EZEKIEL 48
48
Ram Phawtnak
1Israel phun min cu hihi an si: Chaklei kam bik ah, Hethlon lei kalnak, Lebo-hamath le Hazar-enan lei; Hamath lei i va kal ahcun a chaklei kamah khan Damaskas a um, cuka ah cun nichuahlei in nitlaklei ah i kham in Dan covo cu a um lai.
2Dan a hun changtu ah nichuahlei in
nitlaklei ah i kham in
Asher covo a si lai.
3Asher a hun changtu ah nichuahlei in
nitlaklei ah i kham in
Naftali covo a si lai.
4Naftali a hun changtu ah nichuahlei
in nitlaklei ah i kham in Manasseh
covo a si lai.
5Manasseh a hun changtu ah
nichuahlei in
nitlaklei ah i kham in
Efraim covo a si lai.
6Efraim a hun changtu ah
nichuahlei in
nitlaklei ah i kham in
Reuben covo a si lai.
7Reuben a hun changtu ah nichuahlei
in nitlaklei ah i kham in
Judah covo a si lai.
8Judah a hun changtu ah nichuahlei in nitlaklei ah i kham in a ummi cu a dang tein na chiah dingmi nan zuahmi hmun kha a si lai. A kauhlei cu dong sang hnih le thong nga a si lai i a saulei cu nichuahlei in nitlaklei ah aa khammi covo hna tluk kha a si lai i cu a laifang ah cun hmunthiang kha a um lai.
9 Bawipa caah a dang tein nan zuah lai dingmi hmun cu a tung dong sang hnih le thong nga a si lai i a vang cu dong sang hnih a si lai. 10Cu hmun cu hi bantukin ṭhen a si lai: tlangbawi hna caah khan chaklei kamah dong sang hnih le thong nga, nitlaklei kamah dong sang khat, nichuahlei kamah dong sang khat le thlanglei kamah dong sang hnih le thong nga chiahpiak an si lai i Bawipa hmun thiang cu cu a laifang ah cun a um lai. 11Cu hmun cu Israel mi hna lam an rak tlau i Levi mi hna nih an rak zulh hna bangin a zul lomi Zadok fapa hna, ka rian ṭha tein a ṭuanmi thiantermi tlangbawi hna caah khan a si lai. 12Zuahmi ram chungin tlangbawi hna caah a dang tein chiahmi hmun cu hmun thiang bik a si lai i Levi mi hna ramri kha a phan lai.
13Tlangbawi hna ramri thluahmah ah cun Levi mi covo kha a si lai. A saulei cu dong sang hnih le thong nga a si lai i a kauhlei cu dong sang khat a si lai; a dihlak ah a saulei cu dong sang hnih le thong nga a si lai i a kauhlei cu dong sang khat a si lai. 14Cu ram cu a cheuchumte zong an zuar lai lo i an thleng fawn lai lo; hi hmun ṭha cu an hlawt awk a si lai lo, zeicahtiah Bawipa ca i a thiangmi hmun a si.
15A tangmi hmun, a kauhlei dong sang hnih le thong nga, a saulei dong sang hnih le thong nga a simi cu khuapi vawlei a si lai i umnak ca le zapi vawlei ah a si lai i khua cu cu a laifang ah cun a um lai. 16A tungvang cu hihi an si lai: chaklei kamah dong thong li le za nga, thlanglei kamah dong thong li le za nga, nichuahlei ah dong thong li le za nga, nitlaklei kamah dong thong li le za nga a si lai. 17Cu khua chung ram zapi ta a simi cu chaklei ah dong za hnih le sawm nga, nichuahlei ah za hnih le sawm nga, nitlaklei ah za hnih le sawm nga a si lai. 18Zuahmi hmun kam zuahmah ah a ummi, nichuahlei ah dong sang khat, nitlaklei ah dong sang khat a simi cu khuapi chung rianṭuantu hna pawcawmnak caah a si lai. 19Khuapi chung i rian a ṭuanmi nih cun an thlawh lai; Israel phun ahopaoh chung khan an si ko lai.
20Zuahmi ram, dong sang hnih le thong nga, tungvangpalh a simi cu, a ningpi khan a dang tein hmunthiang ah, khuapi ta a simi tiang khan nan chiah lai. 21Zuahmi hmun thiang sinah a kam kip i a hleimi le khuapi ca i zuahmi pinah a hleimi cu uktu bawi kha pek a si lai. Nichuahlei ah zuahmi hmun pinah a ummi dong sang hnih le thong nga, nichuahlei kam tiang, nitlaklei ah dong sang hnih le thong nga, Israel miphun hna nih an comi ram kap thluahmah i a ummi kha uktu bawi cu pek a si lai; zuahmi hmunthiang le hmunthiang kha a laifang ah an um lai. 22Levi mi hna ta le khuapi ta cu uktu bawi pekmi a laifang ah khan an um lai; Judah ramri le Benjamin ramri karlak ah khan an um lai.
23A tang rihmi Israel miphun hna kongah cun: nichuahlei in nitlaklei ah i kham in Benjamin covo kha pakhat a si lai.
24Benjamin chang ah nichuahlei in
nitlaklei ah i kham in
Simeon covo a si lai.
25Simeon chang ah nichuahlei in
nitlaklei ah i kham in
Issakhar covo a si lai.
26Issakhar chang ah nichuahlei in
nitlaklei ah i kham in
Zebulun covo a si lai.
27Zebulun chang ah nichuahlei in
nitlaklei ah i kham in
Gad covo a si lai.
28Gad thlanglei ramri cu thlanglei ramri, Tamar in a lan i Kadesh pawng Meribah ti tiang a phan i Tiva in Rili Ngan tiang a phanmi kha a si lai. 29Hi ram hi Israel miphun hna sinah ro caah nan phawt hna awk hnga cu a si lai i hihi an covo cu an si lai, tiah Bawipa Pathian hrimhrim nih a ti.
30-31Khuapi chungin chuahnak lam hna cu hihi an si lai i Israel miphun hna min kha bunh an si lai. Chaklei kam cu dong thong li le za nga a sau lai i kutka pathum a ngei lai, Reuben kutka, Judah kutka le Levi kutka an si lai; #Biat 21.12-13 32nichuahlei kam cu dong thong li le za nga a sau lai i kutka pathum a ngei ve lai, Josef kutka, Benjamin kutka le Dan kutka an si lai. 33Thlanglei kam cu dong thong li le za nga a sau lai i kutka pathum ṭhiamṭhiam a ngei ve lai. Simeon kutka, Issakhar kutka le Zebulun kutka an si lai. 34Nitlaklei kam zong cu dong thong li le za nga a sau ve lai i kutka kha pathum a ngei ve lai, Gad kutka, Asher kutka le Naftali kutka an si lai. 35Khuapi velchum cu dong sang khat le thong riat a si lai i cu caan thawk in khuapi cu a min ah Bawipa Umnak Hmun ti a si lai.
Currently Selected:
EZEKIEL 48: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
