Psalm Late 66
66
Pokna le Lungdamkona La
1Mihing theampo awng,
lungdamin auna taw Pathian pok vun!
2Ama ii minthanna la in sa vun a,
a minthang pokna ama pia vun!
3Pathian mun ah,
“Na sep na vawtte bangza in lamdang ziam!
Na vaangletna in
lian lawlawm a,
na ngalte in kiitakna taw
na mai ah kun uh hi.
4Leitung mihing theampo in nangma hong bia uh hi;
amate in pokna la hong sak uh a,
amate in na min pokna la nang hong sak uh hi” ci vun.
5Hong pai tavun a, Pathian sepna sate,
mihingte atu a lamdang a septe hong en tavun.
6Ama in tuipi sia leiko
suaksak hi;
ih taanghpupite in a peang
uh taw ngun kaantan hi.
Tua munah eite in ama ii sepna hu in ih lawp hi.#Pu 14:21; Jos 3:14-17
7Ama in a thahatna taw a tawntungin uk a,
minam tuatuamte mitsuan hi.
Ama langpanin kuama in tualngal tho heak hen.
8Minam theampo awng, ih Pathian pok vun;
na pokna uh kiza tahen.
9Ama in eite a nungta in hong keam a,
ih liik tu a oai bua hi.
10Pathian awng,
kote hong sit zo ni hi;
ngunn sia meisa taw a kithiansak bangin
kote nong sittel zo hi.
11Thaang sungah nong awksak a,
ka nungzaang uh ah vanhngit nong suan hi.
12Ka ngalte in nong tuanhcilsak hi;
meikuang le namthuam kaantanin ka pai uh hi,
ahihang tu in nangma in ngammuanna mun khat nong then hi.
13Na inn ah meihal biakpiakna kong paipui tu hi;
kong kamciam sia kong pia tu hi.
14Ngim ka nga hun lai kong pia tu hi ci in
kong kamciam teng kong pia tu hi.
15Biaknatau tungah hal tu in tuute ka pia tu hi;
khuitalte le kealte
sangaw biakpiakna in ka nei tu a,
a meikhu in van ah kaato tu hi.
16Pathian a patoaite theampo awng,
hong pai tavun a ngai vun,
tuasia ciang kei atu
ama sep theampo kong son tu hi.
17Hu ngenin ama ka biakpui hi;
late taw ama ka pok hi.
18Ka mawnate awlmawk ngawl hi leng
Topa in kei hong nangai ngawl tu hi.
19Ahihang Pathian in kei hong za takpi zo hi;
ka thungetna hong ngai zo hi.
20Pathian ka pok hi,
banghang ziam cile ama in ka thungetna hong nial ngawl a,
hong itna kip sia kei kung panin la kik ngawl hi.
Currently Selected:
Psalm Late 66: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
