1 KORIN 16
16
Khrihfa U le Nau Hna Ca I Thawhlawm
1Judea ram i a ummi Pathian mi hna bawmhnak ca i phaisa thawh awk timi kong ah khan, Galatia khrihfabu ka chimhmi hna kha rak tuah ve u. #Rom 15.25-26 2Zarhpi ni fate in, nan hmuhmi a tlawm a tam ning cio khan phaisa nan rak thawh lai i nan rak khon lai, ka rat tikah phaisa khawlh herh ti lo dingin, 3ka rat tikah nanmah hnatlami kha Jerusalem khua i nan laksawng cu hei phorh awkah ca he ka thlah hna lai. 4Cun keimah kal zong a ṭha lai ti a si ahcun, keimah he cun hmunkhat ah kan kal hna lai.
Paul Khualtlawn Timhnak
5Masidonia ram kha ka tanpah lai caah Masidonia ram ka tlawn dih cun nan sinah ka ra lai.#Lam 19.21 6Sau nawn nan sinah ka cam kho hmanh maw, khuasik chung cu ka cam men lai, cu hnuah cun ka tlawnnak cu khuazei lei a si hmanh ah, ka tlawnnak ah cun nan ka bawmh te lai. 7In palpah hna men cu kaa lungsi hnga lo. Bawipa nih a ka onh ahcun nan sin i sau nawnpi cam ka duh.
8Asinain Efesa khua ah hin Pentekos ni tiang ka um lai. 9A ka dohtu tampi an um nain hika ah hin rianṭuannak caan ṭha ngai a um.
10Timote kha nanmah lei i a rat sual ahcun ṭha tein rak conglawmh u, amah cu keimah bantukin Bawipa ca i rian a ṭuanmi a si. 11Ahohmanh nih rak zohchuk hlah u. Kan hawile hna he amah cu kan rak hngah ko caah lunglawm tein ka sinah run thlah u.
12Cun kan unau Apollo cu, kan hawi dang hna le nanmah tlawn kha ka forh lengmang, asinain atu ah cun a si thiam rih lai lo tiah a ruah. Caan rem a hmuh tikah a ra te lai.
Donghnak Biacah
13Lungfim tein um u, nan zumhnak ah khan fek tein dir u, ralṭha in um u law thazang ṭhawng in um u. 14Nan tuahmi thil paohpaoh kha dawtnak in va tuah u.
15Stefanas le a innchungkhar kha nan hngalh hna; anmah cu Grik ram chungah Khrihfa a cang hmasa bik an si i Pathian mi hna ca rianṭuan awkah aa pemi an si. Ka u le ka nau hna, 16hi bantuk mi hna le anmah he rian a ṭuan ṭimi hna hruainak kha va zul u.
17Stefenas le Fortunatus le Akhaiku an rat caah ka lung aa lawm, nan um lo hmanh an ka philhter. 18Nanmah nan tha an in nuamter hna bantukin kei zong ka tha an ka nuamter ve. Anmah bantuk minung hi kan thangṭhat hna awk a si.
19Asia ram chung i a ummi khrihfabu nih nan kut an in tlaih hna; Akuila le Prisilla le an inn i aa pummi khrihfabu nih nan kut an in tlaih hna. 20Hika i a ummi unau vialte nih nan kut an in tlaih hna.
Pakhat le pakhat a thiangmi kuttlaihnak in i biachawn u. 21Paul nih nan kut kan tlaih hna ti hi ka kut hrimhrim in ka ṭial hih.
22Bawipa a daw lomi cu an cungah chiat si ko seh. Maranatha — Kan Bawipa, ra cang ko!
23Bawipa Jesuh vel cu nan cungah um ko seh.
24Khrih Jesuh thawngin kan dawt hnanak cu, nan dihlak cungah um ko seh. Amen.
Currently Selected:
1 KORIN 16: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006