Zephaniah 3
3
Jerusalem ii Mawna le Kitatna
1A mite a zothaw, tatsia in ngalphuang nuam Jerusalem khuapi a lal hi zo hi. 2Tua sia in Topa thu ngai ngawl a, a kiteknate zongh saang ngawl hi. Topa muang ngawlin, huna zongh ngen ngawl hi. 3A uliante sia tawpi hawk bang hi a; a thukhenmangte sia, duhop leih kisa in a zing ciang dong sangu khat zongh a khe ngam ngawl ngiapui ngilkialte bang ahi uh hi. 4Kamsaangte in sep nop vacin nei ngawl a, thimthel uh hi; thiampite in a thiangtho nate ninsak in, Pathian thukhamte amate phattuam natu in deikai uh hi. 5Ahihang khuapi sungah Topa om lai hi; ama in a maan bang seam a, a hi ngawlte vawt ngeingawl hi. Zing sim a pealmaw in a mite tungah thutang lak hi. Tua hi napi thutang ngawl mite in a maan ngawlte ma vawt tan viuveu a, a mai uh zum ngawl hi.
6 Topa in “Minam theampo ka maaimot zo hi; a khuapite ka susia a, a luphungte le a tausaangte a siacip sa in ka nusia hi. A khuapite kitaisan a; lampite a tawn om ngawl a — mihingte kuama om nawn ngawl hi. 7Ka ngaisutna ah tuasia ciang ka mite in kei hong thasia tu a, tuaciang ka tek nate hong saang tu hi, ka hilnate mangil ngeingawl tu hi ci in ka tuat hi. Ahihang hai ngawlin a ngamtat siat ngei ma in, a sia ngamta veve uh hi.
8 Topa in, “Ngak zi vun, ka minamte ka mawsak tu ni ngak vun. Ka thin uukna ii thahatna ka heaksak nopna in minamte le kumpi ngamte khoptua tu in ka thin ka khensat zo hi. Ka thinsona meikuang in simlei bup ka kaanghthamsak tu hi.
9“Tua sia ciang ngam tuatuamte sungah mihingte ka kikhealsak tu a, amate in kei tung bek ah thu hong ngen in pathian dangte tungah thungen nawn ngawl tu hi. Amate a vekpi in keima thu hong ni tu uh hi. 10Ngam khuala Ethiopia pan ngawngawnin a kithethaang ka mite in kei tungah biakpiakna hong pia tu uh hi. 11Tua hun ciang, kei nong langpan huvau in no ka mite in na maizum tu kul nawn ngawl tu uh hi. A kiphasak le a kisathei theampo ka heam tu a, ka mual thiangtho tungah kei nong do kik ngei nawn buatu uh hi. 12A kiniamkhiak, a thinnip mite tualai ah ka nusia tu a, kei kungah hu ngenin hong pai tu hi. 13A taanglai Israel mite in kuama tungah khial ngawl tu a, leilot thu son ngawlin ngual a theam buatu uh hi. Amate ma vang daupai in ngammuang tu a, kuama a kiita buatu uh hi,” ci hi. #Tpl 14:5
Lungdamna La
14Israel mite awng,
Lungdamna taw
lasa in au vun!
Jerusalem awng,
na thin theampo taw
lungdam vun!
15 Topa in na daan thuakna
bosak zo hi;
Na ngalte theampo
hong hepsak hi.
Topa, Israel kumpipa sia
note taw omkhawm hi;
tu in bangma lau natu thu
om ngawl hi.
16Jerusalem tungah amate ii
hi bangin a ci tu hun hong theng tu hi,
“Lau heak in,
Zion khuapi awng!
Na khutte zawsak in
khia vanuang heak in!
17 Topa na Pathian in
nang taw omkhawm hi;
ama ii thahatna in
zawna hong pia hi;
Topa in nang tungah
lungdam tu hi,
tuaciang ama ii itna sungah
nuntakna thak hong pia tu hi.
Ama in lasa tu a, na tungah
lungdam tu hi.
18Mihingte poai khat sungah
a lungdam bangma hi tu hi.”
Topa in “Lal natu hong
tawnnate ka vengsak zo hi;
tuaciang na min daina teng
kong laaksak zo hi.
19A hun hong theng tu hi!
Nang hong zothawte
daan ka pia tu hi;
a peangbai theampo
ka suatak tu a
tuaciang saltaangte inn ah
ka ciapui tu hi.
Amate ii maizumna sia
patoaina taw ka laih tu hi;
tuaciang leitung theampo in
amate pok tu uh hi.
20A hun hong tung tu hi!
A kithethaang na mite
inn ah kong ciapui tu hi;
Simleitung bup ah na min
kong thangsak tu a,
tuaciang khatvei a khangto
a nuamsa in kong vawt kik tu hi,” ci hi.
Topa in ci zo hi.
Currently Selected:
Zephaniah 3: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016