Teu Maan Caoh 20

Paul lan prih Makedoni boh prih Akhaia

1Waaiz ihz keui ronyz pras ne Paul raak teu paez keui teur cuhz aez keuh nahz keum rang, teur tak tang keuh kaw lan prih Makedoni boh. 2Hnhz khahz lan tawiz prih keu diz, leh mony traz aez teu paez keui nahz keum rang. Beuk a wa kaw hnhz lan prih Krik. 3Hnhz moh a diz ta waiz kiarz. Meuz hnhz ngaz tumz ceun luang lan prih Siria ne hnhz mas ihz Yio keui kyaam piamz daehz. Kawp ceun diz hnhz mial lan tawiz reung dengz Makedoni. 4Sopater an naeh kuanz Pirrus naeh ihz weng Berea, Aristarkhus kaar Sekundus naeh ihz weng Thessalonika, Kaius naeh ihz weng Derbe, Tichikus kaar Trophimus naeh ihz prih Asia boh Timothi keui lan tawiz Paul. 5Keuh lan aacz ehz rae ngawm boh weng Troas.

Paul lan weng Troas laehz thaz puatz dutz

6Meuz waaiz pawiz kaaiz mun nam sapz ceu ne, ehz tumz ceun luang lae thaz weng Philippi rae hacz hanz seu ngihz kaw phraeoz weng Troas, ehz moh a diz pulz seu ngihz.

7Meuz borz seu ngihz ceu ne ne ehz teur cuhz daehz aez daehz bawnz pekz kaaiz mun. Ceun kap siz ne Paul ngaz lae reung dengz rae rawz phraeoz taw khinz sawmz. 8Tuhz lukz raan lang kol ehz teur cuhz ne kleoz mok ngal ngawiz heungz baaiz. 9Ihz plung hawkz mus hnhz daz Eutikhus keu dez boh tuhz peu taengz ne. Meuz Paul yeung rawz ceu nawhz, hnhz baaiz yeung seum ceuk thanz paw reuk ngeut klaez tuhz keu tehz thaz kaang waiz raan thaz kol. Meuz ihz pumz leh hnhz ne paw a wa yam. 10Paul kaw cur leh toz daehz kawp sapz hnhz ngan leh daz ihz keui nahz, “Yak kawcz phawmz, hnhz yeung naeh boh.” 11Paul raw mial lang kaang, pekz suamz kaaiz mun kawmz keuh, reu ma thonz taw prih thaangz kaw lae lan. 12Keuh leh ihz plung an yeung maang phawmz weng kaang daehz rae sa phawmz baaiz.

Tae weng Troas taw weng Miletus

13Ehz tumz ceun luang lan weng Assos aacz Paul, pao saanyz aez hnhz tumz a diz, kawp hnhz seumz mok ne hnhz samz nuar tawiz pukz. 14Meuz hnhz awlz ehz tuhz weng Assos ne ehz nap hnhz tumz ceun luang lan weng Mitilene. 15Ehz tumz ceun luang lae truz thaz weng an diz ceun kap siz ne ehz phraeoz thaz tui klunz Kios. Ceun peuk dakz ne ehz phraeoz klunz Samos. Ceun peuk wak ne ehz phraeoz weng Miletus. 16Paul nam aanz deukz a weng Ephesus kawp daz hnhz nam sunz moh ceu nawhz tuhz prih Asia. Hnhz sunz treupz pawiz Pentekos tuhz weng Yerusalem rae, lan raamz rip.

Paul upz tak seumz ihz mawh cumz caoh weng Ephesus

17Keuiz daz Paul moh tuhz weng Miletus ne phuhz ihz lan raak ihz mawh cumz caoh tawz weng Ephesus, aez keuh truz cu daehz. 18Meuz keuh phraeoz truz ne Paul daz keuh nahz, “Pehz mas boh ohz moh suamz ceun nae seun teungz ohz phraeoz prih Asia taw ohz naeh kawmz pehz se se. 19Sangz daz kheuz Yio keui kyaam meukz, cih aez ohz kreuk, omz ngaai ohz lae kaw peun yawm phawmz daehz cih kaanz Caoh Phraz. 20Aez penz a keoz ta pehz ne ohz rawz nam kiutz mok naehz rae ohz rawz ohz sawnz peur lah ihz heungz boh tawiz kaang. 21Ohz paamz seu tih kaai kheuz Yio boh ihz an nam anz kheuz Yio keui nahz keuh bawnz caanz reung dengz kawi seuk weur cu Phraz Pen Caoh boh yum Tahz Yesuhz Khris. 22Seu ni ohz teuk ngarz mony Khuanz, ngaz lan weng Yerusalem, a diz ohz ngaz naeh seu naez kaw ohz maat mas. 23Keuiz daz an ohz mas samz, Khuanz Seu Ngamz a wa lao mok ohz tawiz klawhz weng daz, ohz ngaz klaez thang, ngaz talz tukz khahz peur teuk. 24Keuiz daz ohz ngaz cih wa wa kaanz an Tahz Yesuhz cao ohz, an naeh kaanz an krai reu oiz rak kez cuz Phraz Pen Caoh ne ohz nam plah tang phawmz daehz lawh.

25Teuk ngarz raez, ohz a wa krai pehz nahz reu oiz rak lawng prih Phraz Pen Caoh. Seu ni ohz mas tuhz pehz yaeh nam bawnz awlz thaengz ngaai ohz seu pawk leui. 26Kawp ceun diz meu ni ohz daz mawn pehz nahz, beuk ihz tuhz pehz seu hawkz hawkz ne luh sumz lan kaw, nam pa thaz ohz leui. 27Kawp daz ohz nam keun titz rae krai pehz nahz reung dawhz Phraz Pen Caoh hacz aamz. 28Kawp ceun diz pehz seu tih yawt mial toz daehz boh wungz soz an Khuanz Seu Ngamz Phraz khaanz mok pehz naeh ihz peur aacz. Damz cumz caoh an Tahz Yesuhz leh naamz Daehz yal mok. 29Ohz mas boh waaiz ohz praasz ne sohz ruk an raai kyaamz keui ngaz kut tuhz wungz pehz rae nam teur yawng wungz soz. 30Ihz teur ka an naeh tuhz pehz keui ngaz paw truz, upz suamz teu paez keui aez tawiz puatz daehz. 31Kawp ceun diz seu tih toz daehz. Tang tang mok an ohz omz ngaai lae sawnz aez klawhz ihz nam moh seuk ngih teuk bimz ta waiz wit.

32Seu ni ohz leh pehz aapz tuhz tihz Phraz Pen Caoh boh traz kez cuz Phraz Pen Caoh, an caang kaw raw pehz rae aez pehz bawnz caam a moi an Phraz Peh Caoh khriungz mok ta ihz seu ngamz Daehz keui nahz. 33Ohz nam khawiz ron khamz ihz boh kreung ihz. 34Pehz mas boh ohz leh tihz daehz cih kaanz, cih damz mial toz daehz boh bohz raen ohz. 35An ohz a wa cih klawhz meoz ne aez naeh ta pehz cih tawiz, naeh meoz kaanz an ohz khatz phawmz cih ta kawr ihz kreuk keui nahz. Pehz lo tang mony reu ma Tahz Yesuhz daz, ‘An aez ihz nahz ne bawnz reung dengz rak leuz lak an leh kaai ihz.’”

36A wa daz ceun diz kaw Paul seuk deumz kingz sangz kawmz keuh klawhz ihz rae suz tawngz. 37Keuh teur aacz daehz yaam, ngan hnhz, kuny hnhz. 38Keuh peun lengz lengz baaiz kawp Paul daz, keuh nam bawnz awlz thaengz hnhz seu pawk leui. Waaiz an diz keuh phuhz Paul phraeoz tawz ceun luang.

Currently Selected:

Teu Maan Caoh 20: ril

Highlight

Compare

Copy