යෝෂුවා 11
11
උතුරේ රජුන් පැරදවීම
1හාසොර්හි රජු වූ යාබීන් ඒ වග ඇසූ කල, ඔහු මාදොන්හි රජු වූ යෝබාබ්ට ද ෂිම්රෝන්හි රජුට හා අක්ෂාෆ්හි රජුට ද 2උතුරු දිග කඳු රටේත්, කින්නෙරෙත්ට දකුණින් පිහිටි අරාබාහි, බටහිර කඳු බෑවුමේ, බටහිර නාෆොත්-දෝර්හි#11:2 නාෆොත්-දෝර්හි එනම් දෝර් කඳුකරය රජුන්ට ද 3පෙර-අපර දෙදිග කානානිවරුන්ට ද කඳුකරයේ සිටි අමෝරිවරුන්ට, හිත්තිවරුන්ට, පෙරිස්සිවරුන්ට හා කඳුකරයේ යෙබූසිවරුන්ට ද හෙර්මොන් කන්දට පහළින් මිස්පා පළාතේ සිටි හිවීවරුන්ට ද පණිවුඩ යැවී ය. 4එවිට තම සේනාංක සියල්ල, අශ්වයින් හා යුධ රථ අති විශාල වශයෙන් ගෙන, පිටත් ව ආ ඔවුන් මුහුදු වෙරළේ වැලි මෙන් ගණන් කළ නො හැකි තරම් මහ හමුදාවක් විය. 5ඉශ්‍රායෙල්ට එරෙහිව යුද්ධ වදින්නට මේ සියලු රජවරු තම සේනාංක ඒකාබද්ධ කොට, මේරොම් ජලය අසල කඳවුරු බැඳ ගත්හ.
6එවිට ස්වාමින්වහන්සේ යෝෂුවා අමතා, “ඔවුන්ට භය නො වන්න; මන්ද හෙට මේ වෙලාවට මරා දමනු ලැබ, ඉශ්‍රායෙල් අතට ඔවුන් සියල්ලන් හසුකර දෙන්නෙමි; ඔබ ඔවුන්ගේ අශ්වයින්ගේ කලවා නහර කපා, ඔවුන්ගේ රථ ගින්නෙන් පුලුස්සා දැමිය යුතු යැ” යි කී සේක.
7එබැවින් යෝෂුවා හා ඔහුගේ මුළු යුධකාමී සේනාව, මේරොම් ජලය අසලදී හදිසියේ ම ඔවුන් පිට කඩා වැදුණේ ය. 8ස්වාමින්වහන්සේ ඉශ්‍රායෙල් අතට ඔවුන් යටත් කර දුන් සේක. ඔවුහු ඔවුන්ට පහර දෙමින්, මහ සීදොන් දක්වා ද මිස්රෙෆොත්-මයිම් තෙක් දුරට පෙරදිගින් මිස්පේ මිටියාවත තෙක් දුරට ද කිසිවකු ඉතිරි නො වන තුරු ඔවුන් හඹා ගියහ. 9යෝෂුවා තමාට ස්වාමින්වහන්සේ අණ කර තිබූ පරිදි ඔවුන්ට කර, ඔවුන්ගේ අශ්වයින්ගේ කලවා නහර කපා, ඔවුන්ගේ රථ ගින්නෙන් පුලුස්සා දැමී ය.
10එකල්හි යෝෂුවා ආපසු හැරී, හාසොර් අල්ලාගෙන, එහි රජු කඩුවෙන් ගසා හෙළී ය. ඉහතදී මේ රාජධානි සියල්ලට ම ප්‍රධාන ව තිබුණේ හාසොර් ය. 11ඔවුහු එතුළ සිටි සියල්ලන්ට කඩු මුවහතින් පහර දී, හුස්ම ඇති කිසිවකු ඉතිරි නො කොට, ඔවුන් සහමුලින් විනාශ කර දැමූහ#11:11 ඔවුන් සහමුලින් විනාශ කර දැමූහ එනම් ඔවුන් සහමුලින් විනාශයට කැප කළහ 12, 20 හා 21 පදයන් ද එසේ ම ය.. ඔහු හාසොර් ගින්නෙන් පුලුස්සා දැමී ය.
12යෝෂුවා ඒ සියලු රාජකීය පුරවර හා ඔවුන්ගේ රජවරුන් අල්ලා, ඔවුන් කඩු ගා දැමී ය. ස්වාමින්වහන්සේගේ සේවක මෝසෙස් අණ කර තිබූ පරිදි, ඔහු ඔවුන් සහමුලින් විනාශ කර දැමී ය. 13එහෙත් යෝෂුවා විසින් පුලුස්සන ලද හාසොර් හැර, ගොඩැලි පිට ඉදිකර තිබූ කිසි පුරවරයක් ඉශ්‍රායෙල්වරුන් පිළිස්සුවේ නැත. 14ඉශ්‍රායෙල්වරු එපුරවරයන්හි වස්තුවත්, සත්ව සම්පතත් කොල්ලය වශයෙන් තමන්ට ම ගත්හ. එහෙත් හුස්ම ඇති කිසිවකු ඉතිරි නො වන ලෙස ජනයාට කඩු මුවහතින් පහර දුන් ඔවුහු, ඔවුන් සහමුලින් විනාශ කර දැමූහ. 15ස්වාමින්වහන්සේ ස්වකීය සේවක මෝසෙස්ට අණ කළේ යම් සේ ද, එසේ ම මෝසෙස් යෝෂුවාට අණ කළේ ය. යෝෂුවා ඒ අනුව කළේ ය; ස්වාමින්වහන්සේ මෝසෙස්ට අණ කළ සියල්ලෙන් කිසිවක් යෝෂුවා ඉටු නො කර සිටියේ නැත.
16මෙසේ යෝෂුවා මුළු දේශය ම අත්කර ගත්තේ ය. එනම් කඳුකරය හා මුළු නෙගෙබ් පළාත, මුළු ගෝෂෙන් දේශය, බටහිර කඳු බෑවුම්#11:16 බටහිර කඳු බෑවුම් හෙබ්‍රෙව් ෂෙෆේලා හා අරාබා, ඉශ්‍රායෙල් කඳුරට හා එහි කඳු බෑවුම්; 17සේයිර් දෙසට විහිදී යන හාලක් කන්ද පටන් හෙර්මොන් කන්දට පහළ ලෙබනොන් මිටියාවතේ බාල්-ගාද් දක්වා දේශය ද වේ. ඔවුන්ගේ රජවරුන් හැම අල්ලා ගත් ඔහු ඔවුන් ගසා හෙළමින්, මරා දැමී ය. 18යෝෂුවා ඒ රජවරුන්ට එරෙහිව දිගු කලක් යුද්ධ කළේ ය. 19ගිබෙයොන්හි හිවීවරුන් හැර, ඉශ්‍රායෙල්වරුන් හා සාමයට ආ අන් කිසි පුරවරයක් නො වී ය. ඔවුහු ඒ සියල්ල අත්පත් කර ගත්තේ යුද්ධ කිරීමෙනි. 20මන්ද ස්වාමින්වහන්සේ මෝසෙස්ට අණ දී තිබූ ලෙස දයාවෙන් තොර ව, ඔවුන් සහමුලින් විනාශ කරනු ලබන පිණිස, ඉශ්‍රායෙල්ට එරෙහිව යුද්ධ කරන්නට ඔවුන්ගේ හදවත් දැඩි කරන ලද්දේ ස්වාමින්වහන්සේ විසිනි.
21එකල යෝෂුවා අවුත්, කඳුකරයෙන්, හෙබ්‍රොන් වෙතින්, දෙබීර් වෙතින් හා අනාබ් වෙතින් ද යූදාහි මුළු කඳු රටින් ද ඉශ්‍රායෙල්හි මුළු කඳු රටෙන් ද අනාක්වරුන් අතු ගා දැමී ය. යෝෂුවා සහමුලින් ඔවුන් විනාශ කර දැමුවේ, ඔවුන්ගේ නගර ද සමඟ ය. 22ඉශ්‍රායෙල් දේශ සීමාව තුළ අනාක්වරු එක් කෙනෙක්වත් ඉතිරි ව සිටියේ නැත. එහෙත් ගාසා, ගාත් හා අෂ්දෝද්හි පමණක් ඇතමෙක් ඉතිරි ව සිටියහ.
23මෙසේ ස්වාමින්වහන්සේ මෝසෙස්ට පවසා තිබූ පරිදි යෝෂුවා මුළු දේශය ම අල්ලාගෙන, ඔවුන්ගේ ගෝත්‍රවල බෙදුම්වලට අනුව ඉශ්‍රායෙල්ට උරුමයක් කොට, එය බෙදා දුන්නේ ය. ඉන්පසු යුද්ධය නැවතී දේශයට විශ්‍රාමය ලැබිණ.
Currently Selected:
යෝෂුවා 11: SCV
Highlight
Share
Copy
Want to have your highlights saved across all your devices? Sign up or sign in
Holy Bible, Sinhala Contemporary Version™ | © 1980, 1991, 1994, 2011, 2020, 2025 by Biblica, Inc. | Used with permission. All rights reserved worldwide.
