ESTHER 6
6
Haman Cu Mordekai Kha Upatnak Pek Awk An Hnek
1Cu zan cu siangpahrang cu aa hngilh kho lo; cun hngalh camcin awk a tlakmi thil ṭialnak cauk, chanrelnak hna kha rak pu u, tiah nawl a pek hna i siangpahrang hmaiah cun an rel. 2Cun Bigthana le Teresh, siangpahrang tilditmi pahnih, innka cawngtu hna nih Siangpahrang Ahasuerus tlaih an timh i zeitindah Mordekai nih an konglam a chimnak aa ṭialmi kha an hmuh. #Est 2.21-22 3Cun siangpahrang nih, “Hi kongah hin Mordekai cu upatnak siseh, thangṭhatnak siseh, zeital pek a si maw?” tiah a ti. Siangpahrang a tuammuaitu hna nih khan, “A caah zeihmanh tuahmi a um lo,” tiah an ti. 4Cun siangpahrang nih, “Ahodah tual chungah a um?” tiah a ti. Cu lioah cun Haman cu Mordekai thlainak ding ca i a timhmi thlainak i Mordekai cu thlai awkah siangpahrang cu ra chimh awkah siangpahrang inn lenglei tual i a luh kate khi a si. 5Cucaah siangpahrang sinum hna nih cun, “Haman cu khika ah, tual ah a dir ko,” tiah an chimh. Cun siangpahrang nih cun, “Run luhter u,” tiah a ti. 6Cucaah Haman cu a rung lut i siangpahrang nih cun a rak thawh i, “Siangpahrang nih upatnak pek a duhmipa cu zeidah tuahpiak awk a si hnga?” tiah a ti. Cun Haman nih amah le amah cu, “Keimah nakin ahodah siangpahrang nih cun upatnak cu pek a duh deuh rua hna hnga,” tiin a lung chungin a ti. 7Cun Haman nih siangpahrang cu a thawh i, “Siangpahrang nih upatnak pek a duhmipa cu, 8siangpahrang nih aa aih tawnmi thilpuan le siangpahrang nih aa cit tawnmi rangtum le siangpahrang nih aa chinh tawnmi bawi luchin kha rak chuahpi hna seh law, 9thilpuan le rangtum cu siangpahrang bawi hna lak i tuavon bik kha pek si hna seh law, amah nih cun siangpahrang nih upatnak pek a duhmipa cu thuamh seh, cun mipa cu khua chung tual ah khan chawhpi seh law, a hmaiah, ‘Siangpahrang nih upatnak pek a duhmipa cungah cun hi bantukin tuah a si lai,’ tiin au seh,” tiah a ti. 10Cun siangpahrang nih Haman cu a thawh i, “Khulrang in na chim bangin thilpuan le rangtum cu va la hna law siangpahrang kutka ah a ṭhumi Judah mi Mordekai cungah khan va tuah tuah. Na chimmi cu pakhatte hmanh tlolh hlah,” tiah a ti. 11Cucaah Haman nih Siangpahrang thuam le rangtum cu a lak hna i Mordekai cu a thuamh. Khuapi chung tual ah cun Mordekai cu rang kha aa cit i Haman nih cun a chawhpi i, “Siangpahrang nih upatnak pek a duhmipa cu hi bantukin tuah a si lai,” tiah Haman a au.
12Cun Mordekai cu siangpahrang kutka ah khan a kir ṭhan. Sihmanhsehlaw Haman cu a ṭah bu le a lu i khuh in a inn ah khulrang in a ṭin. 13Cun Haman nih a nupi Zeresh le a hawikom vialte kha a cung i a tlungmi thil vialte cu a chimh hna. Cun a nupi Zeresh le a mifim hna nih cun an thawh i, “A hmaiah tluk hram naa thawkmi Mordekai cu Judah mi a si ahcun amah cu na tei lai lo, sihmanhsehlaw nangmah tu kha a hmaiah cun na tlu hrimhrim lai,” tiah an ti. 14Cun amah sin i bia an chim lengmang lioah cun, siangpahrang tilditmi hna kha an ra i Esther nih a timhmi rawl danghnak ah khan Haman cu khulrang in an kalpi.
Currently Selected:
ESTHER 6: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
