EZEKIEL 45
45
Rambung Thiang
1Ram cu an co awk cio ah an phun an phun in camcawhfung khiah in nan phawt hna tikah, Bawipa caah ram bung pakhat nan zuah lai; a tung cu dong sang hnih le thong nga a si lai i a vang cu dong sang hnih a si lai; cu ram cu a pumpi in a thiangmi ram a si lai. 2Hi chungah hin hmun pakhat, tungvangpalh a simi, a tung dong za nga, a vang dong za nga a simi cu hmun thiang caah nan zuah lai i a velchum ah cun ram lawng dong sawm nga nan zuah lai. 3Hi hmun chungah hin hmun pakhat nan tah lai i cu hmun cu a saulei dong sang hnih le thong nga, a kauhlei dong sang khat a si lai i cu chungah cun hmun thiang, a thiang bikmi hmun cu a um lai. 4Hi hmun cu hmun thiang chung i rian a ṭuanmi tlangbawi hna le Bawipa rian ṭuannak i cuka hmun naih bik i a rami hna caah a si. Cu chungah cun an inn ca hmun le hmun thiang ca i a thiangmi hmun kha an i tel lai. 5Dong sang hnih le thong nga a sau i dongsang khat a kaumi hmun kha Levi mi, biakinn rianṭuantu hna, ta ah khan a si lai; hi hmun chungah hin an umnak khua hna zong cu an um lai. 6Khua cu hmun pakhat a vang dong thong nga a si i a tung dong sang hnih le thong nga a simi kha, hmun thiang ca i zuahmi kam thluahmah ah cun nan pek hna lai i cucu Israel mi vialte caah an si lai. 7Hmun thiang ca i zuahmi ram le khua ca a simi hmun kam veve ah cun bawi nih cun ram a ngeih lai i cu a ram cu hmun thiang ca i zuahmi hmun le khua ca i chiahmi hmun lei hoih kha a si lai i nitlaklei ah cun nitlaklei ah khan a kal lai i nichuahlei ah cun nichuahlei ah khan a kal lai. Phun khatkhat nih an comi ram kam zuahmah khan a kal lai i nitlaklei i a donghnak tiang kha a hei phan lai i cun nichuahlei ah aa mer lai i a donghnak tiang a phan fawn lai. 8Cucu Israel ram chungah a vo a si lai; Israel mi bawi hna nih ka mi hna cu an hrem bal ti hna lai lo, sihmanhsehlaw ram cu Israel mi kha an phun an phun cio ah an pek hna lai.
9Mah hihi Bawipa Pathian bia an si: I za cang u, Israel bawi hna! Zaang-ennak le i ramhnak kha donghter cang u; phung le biading tu kha tuah hna u; ka mi kha ṭhawl ti hna hlah u, tiah Bawipa Pathian nih a ti. 10Nan cuailung cu a hmaanmi siseh, nan rel le nan chiti tahnak zong a dikmi si hna seh. #Lev 19.36 11Rawl tahnak ephah le chiti tahnak bath cu an i khat lai, bath pakhat cu homer cheu hra cheu khat a si lai i ephah pakhat zong cu homer cheu hra cheu khat a si ve lai; cun homer cu tahnak tlangrel a si lai. 12Shekel pakhat cu gerah kul a si lai; cun nan mina cu shekel pahra a ritmi a um lai, kul le nga a ritmi a um lai i hleinga a ritmi a um lai.
13Cun hi thawhlawm hna hi a dang tein nan chiah awk an si lai: changvut a si ah barli a si ah, homer pakhat ah ephah cheu ruk cheu khat lengmang. 14Chiti cu kor khat ah bath cheu hra cheu khat lengmang (kor khat cu bath hra a si); 15cun Israel phun chung mi paohpaoh nih tuu za hnih run chungin pakhat lengmang a dang tein a chiah lai. Rawl thawinak ca le khangh thawinak ca le daihnak thawinak caah hi thil hna cu 16hi rammi vialte hna nih an ca i remnak tuahnak ding caah Israel mi hna bawi sinah khan an rak put lai, tiah Bawipa Pathian nih a ti; 17cun an bawi cu khangh thawinak caah khan le rawl thawinak caah khan le thlet thawinak caah khan, thla thar ah siseh, sabbath ah siseh, Israel mi nih an ulhmi puai caan paohpaoh ah siseh, amah cu a ruatkhangtu a si lai. Israel mi ca i remnak sernak caah a herhmi sual thawinak le rawl thawinak le khangh thawinak kha amah hrimhrim nih a thawh hna lai.
18Mah hihi Bawipa Pathian bia an si: Thla khatnak thla, a ni khatnak ni ah cawtum no pakhat dotlami kha nan lak lai i hmunthiang kha nan thianhnak lai. 19Tlangbawi nih khan sual thawinak thi tlawmpal kha a lak lai i biakinn innka tung ah le biakṭheng tlang a kil pali ah khan le chunglei tual kutka tung hna ah khan a nalh hna lai. 20Thla sarih thla ah cu bantuk ṭhiamṭhiam cun nan tuah lai i cuticun biakinn caah remnak nan ser lai.
21Thla khatnak thla ni hleili ni ah Lanhtak Puai nan tuah lai; changreu cu thilnu phulh loin nan ei lai. 45.21: #Exo 12.1-20; Nam 28.16-25 22Cu ni ah cun nan bawi nih cun amah ca le mizapi ca i sual thawinak caah khan cawtum pakhat a thawh lai. 23Puai chung ni sarih chungah cun nifate in Bawipa sin i khangh thawinak caah dotlami cawtum pasarih le tuukawng pasarih a pekchanh lengmang lai, ni fate in mehehtum pakhat lengmang sual thawinak caah a pekchanh fawn lai. 24Cawtum pakhat le tuukawng pakhat sinah cun rawl thawinak rawl ephah pakhat le ephah pakhat ca i chiti hin khat lengmang cu a pekchanh chih lengmang hna lai. 25Thla sarih thla a ni hleinga ni i khual puai ni ah khan cu bantuk ṭhiamṭhiam cun a tuah lai; hi zong cu ni sarih chung a si ve lai i sual thawinak kha le khangh thawinak kha le rawl le chiti kha amah nih a thawh hna lai. #Lev 23.33-36; Nam 29.12-38
Currently Selected:
EZEKIEL 45: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
