EZEKIEL 14
14
Pathian Biakhiahnak An Hman
1Israel upa cheukhat hna kha an ra ka leng i ka hmai i an ṭhut lioah khan Bawipa nih a ka thawh i, 2-3“Mipa, hi mi hna nih hin an siasal hna cu an lung in an i khihchih hna i an tluknak a sertu thil sual kha an i zohchih peng. Cu bantuk mi hna cu ka sinah bia ka chimter hna hnga maw? 4Annih cu chawn hna law hihi Bawipa Pathian bia a si tiah chim hna: Israel mi ahohmanh, a lung chungin a siasal aa khihchih peng i a tluktertu thil sual aa zohchih pengtu paoh nih profet sinah a rat ahcun, a siasal kha tam ko hna hmanh seh law keimah Bawipa nih ka pum in ka leh hrimhrim lai. 5Israel mi hna cu an dihlak in an siasal hna nih ka sinin ṭhen ko hna in mising siter ko hna hmanh seh law, ka lehnak hna bia nih an lungthin kha a tlaih hna lai. 6Cucaah hihi Bawipa Pathian bia a si tiah Israel mi cu chim hna: Nan siasal kha mertak hna u, thil fihnung nan tuahmi vialte kha nan hnulei chit hna u. 7Israel mi nih si hna seh, miphundang mi nih si hna seh, ahohmanh nih keimah kha an ka hlawt i an lung in siasal kha an i khihchih i anmah rilhnak a tluntertu thil ṭhalo kha an i zohchih peng i cu bantuk mi hna nih cun keimah kha chawnh awkah profet sinah an rat ahcun, keimah Bawipa nih annih cu ka pum in ka leh hna lai. 8Cu hna cu ka hmai ka chiathnawh hna lai i anmah cu i zohchunh awk le serhsatnak bia ah ka ser hna lai; anmah cu ka mi hna chungin ka chuah hna lai. Cuticun Bawipa ka si kha nan hngalh lai.
9Profet pakhatkhat cu biachim khan leem khawh a si ahcun, a lemtu cu Bawipa ka si, ka kut ka chuah lai i amah cu Israel mi chungin ka chuah lai. 10Profet he, bia a haltu he, an pahnih te cun an sual, cucaah dantat an si veve lai. 11Keimah sin i an ṭannak khan Israel mi cu zeitikhmanh ah an tlau ti lai lo i an cungah thurhhnawmhnak an i tlunter ti lai lo; annih cu ka mi an si cang lai i kei cu an Pathian ka si lai. Mah hihi Bawipa Pathian bia hrimhrim a si,” tiah a ti.
12-13Mah hihi Bawipa nih ka sin i a chimmi bia kha a si: A ka thawh i, “Mipa, ram pakhatkhat nih ka cung i zumh awk tlak loin a umnak thawngin a sual tikah ka kut kha ka samh lai i nifate a rawl kha ka ṭhumh lai. A cungah mangṭam ka tlunter lai i minung he saṭil he ka thah hna lai. 14Noah, Daniel le Job, kha mi pathum hna hmanh kha nung rih hna seh law, anmah nunnak dah ti lo cu an dinnak nih khan ahohmanh a khamh kho hlei hna lai lo. Mah hihi Bawipa Pathian bia hrimhrim a si. 15Ram pakhatkhat cu a chung i a ummi minung hna kha hrawh awkah sahrang kha ka thlahhnawh hna, cu sahrang hna nih cun an hrawh cikcek i cu sahrang hna ṭih ah cun ahohmanh nih an pal ti lo tikah, 16cuka ah cun kha mi pathum hna kha rak um hna hmanh seh law, an fapale le an fanule hna hmanh kha an khamh kho hna lai lo; anmah lawng kha an i khamh kho lai i an ram cu a rawk dih ko lai, tiah ka nun bangin ka chim, tiah Bawipa Pathian nih a ti. 17Asiloah, cu ram ah cun vainam kha tlunter ning law cu vainam cu ram chung dihlak ah khan kal in minung le saṭil kha that hna tiah nawl pe ning law, 18khaka ah khan kha pathum hna kha rak um hna hmanh seh law, annih nih khan an fapa si hna seh, an fanu si hna seh, an khamh kho hna lai lo, anmah lawng kha an i khamh lai i cucu a si ko hnga, tiah ka nun bangin ka chim, tiah Bawipa Pathian nih a ti. 19Asiloah, minung le saṭil kha hrawh awkah, cu ram chungah cun rai tlunter ning law, ka thinhunnak cu thisen in bung ning law, 20cun Noah le Daniel le Job kha cuka ah cun rak um hna hmanh seh law, an fanule si hna seh, an fapale si hna seh, ahohmanh kha an khamh kho hna lai lo, an dinnak thawngin anmah lawng kha an i khamh kho lai tiah ka nun bangin ka chim, tiah Bawipa Pathian nih a ti.
21“Mah hihi Bawipa Pathian bia cu a si: Cucaah cun ka dantatnak pali, vainam le mangṭam, sahrang le rai hna hi, minung le saṭil hna hrawh awkah Jerusalem khua cung i ka tlunter tikah, a caah zeitluk in dah ruahchannak a tlawm chinchin lai! #Biat 6.8 22Tlawmpal cu a chungah nganh an si lai, a tangmi tlawmpal cu fapa si hna seh fanu si hna seh, chuahpi an si lai. Nangmah sin i an ra chuah ah khan rak zoh hna hmanh, zeitindah an umtuning a si i zeidah an tuahmi a si kha rak zoh hmanh. Jerusalem cung i harnak ka tluntermi vialte le a cung i sifahnak ka tluntermi vialte kongah hin mah nih hin tlawmpal cu na lung an daihter lai. 23Zeitindah an umtuning a si ti le zeidah an tuahmi a si ti kha na hmuh tikah na lung kha kan daihter lai, zeicahtiah sullam loin a cungah ka tuah lo ti kha na hngalh lai. Mah hihi Bawipa Pathian bia hrimhrim a si,” tiah a ti.
Currently Selected:
EZEKIEL 14: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
