GENESIS 11
11
Babel Innsang
1Hlanah cun vawleicung mi vialte hna nih hin holh phun khat lawng an rak ngei i bia an rak hmanmi cu an i khat dih. 2Nichuahlei i an hei i thawn tikah Shinar ram ah khan nelrawn pakhat an va phan i cuka ah cun umhmun an khuar. 3Cun pakhat le pakhat cu, “Ra u! Tlakrawh ser u si law mei in raw hna u sih,” an i ti. Cuticun inn saknak ah tlakrawh cu an hman hna i a senghnak ah bitumen#11.3 bitumen cu lam i an phahmi si nak kattaza khi a si. an hman hna. 4Cun annih nih an i thawh i, “Atu cu khuapi pakhat kan ser lai i a chungah innsang pakhat, a par van tawng in kan sak lai. Kan thang kan i chuah lai i vawlei cungah hin kan i ṭhek lai lo,” an ti.
5Cun hi mi hna nih khuapi an sermi le innsang an sakmi zoh awkah khan Bawipa cu a rung ṭum i 6“Atu cu hi mi vialte hna hi miphun phun khat an si, holh pakhat lawng an hmang i atu i an tuahmi hi hmailei ah an tuah laimi thil a hramthawknak lawng a si. A rauh hlanah an duhmi thil paoh kha an tuah khawh ko lai. 7Cucaah cun pakhat le pakhat an holh an i hngalh khawh nakhnga lo, vung kal u si law an holh kha vung danter dih hna u sih,” a ti. 8Cuticun Bawipa nih vawlei cung khuazakip ah a ṭhek dih hna i khuapi ser cu an ngol. 9Cu khuapi cu a min ah Babel an ti, zeicahtiah cuka ah cun Bawipa nih mi vialte kha an holh a danter hna i cuka cun vawlei cung khuazakip ah khan a ṭhek hna.
Shem Tefa Hna
(1Cha 1.24-27)
10Hihi Shem tefa cu an si. Buanchukcho hnu kum hnih ah Shem cu kum za khat a tling i fapa pakhat a hrin i a min ah Arpakshad a si. 11Cu hnuah cun kum za nga a nung i fa dang zong kha a ngeih hna.
12Arpakshad cu kum sawm thum le kum nga a si ah fapa pakhat Shelah a ngei; 13cu hnuah cun kum za li le kum thum a nung i fa dang zong a ngeih hna.
14Shelah cu kum sawm thum a si ah fapa pakhat Eber a ngei; 15cu hnuah cun kum za li le kum thum a nung i fa dang zong a ngeih hna.
16Eber cu kum sawm thum le kum li a si ah fapa pakhat Peleg a ngei; 17cu hnuah cun kum za li sawm thum a nung i fa dang zong a ngeih hna.
18Peleg cu kum sawm thum a si ah fapa pakhat Reu a ngei; 19cu hnuah cun kum za hnih le kum kua a nung i fa dang a ngeih hna.
20Reu nih kum sawm thum le kum hnih a si ah fapa pakhat Serug a ngei; 21cu hnuah cun kum za hnih le kum sarih a nung i fa dang zong a ngeih hna.
22Serug nih kum sawm thum a si ah fapa pakhat Nahor a ngei; 23cu hnuah cun kum za hnih a nung i fa dang zong a ngeih hna.
24Nahor nih kum kul le kum kua a si ah fapa pakhat Terah a ngei; 25cu hnuah kum za khat le kum hleikua a nung i fa dang zong a ngeih hna.
26Terah nih kum sawm sarih a si tikah Abram le Nahor le Haran kha a hrin hna.
27Terah tefa cu hi hna hi an si: Terah cu Abram le Nahor le Haran pa a si. Haran cu Lot pa a si i 28Haran cu amah a chuahkehnak Khaldi ram Ur khua ah khan a pa a nun lioah a thi. 29Abram nih cun Sarai a ṭhit i Nahor nih Haran fanu Milkah kha a ṭhit, Haran cu Iskah pa kha a si. 30Sarai cu a cing i fa a ngei kho lo.
31Terah nih a fapa Abram le a tu Lot, Haran fapa kha le, Abram nupi Sarai kha, Kanaan ram lei i kal awkah Khaldi ram Ur khua khan a thawhpi hna. Sihmanhsehlaw Haran khua tiang an kal i cuka ah cun umhmun an khuar. 32Cuka ah cun Terah cu a thi i a thih ah cun kum za hnih le kum nga a si.
Currently Selected:
GENESIS 11: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006