Psalm Late 56
56
Pathian Muanna Thungetna
1Pathian awng, Kei hong hesuak ta'n,
banghang ziam cile kei hong kisim hi;
ka ngalte in a tawntungin kei hong vawtsia hi.
2Kei hong langpante in nitangtumin kei hong sim hi.
Kei hong simte tam mama hi.
3Vaanglianbelpa Topa awng ka lau ciang,
ka muanna nang sungah kong nga hi.
4Pathian ka muang a,
ka lau bua hi;
ama ii hong kamciam hu in
ama ka pok hi.
Mihing lelel khat in kei
bang hong law thei tu ziam?
5Ka ngalte in nitangtumin ngim hong pia hi;
kei hong liamsua natu in amate in
ngeal tawntung hi!
6Amate in a buliana munte ah kikhawm in,
hong thatlum thei tu in ki um uh a,
ka ngamtatna theampo hong encik hi.
7Pathian awng, amate ngitlona hu in amate daan pia in;
na thin uukna taw tua mite zothal in.
8Bangza in ngim nga ka hi sia nong he hi;
nangma in ka thituite nong tepteesak zo hi.
Na laibu sungah tuate kiciamtee hi ka na ngawl ziam?
9Nang kong sam ni in
ka ngalte kiheak kiksak tu hi.
Hi thu ka he hi: Pathian sia
keima sangah hong pang —
10a kamciamte ka pok
Topa ahi hi.
11Ama ka muang a,
ka lau buatu hi.
Mihing lelel khat in kei bang
hong law thei tu ziam?
12Pathian awng, kong kamciamsa sia kong pia tu hi;
lungdamko piakkhiatna kong pia tu hi,
13banghang ziam cile nangma in
thina panin nong suatak a,
lelna panin nong keam hi.
Tua ahikom Pathian ii mai,
a nungtate tungah a taang
khuavak sia sungah ka vak hi. #1 Sa 21:13-15
Currently Selected:
Psalm Late 56: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
