EXODUS 39
39
Tlangbawi Ca Thuam
(Exo 28.1-14)
1Tuuhmul a dum, a sendung le a senmi khan tlangbawi nih biakinn chung rian ṭuannak ca i a hman ding puan kha an ser hna. Bawipa nih Moses a chimhning khan Aaron ca puan thiang cu an ser hna.
2Angki thiang cu sui le tuuhmul a dum, a sendung le a sen a simi le khumla hrual hmang ṭhia khan a ser. 3Sui tlap kha pan tein an den i an riam hnuah tuuhmul a dum, sendung le a senmi le khumla hrual hmang ṭhia in tahmi puan ah khan an tah chih hna i thawi in dawh tein an ṭamh. 4Angki cu hnam a kap veve ah an sih i liang ah bah khawh a si. 5Dawh tein tahmi taisawm cu angki he cun peh chih a si i cu taisawm cu angki ser bantuk khan ser a si ve, Bawipa nih Moses a fial bantuk te khan ser a si ve, Bawipa nih Moses a fial bantuk khan sui le tuuhmul a dum, sendung le a senmi le khumlahrual hmang ṭhia khan ser a si.
6Karnelian lungvar kha an remh hna i sui tlangkawm chungah khan an benh hna, min khenhnak bantukin an ṭial hna i an cungah cun Israel fapa hna an min kha an ṭial. 7Tlangbawi angki liang bahnak hnam ah cun an benh hna. Cu lungvar cu Israel fapa hna caah khan lung pemtertu lungvar an si i Bawipa nih Moses a chimh bantukte khan tuah a si.
8Ṭangbenh cu, angki bantuk khan, dawh tein a ser. Sui le tuuhmul a dum, sendung le a senmi le khumla hrual hmang ṭhia in an ser. 9Tungvangpalh bil khawh dingin an ser; bil tikah a tung lehhmah pakua a si i a vang lehhmah pakua a si. 10A cungah khan lungvar tlar li in an benh hna: a tlar hmasa bik ah cun rubi le topaz le karnet an si; 11a tlar hnihnak ah cun emeral, safaiar le daimon an si; 12a tlar thumnak ah jasin le agate le amethist an si, 13a tlar linak ah beril le oniks le jasper an si. Sui tlangkawm chungah ṭhutter an si. 14Lungvar cu hleihnih an si i an cungah Israel fapa hna min kha an i ṭial. Min khenhnak bantukin ser an si. Israel phun hleihnih hna chung min pakhat cio kha an cungah cun aa ṭial cio. 15Hri bantukin hrualmi sui thiang in sermi cikcin kha ṭangbenh caah cun an ser. 16Sui tlangkawm pahnih le sui kual pahnih kha an ser hna i cu sui kual pahnih hna cu ṭangbenh a cunglei tlang kil pahnih ah khan an thlaih hna. 17Sui hri pahnih cu sui kual ah khan an ṭem hna i 18sui hri khattelei an donghnak cu sui tlangkawm ah khan an hren veve hna i cuticun tlangbawi angki liang bahnak hnam pahnih hna hmailei ah khan an ṭem chih hna. 19Sui kual pahnih an ser hna i ṭangbenh a tanglei tlang ki, angki a hun changtu a chunglei kamah khan an thlaih hna. 20Sui kual pahnih an ser ṭhan i angki liang bahnak hnam pahnih hna an hmailei tanglei ah khan an thlaih hna; cucu a tlang pawngte ah khan a si i angki ca taisawm ṭha tein tahmi cungte ah khan a si. 21Ṭangbenh sui kual cu angki sui kual ah khan la dum in an ṭem chih hna i cuticun ṭangbenh cu taisawm cungah khan a um i a poih lo; cu ti an tuahmi cu Bawipa nih Moses a chimh bantuk te khan a si.
22Angki a khuhtu puan cu tuuhmul a dummi lawnglawng in an tahmi a si. 23Puan laifang i a ummi awng cu saphaw angki chung i a ummi awng bantuk kha a si. A awng cu tlek zau hlah seh tiah a tlang an kawm. 24Puan a tanglei tlang ah cun tuuhmul a dum le sendung le a sen le khumla hrual hmangṭhia in taleti kha an ser hna. 25Sui thiang khi-ing kha an ser hna i puan a tanglei tlang a velchum ah cun taleti le taleti karlak ah khan an chiah diahmah hna. 26Bawipa nih Moses a fial bantuk te khan, tlangbawi rian caah hmanmi puan cu a tanglei tlang duahmah ah khan khi-ing tete le taleti kha an thlaih diahmah hna.
27Aaron le a fapa hna caah khan angki cu khumla hmangṭhia in an ser hna, 28lupawng cu khumla hmangṭhia in, lukhuh cu khumla hmangṭhia in, tawhrolh tawi cu khumla hrual hmangṭhia in, 29taisawm cu khumla hrual hmangṭhia le tuuhmul a dum, sendung le a senmi in an ser hna i dawh tein an ṭamh hna; Bawipa nih Moses a chimh bantuk te khan an ser hna. 30Cun Pathian sin pekmi ti hngalhnak hmelchunhnak cu sui thiang in an ser i min khenhnak cung ṭial bang khin “Bawipa sin pekmi,” tiah an ṭial. 31Bawipa nih Moses a chimh bantuk te khan hri dum in lupawng par ah khan an ṭem chih.
Rian An Lim
(Exo 35.10-19)
32Cuticun pumhnak thlam rian vialte cu lim an si. Bawipa nih Moses a chimh bantukte khan Israel mi nih cun an tuah. 33Cun Moses sinah khan Pathian umnak puan biakinn, a cungkhuh thlam, a thilri vialte, a sio, a vampang, a thingthluan, a tung, an kedanh, 34tuukawng phaw si sen in buhmi in sermi a khuh, saphaw ṭha phun in sermi a khuh, phentu puanzar, 35biakamnak hngalhter ṭhantu lungtlap chiahnak kuang, a zawnhnak lang le a chin, 36cabuai le a thuamthil vialte, Pathian hmai hunmi changreu, 37sui thiang in sermi meiinn tung, a meiinn hna, a tlar in chiahmi meiinn hna, an thilthuam vialte, meiinn ca chiti, 38sui biakṭheng, thuhnak chiti, rimhmui zihmui, thlam luhnak kutka ca puanzar, 39dar biakṭheng le a dar fingrilh, a tung le a thilthuam vialte, kut ṭawlnak hmaihum le a hunnak, 40tual ca puanzar, tung, an kedanh, tual luhnak kutka ca puanzar, a hri le a thlam khenhnak fung, Pathian umnak thlam pumhnak thlam chung i rian ṭuannak ca i a herhmi thil vialte, 41biakinn chung tlangbawi rian ṭuannak ca thuam thiang, Aaron le a fapa hna nih tlangbawi rian an ṭuan caan i an i hruk awk thuam thiang, hi vialte hi an si. 42Bawipa nih Moses a chimh bantuk te khan Israel mi nih cun rian vialte kha an tuah dih. 43An tuahmi vialte kha Moses nih ṭha tein a zoh i Bawipa nih a chimhning tein an tuah ti kha a hmuh. Cucaah Moses nih thluachuah a pek hna.
Currently Selected:
EXODUS 39: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
