1 SAMUEL 11
11
Saul Nih Ammon Mi Kha A Tei Hna
1Khi caan ah Ammon mi Nahash cu a hung kal i Jabesh-gilead kha a dum; cun Jabesh-gilead khuami vialte nih cun, “Kanmah he biahrennak ser law, na rian kan ṭuan lai,” tiah an ti. 2Sihmanhsehlaw Ammon mi Nahash nih cun annih cu, “Nan orhlei mit kan khoih dih hna i cuticun Israel mi vialte cungah ningzah hmaichiatnak ka tlunter bel ah, nannih sinah hnatlaknak cu ka tuah hnga,” tiah a ti. 3Jabesh upa hna nih cun a sinah, “Kannih nih Israel ram chung vialte ah lamkaltu kan thlah hna nakhnga, ni sarih in kan ngang rih tuah. Khi tik i ahohmanh a kan khamhtu an um lo ahcun nangmah sinah kanmah tein kan i pe ko lai,” tiah an ti. 4Lamkaltu hna cu Saul khua Gibeah i an rat tikah mi hna theih ah cu kong cu an chim i mi vialte cu thang piin an ṭap dih.
5Saul cu cawtum kha a hun zul hna i loin a hung tlung; cun Saul nih, “Mi hna hi an zeidah a ti i an ṭah?” tiah a ti. Cucaah Jabesh khuami hna thawngpang kha an chimh. 6Cun hi bia kha Saul nih a theih tikah Pathian thlarau cu Saul cungah hmual fak piin a tlung i fak piin a thin a hung. 7Cawtum khuah khat kha aa lak hna i a can cikcek hna i lamkaltu hna kut in Israel ram chung vialte ah a kuat dih hna i, “Saul le Samuel zulh awkah a chuak duh lo paoh cu a cawtum hna cungah hi bantukin tuah a si lai!” tiah a ti. Khi tikah Bawipa ṭihnak kha mi cungah khan a tlung i annih nih mi pakhat bantukin an chuak. 8Bezek ah a pumh hna tikah, Israel mi cu sing thum an si i Judah mi cu sang thum an si. 9Cun a rami lamkaltu hna sinah cun, “Jabesh-gilead mi sinah cun hi bangin nan va chim lai: ‘Thaizing ni a hung linh vuaimai tikah khin, luatnak nan hmu lai,’ tiin,” tiah a ti. Lamkaltu hna kha an rat i Jabesh mi hna kha an chimh tik hna ah, an lung aa lawm. 10Cucaah Jabesh mi hna nih cun, “Thaizing ah nan sinah kanmah tein kan hun i pe lai, nannih nih a ṭha nan tining paoh in kan cungah nan tuah ko lai,” tiah an ti. 11Cun a thaizing ah Saul nih mi kha phu thum ah a ṭhen hna i zinglei ven caan ah khin riahhmun chungah khan an lut i chun ni linh tiang Ammon mi kha an sam hna, cun a nung rihmi cu an i ṭhek dih i cucaah pahnih in a um ṭimi an um lo.
12Khi tikah mi nih Samuel sinah khan, “Ahodah, ‘Saul nih cun maw a kan uk hnga?’ a titu kha an si. Kan thah hna nakhnga, rak chuah tuah hna,” tiah an ti. 13Sihmanhsehlaw Saul nih, “Nihin ah cun ahohmanh thah a si lai lo, zeicahtiah nihin ah hin Bawipa nih Israel mi lakah luatnak a ser,” tiah a ti. 14Cun Samuel nih mizapi hna cu, “Ra u, Gilgal ah kal u si law, pennak kha tharchuah u sih,” tiah a ti hna. 15Cucaah mi vialte cu Gilgal ah an kal i khika ah, Gilgal khua ah cun, Saul cu Bawipa hmaiah siangpahrang ah an ser. Khika ah Bawipa hmaiah daihnak thawinak kha an thawi i khika ah Israel mi vialte le Saul cu a tampi an i lawm.
Currently Selected:
1 SAMUEL 11: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
