1 SAMUEL 25
25
David le Abigail Kong
1Cun Samuel kha a thi i Israel mi vialte nih an i pum i an ṭah i Ramah khua i a inn ah khan an vui.
Khi tikah David cu a tho i Paran ramlak ah khan a vung kal. 2Cun Maon ah khan mipa pakhat a um i a rian ṭuannak cu Karmel ah a si. Cu pa cu a rum ngaingai; tuu thong thum le meheh thong khat a ngei Amah cu Karmel ah khan a tuu hmul a met hna. 3Cu pa a min cu Nabal a si i a nupi min cu Abigal a si. Minu cu a fimmi le aa dawhmi a si, sihmanhsehlaw mipa cu mikhepkha le ziaza ṭhalo a si; amah cu Kaleb mi a si. 4David nih ramlak ah cun, Nabal nih a tuu hmul kha a meh hna tiah a theih. 5Cucaah David nih tlangval pahra a thlah hna i David nih tlangval hna sinah cun, “Karmel ah hung kal u law, cun Nabal kha va tong u law, ka min in biakchawnhnak pe u. 6Cun hi bangin amah cu, ‘Nangmah cungah daihnak um ko seh, cun na innchungkhar cungah daihnak um seh law, na ngeihmi vialte cungah daihnak um ko seh. 7Nangmah nih tuu hmul mettu na ngei hna ti kha ka theih; cun na tuukhal hna cu kan sinah an um i an cungah harnak zeihmanh kan tuah lo i Karmel i an um chung vialte zeihmanh an thlau lo. 8Na tlangval kha hal hna law an in chimh ko lai. Cucaah puai ni i kan rat caah hin ka tlangval hna hi na hmaiah mithmai ṭha hmuhter ko hna. Na sal hna le na fapa David hi na ngeihmi paoh rak kan pe ko sawh, a ti,’ tiah nan va ti lai,” tiah a ti.
9David tlangval hna cu an rat tikah hi vialte cu David min in Nabal kha an chimh; cun annih nih an ngan. 10Cun Nabal nih David sinum hna cu a leh hna i, “David cu ahodah a si? Jesse fapa cu ahodah a si? Atu caan lioah hin an bawile sinin a zammi sal tampi an um. 11Ka tuu hmul mettu hna caah ka thahmi sa le ka changreu le ka ti kha i lak in khuazei in an ra ti ka hngalh lomi minung kha ka pek hna lai maw?” tiah a ti. 12Cucaah David tlangval hna cu an i let i an kir i hi vialte kha an chimh dih. 13Cun David nih a mi hna cu, “Nan vainam i thlaih dih uh,” tiah a ti hna. Cun an dihlak in an vainam cu an i thlaih; David zong nih a vainam cu aa thlaih ve; cun David cu za li tluk nih an hun zulh i za hnih nih an thil kha an rak hngah.
14Sihmanhsehlaw Nabal sinum hna lak i pakhat nih Nabal nupi Abigail kha a va chimh i, “Zohhmanh, David nih kan bawipa kha biakchawnh awkah ramlak in mi a rak thlah hna i annih cu a rak sik hna. 15Sihmanhsehlaw mi hna cu kan cungah an rak ṭha ngaingai ṭung i harnak zeihmanh kan ing lo i lo chung i kan um lio zongah zeihmanh kan thlawtthlau hna lo, anmah sin i kan kal chung paohpaoh cu; 16annih cu an sin i tuu cawng in kan um chung vialte zan ah siseh, chun ah siseh, kan caah hauhruang an si. 17Cucaah mah hihi hngal law zeidah ka tuah lai ti kha i ruat tuah; zeitintiah kan bawipa le a innchungkhar vialte cung i ṭhat lonak tuah kha timh a si cang, amah hi ahohmanh nih chawnh khawh loin michiakha a si fawn ṭung,” tiah a ti.
18Khi tikah Abigail cu aa namhnawh i changreu hlum za hnih le mitsur hang cua hnih le chumh awk i can ciami tuu panga le vaireu rel nga le mitsur bor za khat le theipi hlum za hnih, aa lak hna i laa cungah a chuan hna. 19Cun a tlangval hna cu a thawh hna i, “Ka hmaiah rak kal u, zohhmanh u, nan hnu in kan zulh hna lai,” tiah a ti. Sihmanhsehlaw a va Nabal kha a chim lo. 20Cun laa kha aa cit i tlang phen i a vung zuan lioah khan, zohhmanh, David le a mi hna cu amah leiah khan an rung i a ton hna. 21Cun David nih khan, “Hi pa i a ngeihmi thil vialte hi pakpalawng ah dah mu ramlak ah ka hei congh tawn i a ngeihmi vialte cu pakhat hmanh tlau loin a hei um; anih nih ṭhatnak cu chiatnak in a ka rulh; 22thaizing tiang amah ta a simi a pa pakhat zong ka nganh a si ahcun, hi bantukin Pathian nih David cungah tuah seh law, hi nak tam deuh zongin tuah ko seh,” tiah a rak ti.
23Cun Abigail nih David kha a hmuh tikah aa hnawchan i a laa khan a ṭum i David hmaiah a kun i a lu kha a khun. 24A ke hramah khan a bawk i, “Keimah cung lawnglawng ah hin, ka bawipa, mawhnak kha um ko seh; na salnu hi na hna theih ah bia chimter ko law, na salnu bia hi ka ngaihpiak ko sawh. 25Ka bawipa nih hi michiakha, Nabal hi zei ah relpiak loin um ko seh, zeitintiah a min bantukte hi amah cu a si ko; Nabal a min a si bang, mihrut a si ko; sihmanhsehlaw ka bawipa nangmah na tlangval na rak thlahmi hna cu keimah na salnu nih hin ka rak hmu hna lo. 26Cucaah cun ka bawipa, Bawipa a nun bantuk le na nunnak a nun bantukin, thisen chuah mawhnak le nangmah nih na kut hrimhrim in phuhlam tuahnak kha Bawipa nih tuah loin an umter caah, na ral hna le ka bawipa cungah ṭhat lonak tuah awk a kawlmi hna cu Nabal bantuk si ko hna seh. 27Cun na sal nih ka bawipa sinah ka rak putmi laksawng hi ka bawipa zultu tlangval hna cu pek si hna seh. 28Na salnu ka sualnak cu ka ngaithiam ko sawh; zeitintiah ka bawipa nih Bawipa raltuknak kha a tuk caah Bawipa nih ka bawipa cu a fekmi inn a serpiak ṭheo lai i na nun chung paohpaoh nangmah chungah ṭhat lonak hmuh awk a um lai lo. 29Mi nih nangmah kha dawi awk le na nunnak kha kawl awkah an in thawhhnawh ahcun, ka bawipa nunnak cu Bawipa na Pathian zohkhenhnak chung i a ummi minung hna nunnak tom chungah khan tom chih a si lai; cun na ral hna nunnak tu cu lungherhchehnak ṭe karlak chung in cheh bantukin a cheh hlo hna lai. 30Cun Bawipa nih ka bawipa cungah nangmah kong i a chimmi ṭhatnak vialte kha a tuah dih tikah le Israel cungah bawi i an chiah tikah, 31zei ruang lo i thisen chuahnak kongah siseh, mah theng nih phu va hlamnak kongah siseh, ka bawipa nih zeihmanh na tuah lo caah, ngaihchiattertu phuhrunnak zeihmanh na ngei lai lo. Cun Bawipa nih ka bawipa hi ṭha tein an ti tikah, na salnu hi ka philh te hlah,” tiah a ti.
32Cun David nih Abigail cu a thawh i, “Bawipa, Israel Pathian, nihin i keimah ton awkah nangmah an thlahtu hi thangṭhat si ko seh! 33Na fimnak hi thluachuah hmu seh law, nihin ah thisen chuah mawhnak le keimah nih keimah kut hrimhrim in phu i hlamnak tuahnak in a ka khamtu nangmah cu thluachuahnak hmu ko! 34Zeitintiah nangmah kha fahnak peknak in a ka khamtu Bawipa, Israel Pathian nih a nun hrimhrim bantukin, keimah ton awkah khan khulrang in rak ra hlah law, thaizing zingka ah cun Nabal caah hin pa pakhat hmanh an tang ti hnga lo,” tiah a ti. 35Cun David nih amah kut khan amah ca i a rak putmi kha a cohlan i anih cu, “Na inn ah dai tein hung kal ko; zohhmanh, na aw kha kan ngaihpiak i na ka halmi kha kan pek,” tiah a ti.
36Cun Abigail cu Nabal sin kha a phan; cun zohhmanh, a inn ah khan siangpahrang puai bantuk puai pakhat a rak tuah. Cun Nabal cu a rak i lawm cuahmah ko, zeicahtiah a ri ngaingai ko; cucaah zinglei khuaceu hlanah cun zeihmanh a chim lo. 37Cun zinglei ah, Nabal cu a zu ritnak in a fim tikah khan, hi thil hna cu a nupi nih khan a chimh i a lung cu a chungah a thi i amah cu lung bantuk ah a cang. 38Cun ni hra tluk hnuah Bawipa nih Nabal cu a tuk i a thi.
39David nih Nabal kha a thi tiah a theih tikah, “Nabal kut ah ningzahnak ka hmuhmi phu a hlam i a sal kha ṭhat lonak tuah loin a ka khamtu Bawipa cu thangṭhat si ko seh; Bawipa nih Nabal cu ṭhat lonak a tuahmi kha amah lu cung lila ah a tlunter ṭhan,” tiah a ti. Cun David nih mi a hei thlah hna i Abigail kha a nupi caah an len. 40Cun David sinum hna cu Karmel tlang ah, Abigail sinah an phak tikah annih nih amah kha, “David nih nangmah cu a nupi si awk i va lak awkah nangmah sinah a kan thlah,” tiah an chimh. 41Cun a tho i vawlei lei zoh in a kun i, “Zohhmanh u, nan salnu hi ka bawipa i a sinum hna ke ṭawltu salnu a si ko,” tiah a ti. 42Cun Abigail cu khulrang in a tho i laa cungah aa cuan i a sinum nu panga nih khan an tuammuai. David lamkal hna kha a zulh hna i a nupi ah a cang.
43David nih Jezreel khuami Ahinoam zong kha a lak i an pahnih in a nupi ah an cang. 44Saul nih a fanu Mikhal, David nupi kha, Gallim khuami Laish fapa Palti kha a rak pek cang. #2Sam 3.14-16
Currently Selected:
1 SAMUEL 25: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
