ESTHER 2
2
Esther Cu Siangpahrangnu Ah A Cang
1Hi thil hna hnuah hin, Siangpahrang Ahasuerus cu a thin a dam tikah, Vashti le a tuahmi kong i nawlbia chuah a simi kha a hun hngalh ṭhan. 2Cun siangpahrang sinum hna amah a bultawltu hna nih khan an thawh i, “Siangpahrang caah hin ngaknu dawh in kawlpiak u sih. 3Cun ngaknu dawh no tete hna cu Susa khuapi chung, nu umnak khaan chung i a pumtu dingah, siangpahrang nih a ram chung i a peng dihlak ah khan bawi chia hna seh, cu nu khaan cu siangpahrang tilditmi Hegai kut tangah a um i amah cu nu a zohkhenhtu hna cu a si; cun zihmui kha pek si hna seh. 4Cun siangpahrang lung a tongmi ngaknu kha Vashti hmun ah khan siangpahrangnu ah cang seh,” an ti.
Cu nih cun siangpahrang cu a lung a ton i cu bantuk cun a tuah.
5Susa khuapi chungah cun Judah mi pakhat, a min Mordekai a simi a um; amah cu Jair fapa a si, Jair cu Shimei fapa a si, Shimei cu Benjamin phun Kish fapa a si; 6Mordekai cu Babilon siangpahrang Nebukhadnezzar nih Judah siangpahrang Jekoniah he a kalpimi saltang hna sinah khan Jerusalem khua in kalpi a si ve. #2Sia 24.10-16; 2Cha 36.10 7Amah nih cun a pa unau fanu Hadassah cu nu siseh, pa siseh a ngeih hna lo caah a cawm, Hadassah cu Esther cu a si; cu ngaknute cu aa dawh ngaingai i duh a nung ngaingai, a nu le a pa nih an thihtak tikah khan Mordekai nih amah fanu hrimhrim ah khan aa ser.
8Cucaah siangpahrang nawlbia le biakhiahnak cu thanh a si i ngaknu tampi cu Susa khuapi ah khan Hegai zohkhenhnak tangah pumh an si tikah, Esther zong cu siangpahrang inn ah cun an luhpi ve i nu zohkhenhtu Hegai kut tangah khan an chiah. 9Cun ngaknu nih cun a lung a ton i a hmaiah mithmai ṭha a hmu. Cun Hegai nih khan zihmui le a co awk hnga rawl kha siangpahrang inn in thimmi nu pasarih hna he khan khulrang in a pek hna i amah le a sinum hna cu nu khaan chung i hmun ṭha bik ah khan a kalter hna.
10Esther nih khan zei miphun dah a si i a rualchan kha ahodah an si ti kha a langhter lo; zeicahtiah Mordekai nih langhter lo awkin a fial. 11Cun Esther nih khan zeidah a tuah i zeitindah a um ti hngalh awkah Mordekai cu nu khaan tual hmaiah khan nifate in aa chawk.
12Cun ṭamhnak nu ca i phung tuahmi thla hleihnih a dih tikah, cucu an i ṭamh caan cu va si kaw, thla ruk chung cu mura zihmui in, thla ruk chung cu nu ca i zihmui le sathau in hmeh an si; cun ngaknu hna caah Siangpahrang Ahasuerus sin i vung luhnak caan a phanh cio tik i 13ngaknu hna cu siangpahrang sinah an vung luh tikah khan, nu khaan chungin siangpahrang inn ah cun, an duhmi cio paoh kha hei i put awk pek an si. 14Zanlei ah an va kal i zinglei ah, siangpahrang tilditmi Shaashgaz nih a zohkhenhmi nu khaan pahnihnak ah khan an ra kir, amah cu nuchun pawl zohkhenhtu a si; siangpahrang nih khan a rak duhmi an si i an min in a kawh ṭhan hna lo ahcun siangpahrang sinah khan an lut ṭhan ti lo.
15Cun a fanu bantuk taktak ah aa serhtu Mordekai i a pa unau Abihail i a fanu Esther caah siangpahrang sin i va luh caan cu a phak tikah, siangpahrang tilditmi, nu a zohkhenhtu hna Hegai nih ruahnak a cheuhmi thil kha dah ti lo cu, zeihmanh Esther nih cun a hal lo. Cun Esther cu a hmumi paoh an mit a tling dih. 16Cun Esther cu Siangpahrang Ahasuerus sinah, thla hranak thla, Tebeth thla, siangpahrang a si kum sarihnak ah, a siangpahrang inn chungah khan an vun luhpi tikah 17siangpahrang nih cun Esther cu nu dang vialte nakkhan a duh deuh i ngaknu dang vialte nakkhan velngeihnak le mithmai ṭha a hmu deuh; cucaah a lu ah siangpahrang luchin kha a chinh i Vashti hmun ah khan siangpahrangnu ah a ser. 18Cun siangpahrang nih a bawi pawl le a sinum pawl vialte hna caah khan rawl danghnak nganpi a ser, cucu Esther rawldanghnak a si. Cun a pengmi hna kha ngunkhuai ngaihthiamnak a pek hna i siangpahrang nunsiannak he aa tlakning in laksawng a ṭhenh hna.
Mordekai Nih Siangpahrang A Khamh
19Cun ngaknu hna cu a voi hnihnak an i pumh tikah Mordekai cu siangpahrang kutka ah khan a ṭhu. 20Mordekai nih a fial bangin Esther nih zei miphun le ahodah a rualchan an si kha a langhter lo; zeicahtiah Esther nih Mordekai cu, a rak cawm lio bantuk te khan a nawl a ngaih. 21Cun cu caan ah cun, Mordekai cu siangpahrang kutka i a ṭhut lioah khan, siangpahrang a tildit pahnih innka a cawngtu Bigthana le Teresh cu an thin a hung i Siangpahrang Ahasuerus cu tlaih awk kha an timh.
22Cun mah cucu Mordekai nih a hngalh tikah Siangpahrangnu Esther cu a chimh i Esther nih siangpahrang cu Mordekai min in a chimh. 23Cun cu thil cu an hlat i a si taktak ti kha an hmuh tikah, cu mi hna cu an pahnih tein mi thahnak thing ah an thlai hna. Cun mah cucu Chanrelnak Cauk chungah siangpahrang hmaika ah khan an ṭial.
Haka Bible © Bible Society of Myanmar, 1978.