Ruth 3
3
Ruth in Pasal Mu
1Tawmvei zawkciang Naomi in Ruth munah, “Inn tuam taw na om thei natu in pasal khat kong zonsak kul tu hi. 2Nangma nasep pui numeite ii Topa Boaz sia ih mealheak ahi hunlam ciamtee in. Tu in hong ngai ta'n. Nitak ciang ama in mangtaang na cil tu hi. 3Tua ahikom kibualin a, paaknamtui tawm kinoai in, tuaciang na puan phabel teng silh in. Tua zawkciang ama taang cilna ah va pai ta'n a, ahizong a neak a dawn zawk mateng tua munah na om hunlam hesak heak in. 4Ama koi sungah lum ziam pha tak ciamtee in, tuaciang a mut zawkciang a puanvan hawk in a, a khuadop ah lum in. Ama in na ngamtat natu teng hong son tu hi,” ci hi.
5Ruth in, “Na ci theampo ka vawt tu hi,” ci in zo hi.
6Tua ahikom Ruth sia ancilna munah pai in, a tonupi sawl bangin ngamta hi. 7Boaz sia a neak a dawn zawkciang a om nuam hi. Ama taangvawng lomte omna ah pai in mu nuam in lum hi. Ruth hong pai vadeen a, a puanvan hawkin ama khuadop ah lum hi. 8Zan lai in Boaz thakhatin hong khanglo in, kilumheak a, numei khat a khuadop ah a lum mu in lamdang sa hi. 9“Nang akua ni ziam?” ci in dongh hi.
“Ruth khi hi, Topa awng. Nang sia mealheak kuung khat na hi ciang kei nong et tu vaipuak nei ni hi. Nong hesuakna in hong teenpui ta'n,” ci in zo hi.
10“Topa in nang thupha hong pia tahen. Na tonupi atu na sepna sa te sangin, tu in na ngamtatna taw ih bangkua sungah na thumaanna lian zaw lai hi. A hau a zawng tangval khat po zong thei na hi hang tuabangin zong ngawl ni hi. 11Ruth awng tu in, na thinngim heak in. Nong nget theampo vawt tu khi hi; khua sungah a om a kuama theampo in nang sia numei pha khat na hi sia hong he hi. 12Kei sia na mealheak kuung khat hi a, nang tungah vaipuak kong nei na in a maan thu hi, ahihang kei sangin a kuung zaw mealheak pasal khat om hi. #Ruth 2:20 13Hi sungah zankhuateakin om vet in a, zingsang ciangin tua pa in nang vaipuak hong la tu ziam, hong la ngawl tu ziam ih en tu hi. Vaipuak hong la tu ahile a dik a pha hi, hong la bua ahile a nungta Topa tungah kiciamna vawt hi tong, keima in vaipuak la tu khi hi. Tu in hi sungah zingsang ciang dong lum po in,” ci hi.
14Tua ahikom ama in Boaz ii khuadop ah lum top hi, ahizong ama a kimu ngawl natu in khuavak mahiat in tho hi, banghang ziam cile Boaz in ama tualai ah a om sia kuama in a hesak nuam bua hi. 15Boaz in ama munah, “Na puantual suut in a, hi sungah pha in,” ci hi. Ama in tuabangin pha a, Boaz in mangtaang kilogramme 20 dektak sun hi, tuaciang a liang ah a puak tu in suanh hi. Tua zawkciang khua sungah a vanh taw ama heak kik hi. 16Inn a thet ciang a tonupi in, “Bangbang nong hi ziam? ka tanu awng,” ci in dongh hi.
Ruth in Boaz ii ama atu in, a sep a vawtsak theampo son hi. 17A son lai na pan, “Nangma kungah khut hawm nguakin kong cia ngawl natu in hi mangtaang teng zongh hong pia hi,” ci hi.
18Naomi in ama mun ah, “Tu in na thin sausak in, Ruth awng, hi thu teng koibang ciang hong theng tu ziam na mu dong ngak in. Boaz sia tuni in hi thu a thian mateng om thong ngawl tu hi,” ci hi.
Currently Selected:
Ruth 3: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016