si.
23Maw Bawipa, minung nih a zulhmi
a lam hi amah nih aa thimmi
an si lo i
A nun chung i a kalnak lam zong hi
amah nih aa ser khawhmi an si lo ti
kha ka hngalh.
24Maw Bawipa, kan remh tuah,
Sihmanhsehlaw dinnak in si seh,
Na thinhun in cun si hlah seh,
Zeicahtiah zeihmanhlo ah na kan
canter sual hnga.
25Nangmah an hngal duh lomi
miphun hna cungah le
Na min an au lomi miphun hna
cungah,
na thinhunnak cu bung tuah;
Zeicahtiah Jakob cu an ei cang i
an lim cang,
A inn cu an hrawh cikcek cang.
Currently Selected:
JEREMIAH 10: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
