Ruth 2
2
Boaz ii Lo sungah Ruth Naseam
1Naomi in a pasal Elimelech ii bangkua sung pan a hau le a thudok khat ahi Boaz a kici mealheak khat nei hi. 2Ni khat ni in, Ruth in Naomi munah “Lo sungah hong paisak ta'n a, naseamte kheet ansangh te va khon tong. Na hong seamsak tu mihing khat peuma mu nanak tu khi hi,” ci hi. #Thiam 19:9-10; Thkna 24:19
Naomi in, “Ka tanu awng, va pai ta'n,” ci in zo hi.
3Tua ahikom Ruth pai a, naseamte ii nung pan zui in, an a kheet te la hi. Ama ii sepna lo sia Boaz ii lo na hi luilam hi.
4Tua zawk tawm vei ciang Bethlehem panin Boaz hong theng a, naseamte paupui in, “Topa in hong ompui tahen!” ci hi.
Amate in, “Topa in thupha hong pia tahen!” ci uh hi.
5Boaz in, naseam uk pa munah “Zia sungah numei khangmoi sia akua ziam?” ci in dongh hi.
6Tua pa in, “Ama sia Moab pan Naomi ii hong ciapui numei sia hi. 7Ama in keima munah, naseamte nung pan zui in ansanghte a laak natu in hong ngen hi. Ama in zingsang tuung panin seam zo a, tu mahiat ma in thinglim ah tawmvei tawlnga hi,” ci in zo hi.
8Boaz in Ruth munah, “Ngaisutna khat hong piasak ta'n. Hi lo sung simngawl koima dang ah ansangh tawm heak in. Hi sungah numeite taw naseam khawm in; 9amate koisungah la ci in en in, amate taw kithua in. Nang hong vawtsiat ngawl natu in ka mite thupia zo khi hi. Na dangko simin amate dipsa tuibealte sung pan tui dawn in,” ci hi.
10Ruth in a maitang lei pha dong kunsuk a Boaz tungah, “Nang a banghang kei huvau hong thinnuammaw mama ni ziam? Banghangin ngamdangmi khat tungah hong dik mama ni ziam?” ci hi.
11Boaz in, “Na pasal thi pan kipan na tonupi atu na sep na vawt theampo hong za siat khi hi. Na pa na nu le na ngam nusia in, na heak ngeingawl mite kawm ah teang tu in hong pai na hi sia ka he hi. 12Na sepsa na vawtsa tungtaang Topa in thaman hong pia tahen. Ama ii hong pao hong dal tu in Israel te Topa Pathian na belh hu in ama in thaman kicing hong pia tahen!” ci in zo hi.
13Ruth in, “Topa awng, nang kei tungah hong dik mama ni hi; Kei na naseamte khat taw zong kikim zo ngawl kasap kamthiam taw nong paupui ciang ka om nuam zaw paih hi,” ci in zo hi.
14Anneak hun ciang Boaz in Ruth mun ah, “Hong pai ta'n a, anluum bek khat la in meetui sungah pap in,” ci hi. Tua ahikom ama naseamte taw hong tokhawm a, tuaciang Boaz in an em pawlkhat pia hi. Ama in a kham dong a neak zawkciang a neak vaal pawlkhat nei lai hi. 15-16Ama ansangh tawm lai tu in a pai zawkciang Boaz in naseamte thupia a, “Taangvawngte a kikoina phual dong ma an lasak vun a, anlaak a tawp natu in bangma ci heak vun. Tua bek dom ngawlin taangvawngte pan pawlkhat dok vun a ama top tu in nusiat vun,” ci hi.
17Tua hi a Ruth in lo sungah nitak dong ansangh tawm a, tuaciang a cil ciangin kilogramme 10 dektak pha hi. 18Ama in a anlaakte khua sungah cia pui in a tonupi a nga za lak hi. A anneak vaal teng zongh a tonupi pia hi. 19Naomi in ama munah, “Hiteng theampo koisung pan kaikhawm ni ziam? Akua lo sungah naseam ni ziam? Nang hong kin pa tungah Topa in thupha pia tahen!” ci hi.
Tua ahikom Ruth in Naomi munah ama sia Boaz a kici pasal khat ii lo sungah na a sep son hi.
20Naomi in, “Topa in Boaz thupha pia tahen!” ci in au hi. “Topa in a kamciam sia a nungta lai te le a thisate tung dong ah kholet tawntung hi.” A kampau zom lai a, “Tua pasal sia eima mealheak kuung khat hi a, ei hong kep tu vaipuak a nei khat ahi hi,” ci hi. #Thiam 25:25
21Tuasia ciang Ruth in, “A phabel hile, ama in an laak man dong a naseamte taw ansangh tawmin hong sawl sia ahi hi,” ci hi.
22Naomi in Ruth mun ah, “Ahi ma hi, ka tanu awng, Boaz lo sungah tua numeite taw nasep khop tu ma phabel tu hi,” ci hi. 23Tua hi a, Ruth in mangtaang le zungtaang laak teng a man dong amate taw seam khawmin an kaikhawm hi. Tuaciang ama sia a tonupi taw ma in teang khawm top hi.
Currently Selected:
Ruth 2: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016