Teu Maan Caoh 26

Paul upz khraez toz daehz

1Khunz Akrippa daz Paul nahz, “Mih upz khraez toz daehz a wa bawnz.” Paul kaw plaez tihz daehz rae daz,

2“Khunz Akrippa aez, ohz seuz boh kawp daz bawnz khraez toz daehz aacz ngaai khunz an ihz Yio keui maap ohz ne. 3Tahz ehz naeh ihz mas rak rak thungz Yio boh lawng an kai teur thiangz keui hacz aamz. Kawp ceun diz rae mok phawmz hanz hanz teuk ngarz ohz eunz.

4Ihz Yio hacz aamz keui mas boh lawng ohz thaz meuz ohz kyehz. Keuh mas boh reung moh reung suamz ohz, ti keut ohz boh tuhz weng Yerusalem. 5Beuk keuh sunz daz lawng ohz kaw keuh mas ohz a wa ceu nawhz baaiz lawng an ohz moh suamz naeh Pharise hawkz rae traz an Pharise keui tawiz kreuk baaiz kaw ohz a wa tawiz. 6An ohz talz ihz caetz daehz seu ni ne kawp daz traz mang keu tih Phraz Pen Caoh an mok kaai ihz keu daehz keu daepz ehz. 7Ehz seu kawlz aarz kheuz keui kaw tam phawmz pao Phraz Pen Caoh rae ehz koz kwaai mawn seuk ngih teuk bimz. Khunz mawh myaat aez, kawp mang ceun diz rae ihz Yio keui maap ohz. 8Cih naehz lah pehz thaang nam rak seum yum an Phraz Pen Caoh aez ihz yam meu rae imz a?

9Toz ohz kaw a wa yum, rak seum cih khatz klawhz ceu klawhz meoz kaai mus Tahz Yesuhz ihz weng Nasaret. 10Ohz a wa cih ceun diz tuhz weng Yerusalem. Ohz leh a na tawz beunz caangz keui rae leh ihz yum yam keui sapz tuhz thang. Meuz piamz keuh kaw ohz prawm boh. 11Ohz aez taam keuh nahz heungz laehz baaiz tawiz crawp rawz traz keui rae cih aez keuh upz pleung Phraz Peh Caoh. Ohz mok phawmz keu nakz tamz rae khahz lan tawiz weng nawk prih ne khahz pae suamz keuh.

Paul krai lawng daehz plaak plaai

(Teu Maan Caoh 9:1-19, 22:6-16)

12Ohz aanz ceun diz ne leh a na tawz beunz caangz keui rae ohz lan weng Damaskas. 13Khunz mawh myaat aez, kraao seu ngihz keun cang ne ohz awlz an thaangz lang plengz aasz thaangz lak seu ngihz ne keum yaamz wit ohz boh ihz an lan tawiz ohz. 14Ehz hacz aamz taz tuhz keu tehz. Ohz ngarz leh mony Hebre daz, ‘Saul, Saul kawp naehz mih pae suamz ohz a? Mih cih teuk suhz mial daehz deuiz tang meuk patz sapz kawn pacz tahz daehz.’ 15Ohz kaw maanyz, ‘Tahz, Mih naeh yaeh lah?’ Tahz an diz kaw daz, ‘Ohz naeh Yesuhz an mih pae suamz eu. 16Keuiz daz rawi ceng raez. Ohz paw truz khaanz aez mih cih kuanz leng Ohz boh ihz krai plaez lawng Ohz. Mih bawnz krai plaez ihz nahz lawng an mih awlz Ohz meu ni boh lawng an Ohz ngaz lao plaez thaengz aarz ngaai keui. 17Ohz cih aez mih lawt thaz kheuz daehz boh thaz kheuz an nam anz Yio, Ohz cao mih khahz lan cu tawiz ti nam anz kheuz Yio. 18Aez mih lawk ngaai keuh rae aez keuh plaak plaai an bimz truz thaz an thaangz boh an moh tuhz a na Satan keui aez truz cu Phraz Pen Caoh. Kawp keuh yum Ohz rae Phraz Pen Caoh plawiz lawt reung dengz kawi keuh, saanyz rap keuh penz ihz Daehz.’

Paul siupz krai kaanz daehz

19Kawp ceun diz rae, khunz Akrippa aez, ohz teuk ngarz rak rak mony reu ma thaz kaang raaoz. 20Seun teungz ohz rawz aez ihz weng Damaskas, waaiz an diz rawz aez ihz weng Yerusalem rae ihz prih Yio tang prih boh kaai ihz an nam anz kheuz Yio. Ohz rawz aez keuh caanz reung dengz kawi daehz rae truz cu Phraz Pen Caoh, aez keuh moh ceun daehz a wa caanz. 21Kawp ceun diz kheuz Yio keui mat ohz tuhz wat rae kyaam piamz ohz. 22Keuiz daz Phraz Pen Caoh kawr ohz thonz taw seu ni, ohz yeung bawnz moh rae bawnz krai plaez tang kyehz tang mawh keui nahz. Ohz krai plaez keuh nahz lawng an ihz taangz phraz keui boh Moses lao mok an ngaz penz keui pan, 23lawng Tahz Khris ngaz bawnz talz tukz khahz peur teuk, naeh ihz an meu rae imz thaz reung dengz yam aacz ihz, aez an thaangz kaai kheuz Yio boh kaai ihz an nam anz kheuz Yio.”

24Meuz phangz hnhz yeung daz boh ne khunz Phestus raak daz Paul nahz, “Mih a wa reu waet, mih mawz peun lan rae a wa penz ihz reu waet.”

25Paul kaw mial daz, “Khunz myaat aez, ohz nam reu waet keuiz, ohz lao an anz an mawn keui. 26Khunz Akrippa mas boh lawng keu ni rae ohz yaak lao aacz ngaai tahz ehz. Ohz yum boh tahz ehz mas lawng keu ni. Kawp daz lawng keu ni penz tawiz ti seun tapz nam anz. 27Khunz Akrippa aez, anz tahz ehz yum mony reu ma ihz taangz phraz? Ohz mas boh tahz ehz yum.”

28Khunz Akrippa daz Paul nahz, “Mih thaang ohz ngaz penz Khrisian yoh yoh, kraao teur co ne hiuz?”

29Paul kaw mial daz, “Teur co se nam daz, ceu nawhz se nam daz ohz suz tawngz aez khunz boh ihz an teuk ngarz mony ohz keui, neuz lak mok thengz nuarz hirz keu ni rae aez naeh truz ceun ohz.”

30Meuz ceun diz khunz Akrippa boh khunz Phestus, tang naang Bernice boh ihz an keu dez kawmz keuh hacz aamz keui teur aacz daehz ceng. 31Keuh lae lan thaz a diz rae teur daz daehz nahz, “Hnhz an ni nam cih pleung, nam theukz aez taam thang boh taam yam.” 32Khunz Akrippa daz khunz Phestus nahz, “Khanz hnhz nam daz ngaz khaam caetz aacz ngaai khunz longz kaw a wa plawiz hnhz bawnz.”

Currently Selected:

Teu Maan Caoh 26: ril

Highlight

Compare

Copy