2 SAMUEL 6
6
Jerusalem Ah Pathian Kuang An Lak
(1Cha 13.1-14; 15.25—16.6,43)
1David nih Israel mi lakin thim ciammammi sang thum kha a pumh ṭhan hna. 2Cun David cu a tho i a sinah a ummi vialte hna he khan, Pathian kuang, a cungah ralkapbu Bawipa min a cuang i cherubim cung i a ṭhumi kha, vung lak awkah Judah ram Baalah khua ah khan an vung kal. #Exo 25.22 3Cun Pathian kuang kha cawleng thar in an phorh i tlang cung i a ummi Abinadab inn khan an chuah pi; cun Abinadab fapa Uzzah le Ahio nih khan, #1Sam 7.1-2 4a chung i Pathian kuang a ummi cawleng thar kha an mawngh i Ahio cu kuang hmaiah khan a kal. 5Cun David le Israel chungkhar vialte cu Bawipa hmaiah an thazang dihlak le hla le tingtang le thonglawi le muko le khuang le sumsel hna he tiah nuamhnak an tuah.
6Cun Nakon phuhri kha an phak tikah cawtum kha an rilh caah Uzzah nih Pathian kuang kha a kut in a hei banh i a tlaih. 7Cun Bawipa thinhunnak cu Uzzah cungah a alh i a kut in kuang kha a hei banh caah Pathian nih khika ah a tuk i cuka ah Pathian kuang kiangah khan a thi. 8Cun Pathian nih Uzzah cungah a thinhunnak a sah caah David cu a thin a hung i cuka hmun cu a min ah Perez-uzzah tiah nihin tiangin ti a si. 9Cun David cu khi ni ah Pathian kha a ṭih i, “Zeitindah Bawipa kuang cu ka sinah a rat khawh lai?” tiah a ti. 10Cucaah David nih Bawipa kuang cu David khua chung i luhpi awk kha a duh lo; asinain David nih Git mi Obededom inn lei tu ah khan a kalpi. 11Cun Bawipa kuang cu Git mi Obededom inn chungah khan thla thum a um i Bawipa nih Obededom le a innchungkhar vialte kha thluachuahnak a pek hna. #1Cha 26.4-5
12Cun Siangpahrang David kha an chimh i, “Bawipa nih Obededom innchungkhar kha Pathian kuang thawngin thluachuah a pek hna,” tiah an ti. Cucaah David cu a va kal i Obededom inn khan David khua ah lunglawmhnak in Pathian kuang kha a ratpi; 13cun Bawipa kuang a zawntu hna nih khan kar ruk an kal tikah cawtum pakhat le cenhmi saṭil pakhat kha a thawi hna. 14Cun David cu Bawipa hmaiah a thazang dihlak in a lam; David cu la hmang ṭhia tlangbawi angki aa hruk. 15Cucaah David le Israel innchungkhar vialte nih aupah le muko tumpah in Bawipa kuang cu an hunpi.
16 Bawipa kuang kha David khua chung i a luh lioah Saul fanu Mikhal nih khan thlalangawng in a hei zoh i Siangpahrang David cu Bawipa hmai i a laam le aa hlawh len ko kha a hei hmuh i a lung chungin a nihsawh. 17Cun Bawipa kuang kha an luhpi i a umnak ding hmun caah David nih a rak bunhmi thlam chungah khan an chiah. Cun David nih khangh thawinak le daihnak thawinak kha Bawipa hmaiah a pekchanh. 18Cun David nih khangh thawinak le daihnak thawinak kha a pekchanh dih tikah, ralkapbu Bawipa min in mizapi kha thluachuah a pek hna i 19mi vialte kha, Israel mibu cu an ning piin, nu he pa he, changreu hlum khat, sa zam khat le mitsur thei car hlum khat a phawt cio hna. Cun mi vialte cu, an inn cio ah an ṭin. #1Cha 16.43
20Cun David cu a innchungkhar kha thluachuah pek awkah a va kir. Sihmanhsehlaw Saul fanu Mikhal nih khan David cu ton awkah a ra chuak i, “Nihin cu Israel siangpahrang cu a sunglawi ko cu ta, mizeiruaramlo pakhat nih ningzah hngal loin a hnipuan aa phoih bantukin pei, a sal hna i an salnu hna hmaiah, nihin ah aa phoih ve kha!” tiah a ti. 21Cun David nih Mikhal cu, “Na pa le a innchungkhar vialte nakin keimah kha a ka thim i Israel mi cung i bawi a ka cantertu Bawipa hmaiah pei a si tiah — Bawipa hmaiah cun thanuamnak ka tuah ko lai. 22Hi nak i nihsawh awk tlak deuh hmanh ah kaa ser ko lai i keimah mit hmanh ah zahpi awk tlak ka si ko lai, sihmanhsehlaw na chimmi sinum ngaknu pawl hna thawng khan pei upat ka si lai tiah,” tiah a ti. 23Cun Saul fanu Mikhal kha a thih ni tiangin fa a ngei lo.
Currently Selected:
2 SAMUEL 6: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006