1 SAMUEL 14
14
1Ni khat cu Saul fapa Jonathan nih khan a ralthuam a putu tlangvalpa sinah khan, “Ra law, khatte lei ral i Filistin mi ralvengtu ralkapbu sinah khin va kal tuah u sih,” tiah a ti. Sihmanhsehlaw a pa kha a chim lo. 2Saul cu Gibeah pawngri i a ummi Migron i a ummi taleti kung toiah a um ko; amah sinah a ummi cu za ruk tluk an si, 3Bawipa tlangbawi Shiloh i a rak ummi Eli fapa Phinehas i fapa Ikabod i a unau Ahitub i fapa Ahijah zong, tlangbawi angki aa hruk i a um ve. Cun mizapi nih khan Jonathan a kal kha an hngal lo. 4Cun Jonathan nih Filistin mi ralvengtu ralkapbu sin i va kal aa timhnak fiang ah khan a kap hnih in lungpang an um veve, pakhat min cu Bozez a si i a dang pakhat min cu Seneh a si. 5Lungpang pakhat cu chaklei ah Mikmash hmailei ah aa chong i a dang pakhat cu thlanglei ah, Geba hmailei ah aa chong.
6Cun a ralthuam putu tlangval sinah cun Jonathan nih, “Hi cuarpartan lomi hna an ralvengtu ralkapbu sinah khin va kal tuah u sih; Bawipa nih kan caah rian a hei ṭuan ko hmanh hnga maw, zeitintiah khamhnak cu mi tam thawngin a si ah siseh, mi tlawm thawngin a si ah siseh, Bawipa cu zeihmanh nih a dawnh khawh ṭung lo,” tiah a ti. 7Cun a ralthuam putu nih khan a sinah, “Na lung nih a duhning te cun tuah ko; zohhmanh, na sinah ka um, na ruahnak bantukte cu ka ruahnak a si ve,” tiah a ti. 8Cun Jonathan nih khan, “Zohhmanh, an sin leiah khin kan hei kal lai i kan hei i langhter lai. 9Annih nih kan sinah, ‘Nan sinah kan rat hlantiang rak um rih u,’ an ti ahcun, kan umnak hmun ah khan kan dir lai i an sinah khan kan hung kal lai lo. 10Sihmanhsehlaw annih nih, ‘Kan sinah hung tuah u,’ an ti ahcun, kan hung kal lai; zeitintiah mah hihi Bawipa nih annih cu kan kut chungah a kan pek cang ti hmelchunhnak a si lai,” tiah a ti. 11Cucaah an pahnih in Filistin mi ralvengtu ralkapbu sinah cun an hei i langhter; cun Filistin mi hna nih cun, “Zohhmanh u, an i thuhnak kua chungin Hebru mi an chuak cang khi,” tiah an ti. 12Cun ralvengtu ralkapbu hna nih cun Jonathan le a ralthuam putu cu an hei kawh hna i, “Kan sinah hung u law, thil pakhat kan in hmuhsak hna lai,” tiah an hei ti hna. Cun Jonathan nih a ralthuam putu sinah cun, “Hun ka zul tuah; zeitintiah annih cu Bawipa nih Israel mi kut chungah a pek cang hna cuh,” tiah a ti. 13Cun Jonathan cu a kut le a ke i bawmh in a hung kai, a ralthuam putu nih cun a hnu in a zulh. Cun annih cu Jonathan hmaiah cun an tlu duahmah ko i a ralthuam putu zong nih a hnulei in a hun thah ve hna; 14cun cu thahnak hmasa bik Jonathan le a ralthuam putu nih an tuahmi cu, tlangrel tuhnak kauh vawlei ah khin, leileh rinkuar a cheu can tluk ah khin, mi pakul tluk an thi. 15Cun riahhmun le lo lak le mi vialte lakah khan launak a um ciammam i ralvengtu ralkapbu le ral hranhtu ralkap hna hmanh cu an ther ko; cun vawlei aa hnin i launak nganpi ah a cang.
16Cun Saul ralvengtu hna, Benjamin mi khua Gibeah i a ummi hna nih khan an hei zoh i, zohhmanh, mi bupi cu hilei khilei ah an i cavai len ko. 17Cun Saul nih a sin i a ummi hna sinah cun, “Mi i rel u law, ahodah kan sinin a kal, i zoh tuah u,” tiah a ti. Cun annih nih an i rel tikah, zohhmanh, Jonathan le a ralthuam putu kha an um lo. 18Cun Saul nih Ahijah sinah cun, “Hika ah hin Pathian kuang kha rak pu tuah,” tiah a ti. Zeitintiah khi caan ah Pathian kuang cu Israel mi sinah khan a kal ve. 19Cun Saul nih tlangbawi a chawnh lioah khan, Filistin mi riahhmun chung i i tuainak cu a karh chin lengmang i Saul nih tlangbawi sinah cun, “Na kut kha zuk ṭhan tuah,” tiah a ti. 20Cun Saul le a sinah a ummi vialte kha an i pum ṭhan i raldohnak chungah cun an lut; cun zohhmanh, anmah le anmah cu nam in an i tu ciammam i, i tuainak nganpi a um. 21Cun cu caan hlan i Filistin mi sin i a um i an sinah an riahhmun i a hung kalmi Hebru mi hna hmanh kha, atu ah cun, Saul le Jonathan sinah a ummi Israel mi hna sin i um awkah an i mer. 22Cu bantukin, Efraim tlangram i aa thupmi Israel mi vialte nih khan Filistin mi cu an zam ti an theih tikah, annih zong nih raldohnak chungah khan i tel ve in, heh tiah an dawi ve hna. 23Cuticun khi ni ah Bawipa nih Israel cu a luatter; raldohnak cu Beth-aven pin tiang a phan.
24Cun khi ni ah Israel mi hna cu an lungre a thei, zeicahtiah mi cungah cun chiatsernak kha Saul nih a khin i, “Ka ral hna cungah phu ka hlam i zanlei a si hlan i rawl a eimi cu chiatserh siseh,” tiah a ti. Cucaah ahohmanh nih rawl an tep lo. 25Cun mi vialte cu tupi chung i an va luh tikah, zohhmanh, vawlei ah khuaihliti a rak um. 26Cun mi kha tupi chung i an va luh tikah, zohhmanh, khuaihliti kha a rak tla lengmang, sihmanhsehlaw ahohmanh nih an kut an kaa ah an i tuh lo; zeitintiah mi nih khan chiatserhnak kha an ṭih. 27Sihmanhsehlaw Jonathan nih a pa nih mi kha chiatserhnak in bia a beuh hna ti kha a thei lo; cucaah a kut in aa putmi fung par cun khuai thlar cu a sawh i a kut in aa tuh i a mit a hung fiang ṭhan. 28Cun mi pakhat nih, “Na pa nih mi kha chiatserhnak in fek tein bia a beuh hna i, ‘Nihin i rawl a eimi cu chiat siseh,’ a ti,” tiah a ti. Cun mizapi cu an buhri dih. 29Cun Jonathan nih aa thawh i, “Ka pa nih ram hi harnak a pek ko hih. Khuaihliti tlawmpalte ka teh caah ka mit au a fian ṭhan hi zoh tuah ngat u. 30Mi hna nih hin, an ral hna hranchaw an hmuhmi hi, nihin ah hin heh tiah ei ko hna seh law, zeitluk in dik a hei ṭhat deuh hnga; cucaah cun pei Filistin mi hi tampi kan thah khawh hna lo hi,” tiah a ti.
31Cu ni ah cun Mikmash in Aijalon tiang Filistin mi cu an thah len hna. Cun mi cu an buhri ngaingai; 32mi hna nih cun hranchaw kha an zuanhnawh hna i tuu hna le cawtum hna le cawfa hna kha an lak hna i vawlei ah an thah hna i mi nih cun an thisen he an ei chih hna. 33Cun Saul kha an chimh i, “Zohhmanh, mi nih thisen an einak thawng in Bawipa sinah an sual cang,” tiah an ti. Cun anih nih, “Nannih nih hlennak in nan tuah cang; hika ah hin keimah sinah lungpi pakhat in rak hril tuah u,” tiah a ti. #Gen 9.4; Lev 7.26-27; 17.10-14; 19.26; Deu 12.16,23; 15.23 34Cun Saul nih, “Mizapi sinah khan vaa ṭhek u law, annih cu, ‘Mi kip nih an cawtum siseh, an tuu siseh, rak i put cio hna seh law, hika ah hin that hna seh law, ei hna seh; cun thisen ei chihnak thawngin Bawipa sinah sual hlah u,’ tiah chim hna u,” tiah a ti. Cucaah mi kip nih cu zan ah cun an cawtum cio kha an rak i put i khika ah an thah hna. 35Cun Bawipa caah Saul nih biakṭheng pakhat a sak; mah cucu Bawipa ca i a sak hmasa bikmi biakṭheng a si.
36Cun Saul nih, “Zan ah Filistin mi cu vung dawi hna u si law, zinglei khuadei tiang vung hrawk hna u sih; mi pakhat hmanh vung ngan hna hlah u sih,” a ti. Cun annih nih, “A ṭha tiah na ruahmi paoh cu tuah ko,” tiah an ti. Sihmanhsehlaw tlangbawi nih, “Hika ah hin Pathian naih rih tuah u sih,” tiah a ti. 37Cun Saul nih Pathian cu a hal i, “Filistin mi cu ka vung dawi hna lai maw? Annih cu Israel mi hna kut chungah na pe hna lai maw?” tiah a ti. Sihmanhsehlaw khi ni ah cun amah cu a let lo. 38Cun Saul nih, “Hika ah hin ra tuah u, mizapi a hruaitu hna nan dihlak in; cun hi sualnak hi zeitindah nihin ah a thawh ti kha hngal u law, hmu tuah u. 39Zeitintiah Israel a khamhtu Bawipa nih a nun bangin, ka fapa Jonathan chungah a um a si hmanh ah, a thi hrimhrim lai,” tiah a ti. Sihmanhsehlaw mi vialte lakah cun amah a hun lettu pakhat hmanh an um lo. 40Cun Israel mi vialte sinah cun, “Nannih cu kam khat ah nan um lai i keimah le ka fapa Jonathan cu kam khat ah kan um lai,” tiah a ti. Cun mi zapi nih Saul cu, “A ṭha tiin na ruahmi cu tuah ko,” tiah an ti. 41Cucaah Saul nih, “Maw Bawipa, Israel Pathian, zeicahdah nihin cu na sal kha na ka leh lo? Hi mawhnak cu keimah chungah siseh, ka fapa Jonathan chungah siseh, a um a si ahcun, maw Bawipa, Israel Pathian, Urim langhter; sihmanhsehlaw hi mawhnak cu na mi Israel mi chungah a um a si ahcun, Thummim langhter,” tiah a ti. Cun Jonathan le Saul cungah khan a tla i mizapi kha cu an luat. #Nam 27.21; 1Sam 28.6 42Cun Saul nih, “Keimah le ka fapa Jonathan cungah khan camcawhnak cu tuah u,” tiah a ti i Jonathan cungah khan a tla.
43Cun Saul nih Jonathan cu, “Zeidah na rak tuah, ka chim tuah,” tiah a ti. Cun Jonathan nih amah cu, “Ka kut in kaa putmi ṭhiangṭhunh par in khuaihliti tlawmte ka teh; hika ah ka um ko hih, ka thi ko lai,” tiah a ti. 44Cun Saul nih, “Pathian nih ka cungah cu bantukin le cu nak tam deuh zongin, tuah ko seh; na thi hrimhrim ko lai, Jonathan,” tiah a ti. 45Khi tikah mizapi nih Saul sinah cun, “Israel chungah hi teinak nganpi a tuahtu Jonathan cu maw a thi hnga? Naisai hlah! Bawipa a nun bangin, a lu cung a samfa fa khat hmanh vawlei ah a tla lai lo; zeicahtiah nihin ah Bawipa he pei an tuah ṭi leh hi,” tiah an ti. Cuticun mizapi nih Jonathan cu an tlanh; cucaah a thi lo. 46Cun Saul nih Filistin mi a dawi hna cu a kirtak i Filistin mi cu anmah umnak hmun ah khan an kal. 47Saul nih Israel mi siangpahrang a can tikah a kenkip i a ummi a ral vialte, Moab mi, Ammon mi, Edom mi Zobah siangpahrang hna le Filistin mi hna kha a doh hna; a va fuhmi paoh cu a tei lengmang hna. 48Cun ralṭha ngaiin a tuah i Amalek mi kha a tuk hna i Israel mi cu a roktu hna kut chung khan a luatter hna.
49Cun Saul fapa hna cu Jonathan, Ishvi le Malkhishua an si; cun a fanu pahnih hna an min cu mah hihi an si: upa deuh min cu Merab, cun a ngakchia deuh min cu Mikhal; 50cun Saul nupi min cu Ahinoam a si, amah cu Ahimaaz fanu a si. Cun a ralkapbu haotu min cu Abner a si, amah cu Saul pa unau Ner i fapa a si. 51Saul pa cu Kish a si, cun Abner pa Ner cu Abiel fapa a si.
52Saul chan chung vialte cu Filistin mi kha fak piin an doh hna cun Saul nih pa ṭhawng siseh, pa ralṭha siseh, a hmuhmi paoh cu amah sinah a fonh chih lengmang hna.
Currently Selected:
1 SAMUEL 14: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
