Psalm Late 44
44
Kidal natu Thungetna
1Pathian awng, ngei tawngh lai in
na sep na vawtte ka taanghpupite in hong son zo a,
ka bil uh taw ka za zo uh hi:
2Nangma mama in Pathian he ngawlte bangbang na notkeak a,
amate ii leitang tungah na mite bangbang na koi a;
minam dangte bangbang daan pia in,
na mite bangbang khangtosak ci thu ka za uh hi.
3Na mite in tua leitang sia
amate ii a namsau taw zothal hi ngawl hi;
amate vaangletna taw a zothal hi ngawl hi;
nangma vaangletna le thahatna taw ahizong,
nangma ompuina taw ahizong
a zo hi a, tua in amate na itna na lakna ahi hi.
4Nangma in ka kumpipa le ka Pathian na hi hi;
na mite tungah zawna na pia a,
5tuaciangin nangma vaangletna taw ngalte ka zo uh hi.
6Kei hong hun tu in ka thal ahibuale
ka namsau ka muang bua hi;
7ahihang nangma in ka ngalte khut sung panin nong hun zo a,
hong ensante na zo zo hi.
8Nang kong pok tawntung tu a,
a tawntungin lungdam kong ko tu uh hi.
9Ahihang tu laitakin nong nial a, lelna nong thuaksak hi;
ka ngalkap honte nong tonpui nawn bua hi.
10Koma ngalte kung panin nong taisak a,
ko neisate amate atu in la uh hi.
11Tuute bangin
nong kingolumsak hi;
ngamdang ah
nong thethaang hi.
12Bangma man a nei lei ngawlte bang phetin
na mite takpi man tawmno taw nong zuak zo hi.
13Ka innpaamte in ko tungah
nong ngamtatna teng hong mu a,
amate in ko hong selno in
hong nuisan uh hi.
14Minam tuatuamte sungah
ko sia ngual zawnsak tu in nong koi hi;
amate in a lu uh hong thin in hong nunau uh hi.
15Kei sia a tawntungin minsiat ka thuak hi;
maizumna in hong khunel hi,
16ka ngalte le hong ensante ii hong nunauna le
hong selnona ka zaak ciangin ka mai zumna in hong khulum hi.
17Nang hong mangil ngawl ahibuale
ko taw na vawt thuciamna paltan ngawl hi napi,
hi bangte ko tungah hong piang siat zo hi.
18Nang tungah thumaan ngawlin ka om ngei bua uh hi;
nong thupiakte kong nial bua uh hi.
19Tua hi napi ngamsate kawm ah a cimaw in nong nusia hi;
a thukbel khuazing sungah nong nusia hi.
20Ka Pathian kong biakna tawlnga hi le ung a,
ngamdangte pathian tungah thungen hi le ung,
21hong mu tatak zo tu ni hi,
banghang ziam cile ka ngaisut kute dongin nong he siat hi.
22Ahihang nang hu in kote thalupna ka thuak tawntung uh a,
ngawlup tu tuute bangin hong kivawt hi. #Rom 8:36
23Topa awng, hong khanglo ta'n!
Banghangin mu ni ziam?
Nangma le nangma hong thoto ta'n!
A tawntungin ko hong nial heak in!
24Banghangin ko kung panin buu ni ziam?
Ka thuakna uh le ka ngimnate
hong makngilsak heak in!
25Lei ah pukin ka topcip zo uh hi;
leivui sungah lelna taw ka liik zo uh hi.
26Ko hong hu tu in hong pai ta'n!
Nong itna kip hangin hong hun ta'n!
Currently Selected:
Psalm Late 44: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
