Psalm Late 74
74
Minam bup Suatak natu Thungetna
1Banghangin hi bangin
kote hong nusia ni ziam,
Pathian awng?
Nangma mite tungah
a tawntungin na thin uuksak tu ni ziam?
2Khuangei lai pek a, nangma mama atu na tealsa mihingte phawk in,
saltanna sung pan nangma minam tu a,
na tat sate phawk in.
Khatvei lai a, na teenna mun Zion Mual sia phawk in.
3Hi a laltham sate munah pai in;
ih ngalte in Biakinn sungah na theampo lalsak zo hi.
4Na ngalte in na Biakinn sungah
zawna mualsuana taw
au zo uh hi;
amate in tua munah zawna
lim in laandial khai zo hi.
5Amate in hei taw thing a phuk,
thingphukte taw kibang hi.
6Amate in a kizeam thingpheak theampo
a hei le a sekpuite taw saattham uh hi.
7Amate in nangma ii Biakinn
lalsakin mei taw hal uh hi;
amate in nang hong
kibiakna mun ninsak hi.
8Amate in eite
hong sucip nuam hi;
ngamsung a thiangthona mun theampo haltum uh hi.
9Koma ii tepteena lim thiangtho theampo bo siat zo hi;
kamsaangte kuama taang nawn ngawl a,
hisia bang tanvei khuangei tu ziam
ci in kuama in he ngawl hi.
10Pathian awng, bang tanvei, ih ngalte in
nang hong nuisan tu ziam?
Na min a tawntungin hong selno tu ziam?
11Banghangin kote nong hu tu sia nial ni ziam?
banghangin na khutte na nungsangah seal ni ziam?
12Ahihang Pathian awng, nang sia a kipat panin koma kumpipa na hi hi;
nangma in kote tamvei ma nong hun zo hi.
13Na thahatna lian taw tuipi na khen a,
tuipi sung nganhing lianpuite lutang na sutham hi; #Pu 14:21
14Leviathan nganhing lianpui ii
lutang na sutham a,
a luang sia sennealngam
sungah,
nganhingte vaakna in
na nei hi. #Job 41:1; Ps 104:26; Is 27:1
15Ciktui le tuisamhte
na luangsak a,
ngun liante na kangsak hi.
16Nangma in sun le zan
na bitphua a,
ni le tha a omna tek ah
na koi hi;
17nangma in leitung ii mong na omsak hi;
khuakhaal le phalbi hun na vawt hi.
18Ahihang Topa awng,
na ngalte ii nang hong nuisat uh sia ciamtee in,
pathian sel amate in nang hong zawngsak uh hi.
19A cimaw na mite a ngilo a ngalte khut sungah nusia heak in;
a kivawtsia, na mite mangil heak in!
20Kote taw na vawt thuciamna sia ciamtee in.
Ngam kingsong a zingna mun theampo ah zawthawk buaina om hi.
21A kinengcip mihingte maizumsak heak in;
tua mizawng le mi cimawte in hong pok tahen.
22Pathian awng, nangma thu in hong kithawn ta'n a, na thu khosak in!
Sunkhuateak in pathian sel mihingte in
nang hong nuisan zazan ahi hunlam ciamtee in.
23Na ngalte ii thin uuk auna le
nang hong langpante ii a tawntung ngamlumna na mangil heak in.
Currently Selected:
Psalm Late 74: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
