EZRA 10
10
Ramdangmi An Nupi Hna le An Fale Hna Kha An Dawi Hna
1Ezra cu thla a cam i sual phuannak a tuah i a ṭah i Pathian inn hmaiah cun a rilh ko lioah khan, mibu nganpi, nu he ngakchia he Israel mi chungin amah sinah khan an i pum i mi cu lunghno ngaiin an ṭap. 2Cun Elam fapa hna chung i Jehiel i a fapa Shekaniah nih khan Ezra cu a chawnh i: “Kannih nih kan Pathian cungah zumhawktlak loin kan um i hi ram mi hna chung hin ramdang nu kha nupi ah kan i ṭhit hna, sihmanhsehlaw atu hmanh ah hin hitihin thil a si ko nain ruahchannak a um ko rih. 3Cucaah ka bawipa ruahnak cheuhning in le kan Pathian nawlbia ah a thermi hna ruahnak cheuhnak bangin, hi kan nupi vialte hna le an fale hna hi hlawt awkah kan Pathian sinah biakamnak ser u sih; cun phungbia ningin tuah si seh. 4Mah cucu na rian a si caah tho law, tuah ko, ṭih hlah, na sinah kan ṭang,” tiah a ti. 5Cucaah Ezra cu a tho i tlangbawi hna lak i hruitu deuhdeuh hna kha le Levi mi hna le Israel mi vialte kha an chim cang bantuk khan tuah awkah chiat a serter hna. Cucaah chiat cu an ser.
6Cun Ezra cu Pathian inn hmai khan a tho i Eliashib fapa Jehohanan khaan chungah khan a va kal i khika ah cu zan cu rawl zong ei lo ti zong ding loin a riak; zeicahtiah salchuak pawl zumhtlak loin an um ruangah khan a ngaih a chia. 7Cun Judah ram dihlak le Jerusalem ah khan, Jerusalem ah nan i pum lai tiin, salchuakmi vialte sinah cun thawng thanhnak an tuah i 8ni thum chung i a chuak lomi paoh cu bawi hna le upa hna nawl in a thil vialte chuh a si lai i amah cu salchuak pawl bu chung luh kha donh a si lai, tiah ti a si.
9Khi tikah Judah le Benjamin mi vialte cu ni thum chungah Jerusalem ah an i pum; thla kuanak thla, a ni kul ni ah a si. Cun mi vialte cu Pathian inn hmai i tual ah cun an i pum i hi thil kong ah hin le ruah tampi a sur caah an ther ko. 10Cun tlangbawi Ezra cu a dir i a thawh hna i, “Nannih nih nan palh cang i ramdang nu kha nan ṭhit hna i cuticun Israel mawhnak kha nan karhter cang. 11Atu cu nan pupa hna Pathian, Bawipa sinah khan sual phuannak tuah u law, amah duhnak kha tuah tuah u; hi ramchung mi hna le ramdang nu hna sin khan i ṭhen ko u,” tiah a ti. 12Cun aa pummi vialte nih aw thang piin, “A si taktak ko; na chim bangin kan tuah lai. 13Sihmanhsehlaw mi hi an tam i ruah fak piin a sur caan a si fawn; lengah hitihin kan dir kho lo. Cun hi rian hi ni khat ni hnih rian zong a si fawn lo; zeicahtiah hi kongah hin fak piin kan buar cang. 14Kan bawi hna cu aa pummi bu dihlak caah hin dir hna seh; cun kan khua cio i ramdangmi nupi a ngeimi paoh cu, hi kong i kan Pathian thinhunnak ṭihnung cu kan cungin a ṭian hlantiang, an khua cio i upa hna le biaceihtu hna he a caan tinhmi ah cun ra hna seh,” an ti. 15Asahel fapa Jonathan le Tikvah fapa Jahzeiah lawnglawng nih mah hihi an al i Meshullam le Levi mi Shabbethai nih annih cu an bawmh hna.
16Cu bang cun salchuak pawl nih cun an tuah. Tlangbawi Ezra nih khan mi cu a thim hna, annih cu pale innchungkhar ning cio ah lu a simi an si i an min cio ah thiah an si. Thla hranak thla, a ni khat ni ah cu kong cu ruah awkah an i pum; 17cun thla khatnak thla a ni khat ni ah, ramdang nu a ṭhimi vialte hna donghnak cu a phan.
18Tlangbawi fapa hna lakah ramdang nu a ṭhimi hna cu Maaseiah, Eliezer, Jarib, le Gedaliah an si, annih cu Jozadak fa Jeshua le a unau hna i fapa chung mi an si. 19An nupile cu hlawt awk kha bia an i kam i an phungbuar thawinak cu tuurun chungin tuukawng pakhat, an mawhnak caah cun a si. 20Immer tefa hna chungin; Hanani le Zebadiah. 21Harim tefa hna chungin: Maaseiah, Elijah, Shemaiah, Jehiel, le Uzziah. 22Pashhur tefa hna chungin: Elioenai, Maaseiah, Ishmael, Nethanel, Jozabad le Elasah.
23Levi mi hna chungin: Jozabad, Shimei, Kelaiah, (cucu Kelita a si), Pethahiah, Judah le Eliezer. 24Hlasatu hna chungin: Eliashib. Kutka cawngtu hna chungin: Shallum, Telem le Uri.
25Israel mi chungin: Parosh tefa hna chungin: Ramiah, Izziah, Malkhijah, Mijamin, Eleazar, Hashabiah le Benaiah. 26Elam tefa hna chungin: Mattaniah, Zekhariah, Jehiel, Abdi, Jeremoth, le Elijah. 27Zattu tefa hna chungin: Elioenai, Eliashib, Mattaniah, Jeremoth, Zabad le Aziza. 28Bebai tefa hna chungin: Jehohanan, Hananiah, Zabbai le Athlai an si. 29Bani tefa hna chungin Meshullam, Malluk, Adaiah, Jashub, Sheal le Jeremoth an si. 30Pahathmoab tefa hna chungin: Adna, Khelal, Benaiah, Maaseiah, Mattaniah, Bezalel, Binnui, le Manasseh. 31Harim tefa hna chungin: Eliezer, Isshijah, Malkhijah, Shemaiah, Shimeon, 32Benjamin, Malluk, le Shemariah. 33Hashum tefa hna chungin: Mattenai, Mattattah, Zabad, Elifelet, Jeremai, Manasseh le Shimei. 34Bani tefa hna chungin: Maadai, Amram, Uel. 35Benaiah, Bedeiah, Kheluhi, 36Vaniah, Meremoth, Eliashib, 37Mattaniah, Mattenai, Jaasu. 38Binnui tefa hna chungin: Shimei, 39Shelemiah, Nathan, Adaiah, 40Makhnadebai, Shashai, Sharai, 41Azarel, Shelemiah, Shemariah, 42Shallum, Amariah le Josef. 43Nebo tefa hna chungin: Jeiel, Mattithiah, Zabad, Zebina, Jaddai, Joel le Benaiah. 44Hi vialte nih hin ramdang nu hna kha an ṭhit hna i an nupi le cu an fale hna he khan an kalter hna.
Currently Selected:
EZRA 10: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006