1 SAMUEL 28

1Khi caan ah khan Filistin mi nih an ralkap kha raldoh awk caah, Israel kha doh awkah an pumh hna. Cun Akhish nih David cu a thawh i, “Nangmah le na mi hna kha keimah sinah ralkapbu chungah nan kal ve awk a si kha va hngal ko,” tiah a ti. 2Cun David nih, “A ṭha ko, na sal nih zeidah a tuah khawh ti kha na hngalh lai,” tiah a ti. Cun Akhish nih David cu, “A ṭha ko, nangmah cu na nun chung keimah pum rungvengtu ah kan ser lai,” tiah a ti.

Saul le Endor Khua Thitlawnthiamnu

3Samuel kha atu cu a thi cang i Israel mi vialte nih an ṭah i amah khua Ramah ah khan an vui. Cun Saul nih thitlawnthiam le hnamngei kha ram chungin a dawi dih hna. #Lev 20.27; Deu 18.10-11; 1Sam 25.1 4Filistin mi cu an i pum i an ra i Shunem ah riahhmun an khuar; cun Saul nih Israel mi vialte kha a pumh hna i Gilboa ah riahhmun an khuar ve. 5Saul nih Filistin ralkapbu kha a hmuh tikah, a thin a phang i a ther in a ther. 6Cun Saul nih Bawipa kha a hal tikah Bawipa nih mang in siseh, Urim in siseh, profet hna in siseh, a let lo. #Nam 27.21 7Cun Saul nih a sinum hna kha, “Thitlawnthiamnu pakhat in ka kawlpiak tuah u, a sinah ka va kal i amah cu ka va hal nakhnga,” tiah a ti hna. Cun a sinum hna nih cun, “Zohhmanh, Endor ah thitlawnthiam pakhat a um,” tiah an chimh.

8Cun Saul cu mui dang in aa thleng i hnipuan dang aa hruk i amah sin i a um mipa pahnih he an kal; cun nu sinah cun zan ah an ra. Cun anih nih, “Thi ka tlawnpiak law, nangmah sinah a min ka chim laimi paoh hun ka chuahpiak tuah,” tiah a ti. 9Nu nih khan amah sinah cun, “Saul nih thitlawnthiam le hnamngei hna cu zeitindah hi ram chungin a ṭhawl hna ti kha na hngalh hrimhrim ko ṭung. Zeicahdah ka thih nakhnga dingin ka nunnak kha rap na ka chiah?” tiah a ti. 10Sihmanhsehlaw Saul nih a sinah cun Bawipa min chalh in chiat a ser i, “Bawipa a nun bangin, hi thil ruangah hin na cungah dantatnak a tlung lai lo,” tiah a ti. 11Cun nu nih cun, “Ahodah kan chuahpiak lai?” tiah a ti. Anih nih, “Samuel kha hun ka chuahpiak tuah,” tiah a ti. 12Nu nih Samuel kha a hmuh tikah aw fak piin a ai i nu nih cun Saul kha, “Zeicahdah na ka hlen? Nangmah hi Saul na si,” tiah a ti. 13Siangpahrang nih amah cu, “Ṭih hlah; zeidah na hmuh?” tiah a ti. Cun nu nih khan Saul cu, “Vawlei chungin pathian pakhat a chuah kha ka hmuh,” tiah a chimh. 14Cun anih nih, “A mui zeidah a si?” tiah a ti. Cun anih nih, “Tarpa pakhat a hung kai i a angkifual aa hruk,” tiah a ti. Cun Saul nih Samuel a si kha a hngalh i vawlei leiah a lu a khun i upatnak kha a tuah.

15Cun Samuel nih Saul cu, “Zei-cahdah na hun ka chuahternak hin hna na ka hnawh?” tiah a ti. Saul nih a leh i, “Harnak nganpi chungah ka um; zeitintiah Filistin mi nih an ka tuk i Pathian nih hnulei a ka chit cang i profet hna sinin siseh, mang in siseh a ka let ti lo; cucaah nangmah cu zeidah ka tuah awk a si kha a ka chimtu dingah kan kawh,” tiah a ti. 16Cun Samuel nih, “Bawipa nih hnulei an chit cang i na ral ah a can cang caah zeicahdah keimah cu na ka hal duh ti? 17Keimah in Bawipa nih a chim bantuk khan na cungah a tuah cang; zeitintiah Bawipa nih pennak cu na kut chungin an chuh i na innpa David kha a pek cang. #1Sam 15.28 18Nangmah nih Bawipa aw kha na zul lo i Amalek cung i a thinhunnak ṭihnung kha na tlinter lo caah, kha caah khan nihin ah hin Bawipa nih na cungah mah hi a tuah. #1Sam 15.3-9 19Cu hleiah Bawipa nih Filistin mi hna kut chungah Israel mi hna zong kha nangmah he a chanh hna lai i thaizing ah nangmah le na fapa hna cu keimah sinah nan um lai; Bawipa nih Israel ralkapbu zong kha Filistin mi hna kut chungah a chanh lai,” tiah a ti.

20Samuel bia thawng cun, Saul cu ṭihnak in a khat i vawlei ah chikkhatte ah a tlu thlup ko; cun chun nitlak zan khuadei zeihmanh a ei lo caah thazang zeihmanh a ngei lo. 21Cun nu kha Saul sinah cun a ra i a thin a phang ngaingai ti kha a hmuh tikah amah cu, “Zohhmanh, na salnu nih na bia kha ka rak in ngaih; thih le thih tiin keimah na rak ka chimhmi kha ka rak in ngaih. 22Cucaah atu cu nang zong nih na salnu hi a bia ngai ve tuah; na hmaiah changreu tlawm tein hunh ning law, na lam lei i na kal tikah thazang na ngeih nakhnga, ei tuah,” tiah a ti. 23Sihmanhsehlaw a al i, “Ka ei lai lo,” tiah a ti. Sihmanhsehlaw a sinum hna nih khan, minu he cun, an hnek peng i an bia kha a ngaih hna. Cucaah vawlei khan a tho i ihkhun cungah a ṭhu. 24Minu nih khan a inn chungah cenhmi cawfa pakhat a ngei i khulrang in a thah, changvut kha a lak i a nawn i thilnu telh lo changreu ah a ser i, 25Saul le a sinum hna kha a hunh hna i annih nih an ei. Cun an tho i cu zan ah cun an kal diam.

Currently Selected:

1 SAMUEL 28: HCL06

Highlight

Copy