EZEKIEL 39
39
Gog Ralkap An Sung
1Cun nang, mipa, Gog cu chim law, hihi Bawipa Pathian bia an si, tiah ti. Rosh le Meshek le Tubal siangpahrang Gog, nangmah cu kan doh. 2Na hnuhmai kan mer lai i kan dawi lai, chakleipi khan kan lak lai i Israel tlang ah kan kalpi lai. 3Na kehlei kut i likuk cu ka tuk lai i na orhlei kut i cantiang cu ka den dih hna lai. 4Khika ah, Israel tlang cungah cun, nangmah le na ralkap vialte le nangmah sin i a ṭangmi vialte hna kha, nan thi dih lai; sa ei hmang va le ramlak sahrang hna rawl ah kan ser hna lai. 5Vawlei sawhsawh ah cun nan ril ko lai, zeicahtiah hi bia a chimtu cu keimah ka si. 6Mah hihi Bawipa Pathian bia hrimhrim a si: Magog ram le ahohmanh nih hnahnawh lo tein rilikam ram le tikulh ah khua a sami hna cungah khan mei ka tlunter lai i mi kip nih Bawipa ka si kha an hngalh lai. 7Ka min thiang cu ka mi Israel mi hna lakah khan hngalh ka siter lai i ka thurter ti lai lo; miphun dang hna nih khan Bawipa cu Israel mi hna lakah ka thian kha an hngalh lai, a ti.
8Zohhmanh, hihi a tlung lai, hi vialte hi a tling lai, ka chimmi ni kha a phan lai, tiah Bawipa Pathian nih a ti. 9Israel ram khuami hna nih khan an chuak lai i hi hriamnam hna cu mei tih awk thing ah an hman hna lai: phawpi he phawte he; li le thal, thingtan le fei — kum sarih chung hi thil hna hi mei tih awkah an hman hna lai. 10Lo in siseh, tu chungin siseh, mei tih awk thing cu an la hna lai lo i an phor hna lai lo, hi hriamnam hna tu hi thing tih awk caah cun an hman hna lai. Cuticun anmah a rak ramhtu hna kha an ramh ve hna lai i hranchaw ah a rak sertu hna kha hranchaw ah an ser ve hna lai. Hihi Bawipa Pathian bia hrimhrim a si.
11Khi ni ah Israel ram ah si loin Rili nichuahlei Abarim nelrawn ah Gog cu vuinak hmun kha ka pek lai. Khika ah Gog le a ralkap vialte kha an vui hna lai i Abarim nelrawn vialte cu ahohmanh lut loin kham a si lai; cu hmun cu Gog Ralkap hna Nelrawn tiah an ti lai. 12Annih vuinak ah Israel mi cu thla sarih chung an rau lai i ram cu an thianh lai; 13cu vuinak ah cun mi vialte nih khan an ṭuan awk hnga kha an ṭuan cio lai. Upatnak ka hmuh ni cu an caah philh lo awk ni a si lai, hihi Bawipa Pathian bia hrimhrim a si. 14Ram cu thianh awkah ram chung i vaa chawh tawn awk rian le vawleicung i a tang rihmi hna kawl awk rian ah mi cu thim an si lai; annih nih thla sarih a dongh tikah khan kawl hram cu an i thawk lai. 15Ram chungah cun an i chawk lai i pakhatkhat nih minung ruh kha an hmuh tikah, a pawngah cun hmelchunhnak kha an chiah lai i Gog Ralkap hna Nelrawn timi ah khan an vui lengmang hna lai. 16Cucaah kha ralkapbu nganpi kong kha zeihmanh theih a um ti lai lo i ram cu thianh a si cang lai.
17A ka thawh ṭhan i, “Mipa, hihi Bawipa Pathian bia an si: A zuangmi va vialte le ramlak sahrang vialte cu au tuah hna: ‘Ra u, i pum u, ka raithawinak puai ah hin a kenkip in ra chuak tuah u, Israel tlang cung i raithawinak nganpi kan serpiakmi hna ah hin; sa kha ei u law thi kha ding u;#Biat 19.17-18 18ralkap hna sa kha ei u law vawlei cung bawi hna thi kha ding tuah u; hi mi vialte hi Bashan tuukawng hna le tuu hna le mehehtum hna le cawtum hna le naatum hna cu an si. 19Nannih kan timhpiak cuahmahmi hna raithawinak i thi hi ri lakin ding u law thau hi vuai lak in ei u. 20Ka cabuai ah cun rangtum le an cung i aa citmi ralkap hna le raltu miphun vialte hna sa kha vuai tein ei tuah u,’ ti hna,” tiah a ka ti. Mah hihi Bawipa Pathian bia hrimhrim a si.
21Miphun hna lakah ka sunparnak kha ka langhter lai; biaceihnak ka tuahmi le an cungah a ritmi kut ka chiahmi kha mi vialte nih an hmuh lai. 22Khi ni thawk in hmailei ah cun Israel mi nih keimah cu Bawipa an Pathian ka si kha an hngalh lai. 23Miphun dang hna nih khan Israel mi sal i an tan kha an ṭhat lo ruang le ka sinah zumhawktlak loin an um ruangah a si ti kha an hngalh lai. Cucaah ka hmai kha ka rak thuhkanh hna i an ral hna kut chungah ka rak chanh hna, cun annih cu an dihlak tein vainam in an thi. 24An i phutawk tein an cungah rian ka ṭuan, a thurhnawmmi le ralthawh hmangmi an si bang khan ka hmai kha ka thuhkanh hna.
25Cucaah hihi Bawipa Pathian bia cu an si: Atu cu Jakob vanṭhatnak kha ka kirter ṭhan lai i ka tlaihchan hna nak kha Israel mi vialte cungah ka langhter lai i ka min thiang kha ka ṭanh lai. 26Anmah an vawlei te ah ahohmanh nih hnahnawh lo le ṭihphannak pek lo tein an um tikah cun, ningzahnak an inmi kha le ka cung i zumhawktlak loin an ummi kha an philh dih lai. 27Miphun dang hna chungin inn ah ka kirpi hna i an ral hna ram chungin ka pumh hna tikah, annih cu miphun tampi nih hmuh awkin ka thiannak hmuhsaknak ah ka ser hna lai. 28Miphun dang hna lak i sal i tan awk i a kaltertu hna keimah nih pakhat hmanh hnulei ah kaltak loin anmah an vawlei ah khan ka pumh ṭhan hna lai caah keimah cu Bawipa an Pathian ka si kha an ka hngalh lai. 29Israel mi hna cungah ka thlarau kha ka thlet lai caah annih cu ka hmai kha ka thuhkanh ti hna lai lo, tiah Bawipa Pathian nih a ti.
Currently Selected:
EZEKIEL 39: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
