ISAIAH 54
54
Bawipa Nih Israel A Dawt
1Jerusalem, nangmah cu fa a ngei
lomi nu bantuk na si.
Sihmanhsehlaw atu cu hla na sa kho
cang i lunglawm in na au kho cang.
A va nih a kaltak bal lomi nu nakin
fa tam deuh na ngei cang lai. #Gal 4.27
2Na umnak thlam kha ngan deuh in sa.
A hri kha sauh hna law a tung kha
fehter hna.
3A kam kip in na ramri cu na kauh lai;
miphun dang nih atu ah an umnak
ram hi na mi nih an co ṭhan hna lai;
atu i a kingmi khua hi a linsa
ṭhan lai.
4Na thinphang hlah — ningzahnak
na ing ti lai lo;
serhsatnak na hmu ti lai lo.
Na ngaknut lio i zumh awk tlak lo
na rak si kha na philh lai i
nuhmei na si lio i na umhar vialte
kha na philh lai.
5Nangmah an sertu cu na va bantuk
a si lai — a min cu
Ralkapbu Bawipa a si!
Israel Pathian thiang nih cun
an khamh lai — amah cu
vawlei cung dihlak uktu a si.
6Israel, nang cu ngaknu note,
a va nih a hlawt i a lungre a thei
ngaingaimi bantuk na si.
Sihmanhsehlaw Bawipa nih cun
an auh ṭhan i,
7“Caan tawite chung cu kan kaltak,
sihmanhsehlaw dawtnak thukpi he
kan lak ṭhan.
8Ka thinhun in tawite chung cu
khattelei kan mertak,
sihmanhsehlaw a zungzal in
kan dawt lai,” a ti.
Cuticun nangmah an khamhtu Bawipa nih a ti.
9“Noah chan ah biakamnak
ka rak tuah i,
vawlei cungah buanchukcho
ka tlunter ti lai lo, ka rak ti.
Atu na sinah biakamnak ka ser ve i
na cungah ka thin a hung ti lai lo i
kan mawhchiat ti lai lo,
dan zong kan tat ti lai lo, ka ti. #Gen 9.8-17
10Fing le tlang hmanh khi an cim hnga i
an rawk ko hnga,
sihmanhsehlaw kei nih kan dawtnak
cu zeitikhmanh ah a dong lai lo.
Daihnak kan pek lai, tiah bia
kaa kammi cu,
a zungzal in ka zulh lai,”
tiah nangmah an dawtu Bawipa nih a ti.
Jerusalem Thar
11 Bawipa nih aa thawh i,
“Maw Jerusalem, nang cu harnak
na ing i bawmtu na ngei lo,
ahohmanh hnemtu na ngei lo.
Asinain na hram cu lungvar man
sung in ka ser ṭhan hna lai. #Biat 21.18-21
12Na innsang cu rubi lungvar in
ka sak hna lai i
na kutka cu mei bantukin a ceumi
lungvar in ka sak hna lai;
na kulhnak vampang cu sui lungvar
in ka sak hna lai!
13“Keimah hrimhrim nih na mi cu
ka cawnpiak hna lai i
ṭhanchonak le daihnak
ka pek hna lai. #Jhn 6.45
14Dinnak le ṭhatnak nih
an in ṭhawnter lai.
Hremnak le ṭihphannak in
na him cang lai.
15Ahohmanh nih an in tuk ahcun,
keimah hnatlaknak tel loin a si;
ahohmanh nih an in doh ahcun,
an sung lai.
16“Soser kha ka ser hna, annih nih
so kha an ser i hriamnam kha
an chuah.
Cun ralkap zong kha ka ser hna i
annih nih hriamnam kha
mi thahnak ah an hman.
17Sihmanhsehlaw sermi hriamnam
zeihmanh nih khan nangmah cu
an pem kho lai lo;
sual an puhtu vialte hna kha
na leh khawh dih hna lai.
Ka salle cu ka ven hna lai i
teinak ka pek hna lai,” a ti.
Hi bia cu Bawipa nih a chim.
Currently Selected:
ISAIAH 54: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
