1 SAMUEL 8
8
Israel Mi Nih Siangpahrang Ngeih An Duh
1Samuel cu a tar tikah a fapale hna kha Israel mi cung i biaceihtu ah a ser hna. 2A hrin hmasa bik fapa cu Joel a min a si i a pahnihnak cu a min Abijah a si. Beersheba ah biaceihtu an si. 3Asinain, a fapa hna cu amah lam kha an zul lo, miaknak tu kha an merhnawh. Nawhthuh kha an lak i biading kha an merh.
4Cun Israel upa vialte kha an i pum i Samuel sinah Ramah ah an ra. 5Amah cu an thawh i, “Zohhmanh, na tar cang, cun na fapale nih na lam an zul fawn lo. Cucaah miphun vialte hna cio bangin, a kan uktu ah siangpahrang pakhat kan chiahpiak tuah,” an ti. #Deu 17.14 6Sihmanhsehlaw, “A kan uktu ah siangpahrang pakhat kan pe,” an ti tikah, cu thil nih cun Samuel kha a lawmhter lo. Cun Samuel nih Bawipa sinah thla a cam. 7Cun Bawipa nih Samuel cu a chawnh i, “Mizapi nih na sinah an chimmi bia vialte ah an aw kha ngai tuah; zeitintiah nangmah an in hlawt a si lo, an cung i siangpahrang ka sinak hin keimah an ka hlawt a si. 8Izipt ram in ka chuahpi hna ni in atu tiang ka cungah an tuahmi vialte ningin, keimah kha hlawt le khuazing dang hna kha bia in, cu bangin nangmah cung zongah an tuah ve. 9Cucaah atu cu an bia kha ngai ko hna; sihmanhsehlaw ṭha tein ralrinnak na pek hna lai i anmah a uktu ding siangpahrang kalning kha na hmuhsak hna lai,” tiah a ti.
10Cucaah Samuel nih amah sinin siangpahrang a halmi hna kha Bawipa bia vialte cu a chimh hna. 11Amah nih, “Nannih an uktu hna siangpahrang kalning cu hi bangin a si lai: nan fapa kha a lak hna lai i a rangleng cittu le a rang cittu le a rangleng hmai tlitu dingah a chiah hna lai. 12Cun a thong pawl haotu hna le sawm nga pawl haotu hna kha aa chiah hna lai, cun a cheu cu a leithuangtu le a rawlṭuantu le a ral hriamnam sertu le a rangleng thilri sertu ah a chiah hna lai. 13Nan fanu hna cu zihmui sertu le rawlchuang le changreu rawtu ah a lak hna lai. 14Nan lo le nan mitsur dum le nan oliv dum hna lakah a ṭha bikbik kha a lak hna lai i a rianṭuantu hna kha a pek hna lai. 15Nan rawl le nan mitsur dum chungin cheu hra cheu khat kha a lak lai i, a bawi hna le a rianṭuantu hna kha a pek hna lai. 16Nan salpa hna le nan salnu hna le nan caw le nan laa hna lakah a ṭha bikbik kha a lak hna lai i amah rianṭuantu ah a hman hna lai. 17Nan tuurun hna chungin cheu hra cheu khat kha a lak hna lai i nannih cu amah sal nan si lai. 18Cun khi ni ah nanmahte nih nan i thimmi nan siangpahrang ruangah nannih cu nan ai len te lai; sihmanhsehlaw Bawipa nih khi ni ah cun an let hna lai lo,” tiah a ti.
19Sihmanhsehlaw mi hna nih cun Samuel aw ngaih cu an duh lo; annih nih, “Si hlah! Kan cungah siangpahrang kan ngei ko lai, 20kannih zong miphun vialte hna cio bantuk kan si ve lai; kan siangpahrang nih cun a kan uk lai i kan hmaiah a kal lai i kan ral hna kha a kan tukpiak lai,” tiah an ti. 21Cun Samuel nih mi hna an bia vialte cu a theih tikah Bawipa kha a hna chungah a va rawnh chin. 22Cun Bawipa nih Samuel sinah cun, “An aw kha ngai hna law, siangpahrang pakhat serpiak hna,” tiah a ti. Cun Samuel nih Israel mi hna cu, “Nan khua cio ah va tlung u,” tiah a ti hna.
Currently Selected:
1 SAMUEL 8: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
