DANIEL 5
5
Belshazzar Rawldanghnak
1Siangpahrang Belshazzar nih a bawi thong khat hna caah khan rawldanghnak a ser i thong khat hna he cun zu an ding. 2A hung ri nawn i cu tikah a pa Nebukhadnezzar nih Jerusalem biakinn in a rak lakmi sui hrai hna le ngun hrai hna kha va la hna u law cu hrai hna cun ka bawi hna le ka nupi hna le ka sinum hna he zu kan ding lai, tiah nawl a pek hna. 3Cucaah Jerusalem biakinn sui hrai hna le ngun hrai hna kha an va lak hna i siangpahrang le a bawi hna, a nupi hna le a hlasatu nu hna nih cun zu dinnak ah an hman hna. 4Zu cu an ding i sui pathian le ngun pathian le dar pathian le thir pathian le thing pathian le lung pathian kha an thangṭhat hna. 5Cu tikah ruah lopi ah khin siangpahrang inn vampang si thuhmi, mei nih fiang bik in a ceuhmi hmun ah khin, minung kut bor pakhat a hung chuak i ca a hun ṭial zuaimai ko. Cu kutbor cu ca a hun ṭial lioah khan siangpahrang nih cun kutbor a kenglei kha a hmuh. 6Siangpahrang cu a lau tuk i a daang dih; a kut le a ke vialte kha an ther dih i a khuk kha aa hnin. 7Khuachia ṭhawlthiam hna le camhthiam hna le mang ihthiam hna kha, runpi hna u, tiah fak piin a au i Babilon mifim hna cu. “Hi ca ṭialmi hi a rel kho i a sullam a ka chim khotu paoh cu puan sen aih an si lai i a hngawng ah sui ṭhi rual oih an si lai i ka pennak chungah bawi ngan pathumnak an si lai,” tiah a ti. 8Siangpahrang mifim vialte cu an rung lut, sihmanhsehlaw caṭialmi cu a rel zong an rel kho lo i a sullam zong siangpahrang cu an chim kho lo. 9Siangpahrang Belshazzar cu hmai daang le zei chim awk hngal loin a ṭhu ko i a bawi hna cu khuaruahhar in an um.
10Siangpahrang le a bawi hna cu bia an i ruah lengmang lioah khin siangpahrang bawinu cu rawl danghnak khaan chungah cun a rung lut i, “Siangpahrang cu saupi nung ko seh! Zeicahdah na khuaruah a har i daang dihlak in na um. 11Na ram chungah hin mipa pakhat, a chung i pathian thiang hna thlarau a ngei i na pa chan ah hngalhnak a ngei ti hngalhnak a fiangmi le pathian fimnak bantuk fimnak a ngei ti hngalhmi a um. Na pa Nebukhadnezzar siangpahrang nih khan mitleh thiam hna le khuachia ṭhawlthiam hna le Khaldi mi hna le mang ihthiam hna haotu bik ah khan a chiah. 12Hi Daniel, siangpahrang nih Belteshazzar tiah min a sakmi hi hawi hlei in thil ti khawhnak a ngei tiah hngalh a si i hngalhnak le fimnak le mang leh khawhnak le biahar fianter khawhnak le dawi leh khawhnak a ngei; amah cu atu ah auh si seh law a sullam a chim khawh ko lai,” tiah a ti.
Vampang Cung Caṭial Sullam A Chim
13Cun Daniel cu siangpahrang hmaiah cun an run luhpi i siangpahrang nih cun a thawh i, “Nangmah hi maw Daniel cu na si? Siangpahrang ka pa nih Judah ram in saltangmi si awkah a ratpimi hna lak i aa tel vemi cu maw na si? 14Nangmah cu pathian thiang hna thlarau kha a ngei i fiang tein hngalh khawhnak a ngei i hawi hlei in fimnak a ngeimi na si tiah ka theih. 15Mifim hna le khuachia ṭhawlthiam hna cu hi caṭial hi rel i a sullam chim awkah ka hmaiah an ratpi hna, sihmanhsehlaw an let kho lo. 16Sihmanhsehlaw nang cu mang sullam kha a chim khawh i dawi leh zong kha a thiam tiah kaan theih. Cucaah caṭial cu na rel khawh hna i a sullam na chim khawh hna ahcun maimaw puan kha aih na si lai i na hngawng ah sui ṭhi rual oih na si lai,” tiah a ti. 17Cun Daniel nih siangpahrang hmaiah cun aa thawh i, “Na laksawng cu nangmah caah i chiah ko hna, a si lo le midang pe hna. Asinain caṭialmi cu siangpahrang kha kan relpiak lai i a sullam cu kan chimh lai. 18Siangpahrang ka bawipa, Cung Nung Bik Pathian nih na pa Nebukhadnezzar cu pennak le ṭhawnnak le sunparnak le lianhngannak kha a pek; 19cu ṭhawnnak a pekmi thawng cun mi vialte le holh phun dangdang a hmangmi vialte hna nih a hmaiah a ther in an ther i amah cu an ṭih dih. Thah a duhmi kha a thah ko hna i nunh a duhmi kha a nunh ko hna, santer a duhmi kha a santer ko hna i ṭhumh a duhmi kha a ṭhumh ko hna. 20Sihmanhsehlaw a hun i porhlawt i mah lung lawng rinh in khua a hung sak i a ruam a hung kai tikah a bawiṭhutdan cung khan amah cu ṭhumh a si i a sunparnak cu chuh a si. 21Amah cu minung hna sin khan ṭhawl a si i a lungthin cu saram lungthin bantuk ah khan a cang, ramlak laa hna sinah khan khua a sa i cawtum bantukin ram kha a ei i a pum cu van dap nih cin cikcek in a tlak, cuticun Cung Nung Bik Pathian cu minung pennak cungah hin bawi a si i cu pennak a pengtu dingah cun a duhmi paoh kha a chiah hna ti a hngalh hlantiang, cuticun a um. 22Sihmanhsehlaw a fapa, Belshazzar, nangmah nih hi vialte cu na hngal ko nain, toidornak lungthin na ngei duh lo. Vancung Pathian cu a doh in na doh. 23A biakinn umkheng hna cu na cabuai ah na rak putter hna i nangmah le na bawi hna le na nupi hna le na hlasatu nu hna nih cu hrai cu zu dinnak ah nan hman hna. Ngun pathian le thing pathian, zeihmanh a hmu kho lomi, a theih zong a thei kho lomi a hngalh zong a hngal kho lomi cu nan thangṭhat hna i, asinain nan nunnak a uk i nan tuahmi vialte a uk dihtu Pathian tu cu sunparnak nan pe lo. 24Cu ruangah cun Pathian nih khi kut khi hi bia ṭial awkah hin a run thlah. 25Cun a ṭialmi ca biafang cu hihi an si: Mene mene tekel u-pharsin.#5.25 Mene ti hi a sullam cu rel tinak a si. tekel ti hi a sullam cu cuaithlai tinak a si. u-pharsin ti hi a sullam cu cheu tinak a si. 26Cun a lehnak cu hihi a si: Mene ti cu Pathian nih na pennak ni cu a rel cang hna i a donghnak a phakter cang hna, ti a si; 27-28tekel ti cu cuai thlainak ah thlai na si cang i na tling lo ti kha hmuh a si cang, tinak a si; u-pharsin ti cu, na pennak cu cheu a si cang, tinak a si i Media mi le Persia mi kha pek an si cang, ti a si,” tiah a ti. 29Cun Belshazzar nih nawl a pek hna i Daniel cu puan sen kha an aih i a pennak chungah bawi ngan bik pathumnak a si tiah thawngthanhnak an tuah. #Gen 41.42
30-31Cu zan hrimhrim ah cun Khaldi mi hna siangpahrang Belshazzar cu thah a si i Media mi Darius nih pennak kha a lak, Darius cu kum sawm ruk le kum hnih a si.
Currently Selected:
DANIEL 5: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
