EXODUS 27
27
Biakṭheng
(Exo 38.1-7)
1“Biakṭheng cu anri thing in na ser lai. Tungvangpalh a si lai, a tung pe sarih le a cheu, a vang pe sarih le a cheu a si lai i a san cu pe li le a cheu a si lai. 2A kil pali ah khan a fong na ser hna lai. Biakṭheng he khan an i peh dih lai i an ningpi cun dar in na tuam hna lai. 3Biakṭheng caah cun hihi na ser hna lai: sathau nih a tlakhnawhmi vutcam ruhnak le laknak ah um le cawhlek le kheng le thirzum le meiṭil ruhnak kheng an si lai. Biakṭheng ca thilthuam vialte cu dar in na ser hna lai. 4Biakṭheng caah cun dar kharvar pakhat in na ser lai. Cu kharvar putnak ah cun a kil cio ah khan dar kual pali na thlaih hna lai i 5cu na thlaihmi cu biakṭheng tlang tangah khan an si lai i biakṭheng a laifang ah khan an um lai. 6Biakṭheng caah cun zawnhnak fung anri thing in na ser hna lai i dar in na tuam hna lai. 7Biakṭheng kha zawnh a si tikah dar kual chungah khan nan hrolh hna lai. 8Biakṭheng cu a chung a kua in na ser lai, thing in na ser lai. Tlang cungah hmuhsak na simi pungsan ning khan na ser lai.
Puan Biakinn Tual
(Exo 38.9-20)
9“Puan biakinn caah tual na ser lai. Thlanglei kam ca puanzar kha khumla hrual hmang ṭhia in sermi a si lai i pe za le sawm nga a sau lai, kam khat ca a si lai. 10Cu puanzar cu dar tung pakul ah bah a si lai i cu dar tung pakul cu dar kedanh pakhat cio an ngei lai. Cun tung ah cun bahnak pakhat cio an um lai i ngun in sermi fung pakhat cio an ngei lai. 11Cu bantuk ṭhiamṭhiam in chaklei kam zongah puanzar pe za le sawm nga a saumi a um lai i cu puanzar cu dar tung pakul cungah bah a si lai i dar tung pakul cu dar kedanh pakul chungah bunh an si lai. Tung ah cun bahnak an um cio lai i ngun in sermi fung zong an um lai. 12Nitlaklei tual kulhnak a vang caah khan puanzar pe sawm sarih le pe nga a saumi a um lai i tung pahra le kedanh pahra zong an um lai. 13Nichuahlei ah cun a tual cu pe sawm sarih le panga a kau lai. 14Luhnak kutka kam khat ca puanzar cu pe kul le pe khat le a cheu a si lai i tung pathum le kedanh pathum a ngei lai; 15khattelei kam ca zongah cun puanzar cu pe kul le pe khat le a cheu a si ṭhiamṭhiam lai i tung pathum le kedanh pathum a ngei ve ṭhiamṭhiam lai. 16Luhnak kutka ca puanzar cu pe sawm thum a si lai i tuuhmul a dummi le a senmi le a sendungmi le khumla hmangṭhia a hrual in tahmi a si lai i thawi in ṭamhmi a si lai. Tung danh pali chungah a dirmi tung pali cungah zar a si lai. 17Tual velchum i a ummi tung vialte hna cu sui fung in pehtlaihter dih an si lai i an i pehtlaihnak sio cu ngun in sermi an si lai. An dirnak kedanh cu dar in sermi an si lai. 18A tual cu pe za le sawm nga a sau lai i pe sawm sarih le pe nga a kau lai i pe sarih le a cheu a sang lai. Puanzar cu khumla hrual hmangṭhia in tahmi an si lai i tung dirnak kedanh cu dar in sermi an si lai. 19Puan biakinn chungah hmanmi thilri vialte cu, zei ca i hmanmi an si zongah, dar in sermi an si lai; cun puan biakinn hrennak ca fung vialte le tual ca fung vialte zong cu dar in sermi an si dih lai.
Meiinn Zohkhenhnak
(Lev 24.1-4)
20“Meiinn caah oliv chiti a ṭha bik phun kha nan rak put lai, tiah Israel mi cu nawl na pek hna lai i meiinn cu nan van thluangthluan lai. 21Aaron le a fapa hna nih khan hi meiinn cu Pathian nih a mi hna a ton hnanak thlam chungah khan an chiah lai, cucu puanzar leng, biakamnak hngalhter ṭhantu lungtlap hna chiahnak biakamnak kuang hmaiah khan a si lai. Cuka ah cun, Pathian hmaika ah khan zanlei in zinglei tiang a alh zungzal lai. Hi nawlbia hi Israel mi le an tefa hna nih an zulh zungzal awk a si lai.
Currently Selected:
EXODUS 27: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
