ද්විතීය 33
33
ගෝත්‍ර මත මෝසෙස්ගේ ආශිර්වාද
1දෙවියන්වහන්සේගේ මනුෂ්‍යයා වූ මෝසෙස්, තම මරණයට කලින් ඉශ්‍රායෙල් ජනයාට ප්‍රකාශ කළ ආශිර්වාද මෙසේ වෙයි:
2“ස්වාමින්වහන්සේ සීනයි සිට ආ සේක.
සේයිර් සිට ඔවුන්ට උදා වූ සේක.
පාරාන් කන්දේ සිට බැබළුණු සේක.
දකුණේ තම කඳු බෑවුම්හි සිට
උන්වහන්සේ දස දහස් ගණන් ශුද්ධවතුන් සමඟ ආ සේක.
3ඇත්තෙන් ම ජනයන්ට ප්‍රේම කරන තැනැත්තාණන් ඔබ ය.
සියලු ශුද්ධවතුන් ඔබ අතේ ය.
ඔබ පාමුල ඔවුහු වැඳ වැටෙති;
ගුරු උපදෙස් ඔබෙන් ලැබ ගනිති.
4ඒ උපදෙස්, යාකොබ්ගේ සභා උරුමය ලෙස,
මෝසෙස් අපට දුන් නීතියයි.
5ඉශ්‍රායෙල් ගෝත්‍ර වංශ සමඟ
ජන නායකයින් එක් රැස් වූ කල
උන්වහන්සේ යෙෂුරූන්ගේ රජු වූ සේක.
6“රූබෙන් ජීවත් වේවා; නො නසීවා!
ඔහුගේ ජනයා අල්ප නො වේවා#33:6 අල්ප නො වේවා හෙබ්‍රෙව් ස්වල්ප දෙනෙක් වේවා!!”
7ඔහු යූදා ගැන කතා කරමින්:
“අහෝ ස්වාමින්වහන්ස, යූදාට සවන් දුන මැනවි;
තම ජනයා වෙත ඔහු ගෙන ආ මැනවි.
තම අත්වලින් ම තම රැකවරණය සලසා ගන්නා ඔහුට,
ඔහුගේ සතුරනට එරෙහිව ඔහුගේ පිහිට වුව මැනවි” යි
කීවේ ය.
8ඔහු ලෙවී ගැන කතා කරමින්:
“ඔබගේ තුම්මීම් හා ඌරීම් අයිති
ඔබට කැප වූ මිනිසාට ය.
මස්සාහිදී ඔබ ඔහු පිරික්සූ සේක.
මෙරීබා ජලය අසලදී ඔබ ඔහු හා විවාද කළ සේක.
9තම පියා හා මව ගැන ඔහු කීවේ,
‘ඔවුන් ගැන මම නො සලකමි’ කියා ය;
ඔහු තම සොහොයුරන් හැඳින ගත්තේ නැත;
තමාගේ ම දරුවන් පිළිගත්තේ නැත;
එහෙත් ඔබේ වචනය රක්ෂා කළ ඔහු
ඔබේ ගිවිසුම සුරැකී ය.
10ඔබගේ නියමයන් යාකොබ්ටත්,
ඔබගේ ව්‍යවස්ථාව ඉශ්‍රායෙල්ටත් උගන්වන්නේ ඔහු ය;
ඔබ අබියස සුවඳ දුම් පුදන්නේත්,
ඔබේ පූජාසනය පිට මුළු දවන යාග ඔප්පුකරන්නේත් ඔහු ය.
11ආශිර්වාද කළ මැනවි, ඔහුගේ සියලු නිපුණතාවනට අහෝ ස්වාමින්වහන්ස,
ප්‍රිය වුව මැනව, ඔහුගේ අත්වල වැඩට;
පහර දුන මැනව, ඔහුට එරෙහිව නැගී සිටිනවුන්ගේ තුනටියට,
යළි නො නැගිටින තුරු ඔහුගේ සතුරනට” යි
කීවේ ය.
12ඔහු බෙන්යමින් ගැන කතා කරමින්:
“ස්වාමින්වහන්සේගේ ප්‍රේමණීයයා උන්වහන්සේ තුළ සුරැකි ව වාසය කරත්වා;
දවස පුරා උන්වහන්සේ ඔහු සුරකින සේක.
ස්වාමින්වහන්සේ ප්‍රේම කරන්නා, උන්වහන්සේගේ උරහිස් අතර වාසය කරතැ” යි පැවසී ය.
13ඔහු යෝසෙප් ගැන කතා කරමින්:
“ඉහළ අහසේ අනගි පින්නෙන් ද
පහළ තිබෙනා ගැඹුරු ජලයෙන් ද
ස්වාමින්වහන්සේ ඔහුගේ භූමියට ආශිර්වාද කරන සේක්වා.
14හිරු උපද්දන හොඳ ම පලදාව ද
මාස-සෘතුවල හොඳ ම අස්වැන්න ද
15ඉපැරණි කඳුවල අගනා ම ත්‍යාග ද
සදාතන කඳුගැටවල සාරවත් භාවය ද
16භූමියේ අනගිතම ත්‍යාග හා එහි පූර්ණත්වය ද
දැවෙන පඳුරේ වැඩ හිටි තැනැන්වහන්සේගේ ප්‍රසාදය ද යන සියල්ල
යෝසෙප්ගේ හිස මත, තම සහෝදරයන් අතර
වෙන් ව සිටි තැනැත්තාණන්ගේ නළල මත රඳා පවතීවා.
17තේජසින් ඔහු කුලුඳුල් ගවයකු වැන්න;
ඔහුගේ අං කුළු හරකකුගේ අං වෙයි.
ඒවායින් ඔහු ජාතීන්ට,
පොළෝ කෙළවරේ වූ ජාතීන්ට පවා අනිනු ඇත.
එප්‍රායිම්ගේ දස දහස් ගණන් එබඳු අය ය.
මනස්සේගේ දහස් ගණන් එබඳු අය ය” යි
කීවේ ය.
18ඔහු සාබුලොන් ගැන කතා කරමින්:
“සාබුලොන්, ඔබ පිටත් ව යන විට ප්‍රීති වන්න.
ඉස්සාකර්, ඔබේ කූඩාරම්වල ප්‍රීති වන්න.
19ඔවුන්, කන්දට ජනයා කැඳවා,
දමිටුකමේ පූජා එහිදී ඔප්පු කරනු ඇත.
සමුද්‍රවල බහුලත්වයෙන් ද වැල්ලෙහි සැඟවුණු සම්පතින් ද
ඔවුන් සමෘද්ධිමත් වනු ඇතැ” යි
පැවසී ය.
20ඔහු ගාද් ගැන කතා කරමින්:
“ප්‍රශංසා වේවා ගාද්ගේ බල ප්‍රදේශය පුළුල් කරන තැනැන්වහන්සේට.
ගාද් සිංහයකු සේ වෙසෙමින්,
බාහුව හා හිස ඉරා දමයි,
21හොඳ ම බිම් කොටස ඔහු තමාට තෝරා ගත්තේ ය.
නායකයාගේ පංගුව ඔහු වෙනුවෙන් වෙන් කර ඇත.
ජන නායකයින් එක් රැස් වූ කල,
ඉශ්‍රායෙල් ජනයාට අදාළ ස්වාමින්වහන්සේගේ ධර්මිෂ්ඨ කැමැත්ත ද
උන්වහන්සේගේ විනිශ්චයන් ද ඔහු ඉටු කළේ යැ” යි
පැවසී ය.
22ඔහු දාන් ගැන කතා කරමින්:
“බාෂාන් වෙතින් පැන එන
සිංහ පැටවෙකි දාන්” යැයි පැවසී ය.
23ඔහු නෆ්තලී ගැන කතා කරමින්:
“ස්වාමින්වහන්සේගේ ප්‍රසාදයෙන් අගපත් ව සිටින නෆ්තලී
උන්වහන්සේගේ ආශිර්වාදයෙන් පිරී සිටී.
විල#33:23 විල එනම් ගලීලයේ මුහුද දක්වා දකුණු දෙස ඔහු හිමි කර ගනී” යි
පැවසී ය.
24ඔහු, ආෂෙර් ගැන කතා කරමින්:
“පුතුන් අතර වඩා ම ආසිරිලද්දා ආෂෙර් ය.
තම සහෝදරයින්ගේ ප්‍රසාදය ඔහුට ලැබේවා.
ඔහු තම පා තෙලින් නහවා ගනීවා.
25ඔබේ දොරටු-අගුල් යකඩ හා ලෝකඩ වනු ඇත.
ඔබේ සවිය, ඔබේ දවස් හා සම වනු ඇත.
26“ඔබේ පිහිටට අහසේ නැගී යන්නා වූ,
තම තේජසින් වලාකුළු පිට නැගී යන්නා වූ
යෙෂුරූන්ගේ දෙවියන්වහන්සේට සමාන අන් කෙනකු නැත.
27සදාතන දෙවියන්වහන්සේ ඔබේ සරණයයි.
සදාතනික බාහු ඔබට යටින් තිබේ.
උන්වහන්සේ ඔබේ සතුරන් ඔබ ඉදිරියෙන් පන්නා දමන්නේ,
‘ඔහු වනසනු’ කියමිනි.
28මෙසේ, ඉශ්‍රායෙල් ජනයා සුරැකි ව වෙසේ.
අහසින් පිනි වැටෙන,
ධාන්‍ය සහ අලුත් මිදි යුෂ ඇති දේශයෙහි
යාකොබ්ගේ උල්පත සුරක්ෂිත ය.
29එම්බා ඉශ්‍රායෙල්,
ස්වාමින්වහන්සේ ගැලවූ ජනතාව වන
නුඹලාට හා සමාන අන් කවුරු ද?
ඔබේ පලිහ ද උපකාරකරුවාණන් ද
ඔබගේ මහිමවත් අසිපත ද උන්වහන්සේ ම ය.
ඔබේ සතුරන් ඔබ ඉදිරියේ භයින් හැකිළෙනු ඇත.
ඔවුන්ගේ උස් තැන්වල වූ පුදසුන් ඔබ පයින් පාගා දමනු ඇතැ” යි
පැවසී ය.
Currently Selected:
ද්විතීය 33: SCV
Highlight
Share
Copy
Want to have your highlights saved across all your devices? Sign up or sign in
Holy Bible, Sinhala Contemporary Version™ | © 1980, 1991, 1994, 2011, 2020, 2025 by Biblica, Inc. | Used with permission. All rights reserved worldwide.
