Teu Maan Caoh 19

Paul phraeoz weng Ephesus

1Meuz Apollos yeung naeh weng Korin ne Paul panz lan tawiz pukz keui rae phraeoz truz weng Ephesus. Paul awlz teu paez teur ka tuhz weng an diz. 2Hnhz maanyz keuh daz, “Co pehz yum ne anz a wa rap Khuanz Seu Ngamz?” Keuh kaw daz,

“Ehz maat ti tang ngarz maang Khuanz Seu Ngamz lawh.”

3Paul kaw maanyz, “Beuk naeh ceun diz pehz leh teuk sruz naehz?”

Keuh kaw tawpz daz, “Ehz leh teuk sruz Yohn.”

4Paul kaw daz, “Teuk sruz Yohn naeh ta ihz caanz reung dengz kawi. Yohn rawz mok kheuz Israel keui daz, keuh lo yum Tahz an truz thaz puatz daehz, Hnhz naeh Yesuhz.”

5Meuz keuh ngarz ceun diz ne teur aacz daehz leh teuk sruz kaai mus Tahz Yesuhz.

6Meuz Paul leh tihz daehz taangz kaai keuh ne Khuanz Seu Ngamz cur truz kaai keuh. Meuz ceun diz keuh upz mony reu ma paw keunyz, teur aacz daehz rawz traz Phraz Pen Caoh. 7Keuh keu diz naeh kraao ihz seu kawlz aarz.

8Waaiz an diz Paul kut tuhz crawp rawz traz rae rawz yaak yaak ta waiz kiarz neuk neuk, teur upz tang keuh rae aez keuh kut phawmz lawng prih Phraz Pen Caoh. 9Keuiz daz ihz teur ka tiu rae nam sunz yum, saehz Laai Caoh Phraz aacz ngaai ihz. Kawp ceun diz Paul praasz thengz keuh, hnhz raak leh an naeh teu paez keui khawz khawz rae sawnz aez keuh nahz tuhz cawngz Tirannus klawhz seu ngihz. 10Keuh cih ceun diz ta aarz wit neuk neuk rae kheuz Yio boh kheuz Krik an moh tuhz prih Asia keui bawnz ngarz mony reu ma Caoh Phraz.

Kuanz Skewa teu Pulz

11Phraz Pen Caoh leh Paul cih plaez an laak laaiz rak seum sangz mawn mawn keui. 12Ihz leh pahz cet boh kreung an Paul cao keu diz lan aez ihz penz keui rae an keuh penz keui kaw bilz lan, phiz raai keui kaw lae thaz ihz keu diz. 13Sra Yio an mawz wah phiz teur ka keui lan tawiz klawhz ti rae leh mus Yesuhz kyaam wah thengz phiz. Keuh wah thengz phiz daz, “Ohz leh mus Yesuhz an Paul rawz ne ohz lao mih nahz lae lan raez.” 14Sra mawz wah phiz an cih ceun diz ne naeh kuanz mai teu pulz, keuh naeh kuanz ceu beunz Yio, Skewa.

15Keuiz daz phiz daz keuh nahz, “Ohz mas boh Yesuhz, Paul kaw ohz mas, pehz samz naeh yaeh?”

16Meuz ceun diz ihz phiz kut ne teuk dawtz sapz keuh, pae keuh. Keuh kuanz mai kaw talz suhz, kulz kaalz maat, bawnz tiunz lae thaz kaang an diz. 17Meuz ihz Yio boh kheuz Krik an moh boh tuhz weng Ephesus keui ngarz lawng an diz ne keuh doz baaiz rae teur aacz daehz lupz phrawz mus Tahz Yesuhz. 18Ihz yum yam tang heungz keui truz wun khaam daz daehz a wa cih maen a taat. 19Ihz a wa cih maen a taat tang heungz keui kaw leh truz kyaamz daehz, tucz thengz aacz ngaai ihz. Nap yawt langz pap keuh hacz aamz taan seu kraao hanz sawngz khlaepz ron. 20Kawp ceun ni ne, traz Caoh Phraz prae lan rae taanz khoz traz an diz baaiz krang.

Ronyz tuhz weng Ephesus

21Waaiz a wa naeh ceun keu diz ne Paul tatz phawmz daehz tawiz Khuanz Seu Ngamz rae hnhz ngaz datz lan prih Makedoni boh prih Akhaia rae lan a weng Yerusalem. Hnhz daz, “Waaiz ohz lan weng Yerusalem ne, ohz bawnz lan yawt tang weng Rom.” 22Hnhz cao ihz keu aarz an kawr daehz, Timothi kaar Erastus lan prih Makedoni. Hnhz samz moh tuhz prih Asia ceu nawhz taan taan.

23Meuz phangz an diz tuhz weng Ephesus ne ihz keui ronyz thanz paw maw kawp Laai Caoh Phraz. 24A diz maang ihz mawz ron hawkz mus hnhz daz Demetrius, hnhz cih cawngz ron kyehz naang phiz Artemis keui rae cih aez ihz mawz ron keui bawnz paekz heungz. 25Hnhz raak keuh teur cuhz, pa tang ihz mawz cih kaanz deuiz daehz rae daz keuh nahz, “Pehz mas boh ehz cih kaanz an ni penz truz ihz maang. 26Seu ni pehz kaw bawnz ngarz bawnz awlz lawng Paul khyawz bawnz ihz heungz baaiz nam kaz taw tuhz weng Ephesus, sirz lan tang prih Asia rae daz, ‘Phraz leh tihz ihz cih ne nam anz Phraz,’ da. 27Kawp ceun diz ohz doz ihz keui nam nap suamz kaanz ehz. Ohz kawcz phawmz tang wat naang phiz an mawh myaat Artemis ne ngaz luh, bunz naang phiz an ihz prih Asia boh ihz tuhz prih keu tehz hacz aamz keui koz kwaai ne ngaz bilz.”

28Meuz ihz keu diz ngarz ne sunz ca baaiz rae teur aacz daehz raak daz, “Naang phiz Artemis weng Ephesus ne mawh myaat baaiz.” 29Ronyz tang weng, ihz keui cawpz Kaius boh Aristarkhus, kaar naeh ihz prih Makedoni, lae reung dengz tawiz Paul rae keuh laak kaar rip lan cu tawz yong raenz pawiz. 30Paul sunz kut tuhz wungz ihz, keuiz daz teu paez keui kan hnhz. 31Ihz mawh an upz prih Asia teur ka setz an naeh kuanz bohz Paul kaw cao ihz truz lao hnhz daz yak aez hnhz plaez toz tuhz yong raenz pawiz. 32Wungz ihz keui yeung moh yeung ronyz, teur ka raak seu meoz, teur ka samz raak thaengz seu meoz. Ihz tang heungz keui nam mas tang daehz naeh a diz kawp naehz lawh. 33Ihz Yio teur ka an naeh tuhz wungz ihz keui aez a kyaam Alesander rae nyungz hnhz lae aacz ngaai ihz aez hnhz lao plaez lawng an diz. Hnhz kaw lao tihz lao cawng aez ihz moh pras pras, ngaz upz khraez. 34Meuz ihz mas hnhz naeh ihz Yio hawkz rae teur aacz daehz teum prawm raak seu kraao aarz na ri daz, “Naang phiz Artemis weng Ephesus ne mawh myaat baaiz.”

35Meuz ceun diz crez weng an diz cao ihz moh pras pras, daz keuh nahz, “Ihz weng Ephesus keui aez, ihz keui kaw mas boh klawhz ihz, weng Ephesus ne naeh weng lum la wat naang phiz Artemis mawh myaat boh pung raang saangz thuhz naang an diz, an klaez truz thaz kaang raaoz. 36Nam maang yaeh thiangz bawnz lawng an ni. Kawp ceun diz rae pehz lo moh pras pras, yak cih cri cra. 37Pehz mat leh ihz nam conz phrihz phrahz tawiz wat, nam upz pleung naang phiz ehz. 38Demetrius boh bohz raen hnhz keui beuk keuh sunz cih a muz kaai ihz seu hawkz hawkz kaw beuk rumz lawk ne maang boh ihz mawh rumz, aez keuh an teur maap keu diz teur upz daehz. 39Keuiz daz beuk pehz maang lawng tang meoz kaw caang teur lao daehz meuz ihz teur cuhz tawiz meoz. 40Lawng an penz meu ni ne doz ihz maap ronyz kawp ehz. Kawp daz ehz nam caang lao ronyz kawp naehz.” 41Hnhz a wa lao kaw cao wungz ihz keui teuk praasz.

Currently Selected:

Teu Maan Caoh 19: ril

Highlight

Compare

Copy