HOSEA 4
4
Israel Mi Sualnak
1Maw Israel, Bawipa bia cu thei tuah;
Zeicahtiah hi rammi hna cungah hin
Bawipa nih bia pakhat a ngei:
Hi ram chungah hin pakhat le pakhat
i zumhnak le pakhat le pakhat i
bochannak le Pathian hngalhnak
a um lo,
2Chiatser in biakamnak kha an tuah,
sihmanhsehlaw an zul lo,
an i that, an i ramh;
va cung pa duhnak le
zaang-ennak le i thahnak le
i nawnnak lawng kha a si ko.
3Cucaah ram cu ngaihchia in a um lai i
a chung i a ummi vialte cu
an lotlau dih lai i
Anmah sinah cun ramlak saram hna
le van i a zuangmi va hna zong
an lotlau ve lai;
Nga hmanh kha rili chungin an lo lai.
4 Bawipa nih aa thawh i, “Zapi kha
ahohmanh nih sual phaw hna in
a chimh zong chimhring
hna hlah seh,
Zeicahtiah sual phawt ka duhmi
hna cu nanmah tlangbawi hi nan si.
5Chun zan in nan palh lengmang ko i
profet hna zong nih khan nanmah
nakin zeihmanh a ṭha deuh in
an tuah hlei lo.
Nan nu Israel cu ka hrawh lai.
6Ka mi hna nih keimah cu
an ka hngalh duh lo caah
an rawk.
Nannih tlangbawi hna nih keimah
hngalh kha nan duh ve lo i
ka cawnpiaknak kha nan hlawt,
Cucaah nanmah le nan fapale
hna cu ka tlangbawi sinak khan
kan hlawt hna.
7Tlangbawi nan tam chin lengmang
paoh ah ka cung i nan sualnak kha
a tam chin lengmang ve.
Upatnak nan hmuhmi cu ningzahnak
ah ka canter lai.
8Ka mi hna an sualnak kha rumnak ah
nan hman i sual chin lengmang hna
seh ti nan duh.
9Zapi nih dantatnak ah hmuh dingmi
kha tlangbawi hna cungah
a tlung ve lai.
Annih cu dan ka tat hna lai i
ṭhat lonak an tuahmi ruangah khan
ka lehrulh hna lai.
10Annih nih an co awk a simi
raithawinak sa kha an ei tikah
an rawl a ṭam ṭhiamṭhiam ko lai.
Tefa ṭha ngeihnak pathian kha
an biak, sihmanhsehlaw
keimah kha kaltak riangmang in
pathian dang kha an zulh hna caah
fa an ngei hlei lai lo,”
tiah a ti.
11Zu nih ka mi hna cu a molhter
cang hna!
12Thingtan kha phuannak an hal hna i
Funghreu nih khan hngalh
an duhmi kha an chimh hna!
Annih nih kei cu an ka hlawt cang;
Nu hlawhhlangnu i aa cangmi
bantukin annih cu pathian dang
sinah khan an i pe cang.
13Tlang cung i khuahrumbo ah khan
rai an thawi i
Thingkung a sang i a hnah a ṭha i
a thladem a kaumi toiah khan
zihmui an khangh.
Cu ruangah cun nan fanule hna cu
hlawhhlangnu ah an cang i
Nan fapale nupi hna cu vacung in
pa an i duh.
14Sihmanhsehlaw hi ruangah hin
annih cu dan ka tat hna lai lo,
Zeicahtiah nanmah zong biakinn i
hlawhhlangnu a ummi hna he
nan kal ve ko i anmah he cun
Baal sinah khan raithawinak
nan pekchanh ve ko,
Cuticun phungthluk bia i
“Hngalhnak a baumi cu an rawk,”
tiah a um bantuk khan an rawk.
15Nannih Israel mi cu keimah sinah
zumhawktlak loin um hmanh u law
Judah mi tu cu, cu bantukin si ve
sawh hna hlah seh.
Gilgal ah siseh, Bethel ah siseh,
va kal in Pathian va bia hlah u;
A nungmi Pathian min chalh in khika
ah biakamnak va tuah hlah u.
16Israel mi cu cawla bantukin
a lung a ṭhawngmi an si.
Cucaah zeitindah tuufa bantukin
ramhnonak ah cun
rawl ka pek khawh hna lai?
17Israel mi cu siasal nih a molhter cang,
amah um in um ko seh;
18An zudin kha a dih in nu le pa
sualnak kha heh tiah an tuah;
upatnak nakkhan duh paoh tlon
kha an duh deuh.
19Thlichia choihtu in choih an si lai i
an raithawinak ruangah khan
an ning a zak lai.
Currently Selected:
HOSEA 4: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
