ISAIAH 52
52
Pathian Nih Jerusalem A Khamh Lai
1Jerusalem, ṭhawng law ngan
ṭhan tuah!
Pathian khua thiang, sunparnak in
i thuam tuah!
Cuarpar tan lomi cu na kutka chungin
ahohmanh an lut ti lai lo. #Biat 21.2,27
2Jerusalem, luat lakin i thing tuah!
Leidip lak khan tho law
na bawiṭhutdan cungah khan
ṭhu tuah.
Sal i a tangmi Zion mi a ṭemtu hna
hri cu chat tuah.
3 Bawipa nih a mi cu a thawh hna i,
“Man loin sal ah zuar nan si.
Cu bantuk ve in man loin tlanh
nan si lai.
4Hmasa ah Izipt ram ah ramdang mi in
nan rak um,
cun hnu deuh ah sullam zeihmanh
um loin Assiria nih an hrem hna.
5Atu ah Babilon ah cu bantuk
ṭhiamṭhiam cun nan um;
zeihmanh lo ruangah khika ah
sal ah nan tang.
Nanmah an uktu hna cu an i porhlaw i
tluang an khawng,
ka min cu an zawmhtaih
thluangthluan ko. #Rom 2.24
6Sihmanhsehlaw hmailei caan ah cun,
keimah cu Pathian ka si i nanmah
sin i biachimtu ka si kha
nan hngalh lai,” a ti.
7Daihnak thawng ṭha i phorh in tlang
cungin a rami lamkaltu ke cu
zeitluk in dah aa dawh!
Teinak kong kha amah nih cun
a run thanh i
Zion cu a thawh i, “Na Pathian cu
siangpahrang a si,” a ti. #Nah 1.15; Rom 10.15; Efe 6.15
8Khua a vengtu kha an au i lunglawm
in hmunkhat ah hla an sa.
Zion i Bawipa a kir ṭhan kha an mit
hrimhrim in an hmuh.
9Jerusalem khua chung i a rawkmi
hmun hna,
lunglawm le thanuam in au tuah u.
Bawipa nih a mi cu a hnemh cang hna,
a khuapi cu a khamh cang.
10 Bawipa nih a thiangmi a ṭhawnnak cu
a hman cang;
a mi kha a khamh cang hna i cucu
vawlei mi vialte nih an hmuh cang.
11Thil thiang a phortu hna, Babilon
khan khulrang in chuak u.
Tawngh lo ding timi thil kha
tawng hna hlah u,
thiang tein um u law khua kha
chuahtak u. #2Kor 6.17
12Atu tan hi cu namhnaw in nan chuah
a hau lai lo,
a zam in nan zam a herh lai lo,
Bawipa nan Pathian nih an hruai hna
lai i nan hnu, nan hmai, nan sirlei
in an ven hna lai.
Ingtu Sal
13 Bawipa nih aa thawh i,
“Ka sal cu a rianṭuanmi ah khan
khuaawng a tong lai;
a lian a ngan lai i upatnak
a hmu lai.
14An rak hmuh ah khan mi tampi cu
an khuaruah a har;
a muihmai cu a rak rawk tuk
hringhran i minung hmanh a lo lo.
15Sihmanhsehlaw atu cu miphun
tampi kha amah an hmuh tikah
an khuaruah a har lai,
an khuaruah a har tuk ah
siangpahrang hna cu ar ko in
an um lai.
An hngalh bal lomi thil kha
an hmuh lai i
an hngalh lai,” a ti. #Rom 15.21
Currently Selected:
ISAIAH 52: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
