HABAKKUK 3
3
Zaangfahnak Ca Thlacamnak
1Profet Habakkuk thlacamnak,
Shigionoth aw in:
2Maw Bawipa, na thil tuahmi kha
ka rak theih hna;
Maw Bawipa, na rianṭuanmi kha
ka rak hmuh.
Hi kum vialte hna chungah hin
nangmah cu naa langhter i
Na thinhunnak chung zongah
zaangfahnak kha na philh lo.
3Pathian cu Teman in a ra,
Mi Thiang cu Paran Tlang in a ra;
A ceunak kha van a khat i
a sunparnak cu vawlei kha
a khat.
4A ceunak cu ni ceunak bantuk a si,
Amah sin cun ceunak kha an chuak;
Cu hna hnulei ah cun a ṭhawnnak kha
aa thup.
5A hmaiah rai kha a kal i a kalnak
paoh ah zawtnak nih a zulh.
6A dir tikah vawlei kha aa hnin, a zoh
hna tikah miphun kha an ther;
Zungzal in a hmunmi tlang hna cu
an i cheu i zungzal in a hmunmi
fing hna cu an cim;
7Kushan thlam hna cu an ther i
Midian ram cu a lau.
8Maw Bawipa, tiva hna cungah na thin
a hung maw?
Na thin hunhnawhmi cu tiva cu
an si maw?
Nangmah nih na teinak rangleng
a hnuktu rangtum hna cu
na chiah hna tikah,
Na thinhunnak cu Rili cungah
a si maw?
9Na likuk cu phelh awkah na timh i
Na thalbawm chungah cun cantiang
a khat in na sanh hna;
Vawlei cu tiva in na cheu dih.
10Tlang nih an in hmuh tikah an i
ngerh cukmak,
Tilian hna cu an luang hluahmah;
a thukmi rili hna cu an awn.
11A khul a rangmi na cantiang
an hmuh tikah,
A cer zukmakmi na fei an hmuh tikah
ni nih mer a philh i thlapa nih
a dirnak hmun ah a dir peng.
12Hronak he vawlei ah cun naa chawk i
Na thinhun in miphun cu
na lamh hna.
13Na mi hna khamh awkah khan
na kal i
Na chiti thuhmi khamh awkah
khan na ra;
Miṭhalopa inn cu a cunglei in
na vun ṭheh i a hram lung a langh
ritret tiang na hlai.
14Na hriamnam in a lu cu na hliam i
amah a zultu hna cu a sin khan
thlichia nih a choih hna.
Sifakmi hna cu an i thuhnak hmun ah
khan ei awkah annih nih
an kaa an i aan.
15Rili cu na rangtum hna he nan tan
tikah a ṭhawngmi ti cu a so in a so.
16Hi thil vialte hi ka theih tikah
a therh in a ka therh,
Cu thawng ka theih ah ka hmur cu
a ther,
Ka ruh cu ti bantuk ah an i cang i
ka kal ah ka ke cu an ther;
Kannih a kan dohtu hna cung i
a tlung ding harnak ni ka ruah ah
a ther in ka ther ko.
17Theipi kung cu par loin,
Mitsur ruang zongah a thei um
hmanh hlah seh,
Oliv thing cu tlai loin
Lo zongah tirawl zeihmanh chuak
loin um hmanh seh,
Kawm chung saṭil run kha um loin
Saṭil inn ah saṭil kha um hmanh hna
hlah seh law,
18 Bawipa ah cun kaa lawm ṭhiamṭhiam
ko lai i
A ka khamhtu Pathian cu ka lawmh
ṭhiamṭhiam ko lai.
19 Bawipa Pathian cu ka ṭhawnnak hram
a si,
Ka ke cu sazuk ke bantukin
a khul a ranter hna i
tlang sang cungah khan
a ka hruai. #2Sam 22.34; Slm 18.33
Currently Selected:
HABAKKUK 3: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
