AMOS 5
5
Israel Ṭah Hla
1Maw Israel, ṭah hla kan lawhmi hi
ngai tuah:
2Ngaknu thiang Israel cu tho ṭhan ti lo
dingin a tlu cang,
Amah a ram ah cun a bawk i
ahohmanh amah a thotu ding
an um lo.
3Hihi Bawipa bia an si:
Ral doh awkah minung thong khat he
aa thawhmi khuapi cu,
Za khat he lawng nganh a si lai i
Za khat he aa thawhmi cu
pahra he lawng nganh a si lai.
4Mah hihi Bawipa nih Israel mi sinah
a chimmi bia a si:
5Nun nan duh ahcun keimah sinah
ra u,
Bethel ah kal hlah u, Gilgal ah
kal hlah u;
Zeicahtiah Gilgal cu kalpi a si lai i
Bethel cu siasal inn ah a cang lai.
6Nun nan duh ahcun Bawipa sinah ra u,
Cu ti a si lo ahcun Josef kha
mei bantukin a kangh lai,
Bethel kha ahohmanh a hmihpiaktu
um loin a kangh lai.
7Biading kha a bingtalet in a thlai i,
Dinnak kha vawlei ah a hril i,
8Amah cu Likuk-canthum le Fizang
kha a ser i,
Muihnak kha zinglei ah a cantertu
a si;
Rili chung ti kha a auh hna i
vawlei chungah a thlet hna;
9Amah cu Firuk kha Fitlaw hnuah
a chuahter i
Mitsur thei a lotu timi arfi
a chuah hnuah,
Firuk kha a tlaktertu cu amah kha
a si.
Hi thil a tuahtu hi a min ah
Bawipa a si.
10Ṭhat lonak tuahtu zung i a chuahpitu
a hua i
Biatak a chimmi a fihmi hna:
11Nannih nih sifakmi kha nan lamhchih
hna i
Rawl kha hramhram in nan chuh
hna caah
Nannih nih lung remhmi inn cu
i sak hna hmanh u law
an chungah nan um lai lo;
Nannih nih mitsur dum ṭhaṭha i ser
hmanh u law, an hang kha
nan ding lai lo.
12Zeicahtiah nan ṭhat lonak kha
zeitluk in dah a tam i
Nan sualnak kha zeitluk in dah a tam
ti cu ka hngalh ko.
Nannih nih a sual lomi kha
nan hrem hna i
Tlanhnak man caah mi kha
nan hren hna;
Zeihmanh a ngei lomi cu biaceihnak
zung khan nan ṭhawl hna.
13Cucaah khi caan ah cun khuaruat
thiammi cu dai tein
an um ziar ko lai,
Zeicahtiah khi caan cu caan chia
a si lai.
14Nan nun nakhnga, chiatnak si loin
ṭhatnak tu kha kawl u,
Cu ti a si ahcun, kanmah leiah a um
nan ti bangin Bawipa, Ralkapbu
Pathian cu nan sinah fek tein a um lai.
15Ṭhat lonak kha hua u law ṭhatnak
kha duh u;
Biading kha biaceihnak zung ah
bawiṭhutdan cungah ṭhutter u;
Cuticun Bawipa, Ralkapbu Pathian cu
Josef tefa a tangmi hna cungah
khan zaangfahnak a hei ngei phum
ko hnga.
16Cucaah hihi Bawipa, Ralkapbu
Pathian bia cu an si:
Lam kip ah khan ṭahnak a um lai i
Khuachung tlonlennak bualrawn
paohpaoh ah khan aihramnak
a um lai.
Lothlo kha ṭap tiah an ti hna i
Ṭahhla lawh thiammi hna cu,
ṭap u tiah an kawh hna lai.
17Mitsur dum chung kip ah khan
ṭahnak a um lai;
Zeicahtiah nan lakah kaa chawk lai,
tiah Bawipa nih a ti.
18 Bawipa ni aa hngahhlangmi nannih
mihrut hna,
Bawipa ni cu nan caah a sullam zeidah
a si lai?
Muihnak a si lai, ceunak a si lai lo.
19Minung nih chiandeih a zamtak i
vom he an i ton ni bantuk,
Inn chungah a luh i vampang
a vun dah i
rul nih a rak cuk ni bantuk
a si lai.
20 Bawipa ni cu khuaci muih ni taktak
a si ko lai,
Ceunnak ni a si lai lo;
Ceunak um loin a mui dupmi ni
a si ko lai.
21Nan puai hna cu ka huat hna i zei ah
ka rel hna lo,
Nan sunhsakmi nan pumhnak hna cu
ka duh hna lo.
22Nannih nih nan raithawinak hna le
nan thawhlawm hna kha nan ka pek
tikah ka cohlang hna lai lo,
Raithawinak ca i nan hmanmi saṭil
hna zong kha
ka cohlang duh hna lai lo.
23Nan hla aw kha ka theihter ti sawh
hna hlah u;
Nan thonglawi aw kha ka celh
ti hna lo.
24Sihmanhsehlaw biading kha
ti bantukin luanter u law
Dinnak kha a cat lomi tiva bantukin
luanter camcin ko u.
25Nannih Israel mi hna,
kum sawm li chung ramcar
chung i nan um lioah khan,
Raithawinak le laksawng nan ka pe
bal hme maw?
26Pe hlah, nan rak ka pe bal lo,
sihmanhsehlaw atu cu nan caah
nan i sermi
nan siangpahrang Sakkuth#5.26 Sakkuth le Kai-uan hi Babilon arfi pathian min an si. le
nan siasal Kai-uan,
nan arfi pathian hna cu
nan i phorh hna lai i,
27Damaskas pinah sal i va taan awkah
kan ṭhawl hna lai.
Cuticun Bawipa nih a ti; a min cu
Ralkapbu Pathian a si.
Currently Selected:
AMOS 5: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
