Psalm Late 59
59
Hong Kepcing natu Thungetna #1 Sa 19:11
1Ka Pathian awng,
ka ngalte khut sung panin hong hun ta'n;
kei hong simte kung panin hong dal ta'n!
2Tua mihing ngilote kung panin hong hun ta'n;
tua mihing thatte kung pan hong suatak ta'n!
3En in! Amate in kei that tu in hong pang hi;
mihing tatsiate
ka lang ah hong kikhawmtua uh hi.
Amate ii tuabang a,
manlang tak a kei hong sim natu mun a zot uh sia,
mawna khat po hang ahibuale
ka tatkhialna khat po hang,
4tua ahibuale keima ii kicin laakna
khat po hang zongh hi ngawl hi, Topa awng.
5Tho in, Topa
Vaanglianbelpa Pathian awng,
kei hong hu tu in hong kuan ta'n;
Israel te ii Pathian awng, nangma ma in en in!
Khanglo in, Pathian he ngawlte daan pia in;
a ngilo ngual leeheak theite tungah hesuakna lak heak in!
6Amate in nitak sangin hong heak kik a,
ui bangin ngual ngalh a, khuapi sungah vak kawkoai uh hi.
7Amate ii hong selnonate le
hong tawnnate ngai in.
Amate ii kam sungah om a leei sia namsau taw kibang ahitazong,
kuama in amate pau za ngawl tu in um uh hi.
8Ahihang Topa awng,
nangma in amate na nuisan a,
Pathian he ngawl theampo na selno hi.
9Na thahatna kong muang hi;
nang sia ka bukna na hi hi, Pathian awng.
10Ka Pathian in kei hong it a,
kei kungah hong pai tu hi;
ama in ka ngalte ii ngallelna kei hong musak tu hi.
11Amate thatlum heak in,
Pathian awng,
tuabang hi thong le te ka mite in mangil tha thei tu hi.
Topa, kote hong dal pa awng,
Na thahatna taw amate thethaang in a, zo cip in.
12Mawna sia amate muk ah om hi;
amate kammal theampo mawna vive ahi hi;
a kiphatsakna sungah amate awkvalh tahen!
Amate in longsia le leilot thu zangh ahikom,
13na thin uukna taw amate
susia in; susia cimit in.
Tuasia ciang a kuama po in
Pathian in Israel te a uk hunlam he tu a,
a ukna sia
leitung bup ah kithung ahi hunlam tel tu hi.
14Ka ngalte in nitak sangin
hong heak kik in,
ui bangin ngual ngalh a,
khuapi sungah vak kawkoai uh hi,
15an zongin a vak uite taw
kibang a,
an a kicingin mu buale
mau uh hi.
16Ahihang na thahatna thu, la in ka sa tu hi;
na itna kip sia
zing simin a ngingin, la in ka sa tu hi.
Nang sia ka bukna na hi zo a,
ngimna sungah ka belhna na hi hi.
17Kei hong hungpa awng, nangma kong pok tu hi.
Ka bukna sia Pathian hi a,
kei hong it Pathian ahi hi.
Currently Selected:
Psalm Late 59: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
