Romete Thupatna
Thupatna
Romete tungah Paul ii laithak sia Rome khua a om Pawlpi ah ama a haw ciangin, amate a kinging sa in a om thei natu a deina hi. Ama tupna pan, tua munah, a om Tapidawte kungah tawmvei naseam in a om zawkciang amate ii huna taw Spain ngam ah a paisuak lai natu ahi hi. Tapidawte upna tu zia le amate nuntakna sungah tua thu a zak thei natu in ama tel bangin Paul in a at hi a, ama thupuakte a cingbel in a kikhum laibu ahi hi.
Rome khua ah a om pawlpi mite a paupui zawkciangin amate atu thu a ngetsak nate son a, tua zawkciangin a laithakna ii thubulphu ahi “Bangbangin Pathian in mihingte ama taw kilemsak kik thei ziam; A kipat pan a kipan a tawp dong upna tungtawnin a piang a hina thu, lungdamna thu in pualaak hi,” ci in son hi (1:17).
Tua zawkciangin Paul in a thubulphu sia hi bangin kicingtosak hi. Mihing a minpiang Jew te ahizong, Gentile te ahizong, Pathian taw a kilem kik natu kisamh hi, banghang ziam cile amate theampo sia mawna vaangletna nuai ah om siat hi. Mihingte Pathian taw a kilem kik natu in Jesus Christ a upna tungtawnin piang thei hi. Tua zawkciangin Paul in Christ taw kikop a nuntakna thak ih neina in Pathian taw kizopna a thak piangsak hi ci hi.
Thu umte Pathian taw kilemna nei a, mawna le thinate ii vaangletnate panin Pathian Thaa in suaktasak hi. A lian 5-8 sungah Paul in Pathian thukhamte a kulna le thu umte ii nuntakna sungah Pathian Thaa ii thahatna thute son hi. Tua zawkciangin sawltakpa in Jew te le Gentile te sia mi namcinte sungah a kihel natu zia Pathian ngaisutna thute sonto lai hi. Ama thukhupna panin, Jew te ii Jesus a nialna uh sia mihing theampo Jesus Christ tungtawnin, Pathian ii thuthiamna taw a kithuai thei natu a thupiang hi a, Jew te zongh in, Jesus Christ sia a tawntungin nial ngawl tu hi, ci in um hi. A khakbel in Paul in tapidawte nuntakzia tu sia bangbang hi a, a tuanin ngualdang taw kizopna sungah ki it natu dan teng at hi. Thubulphu ahi Pathian ii tung a sepsakna le ngam uk kumpite tung le khat le khat tungah Tapidawte sep tute le thinsung thiangtho tak a om zia tu thute son hi. A laithak tawpna ah ama aituam thupuakte le Pathian pokna kammalte at hi.
A kihel Thulute
Thupatna le Thubulphu 1:1-17
Mihingte atu ngupna a kulna thu 1:18—3:20
Pathian hong ngupna zia 3:21—4:25
Christ sungah nuntakna thak 5:1—8:39
Pathian ngealna sungah Israel mite 9:1—11:36
Tapidawte ngamtatzia 12:1—15:13
Thukhupna le aituam paupuina 15:14—16:27
Currently Selected:
Romete Thupatna: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016