Psalm Late 106
106
A mite tungah Topa ii phatna
1 Topa pok vun!
Topa tungah
lungdamko vun,
banghang ziam cile
ama pha hi;
ama ii itna in
a tawntungin kip hi. #1 Khang 16:34; 2 Khang 5:13; 7:3; Ezra 3:11; Ps 100:5; 107:1; 118:1; 136:1; Jer 33:11
2A sep sa na liante theampo akua in son zo tu ziam?
Akua in a kicingin pok thei tu ziam?
3Ama thupiakte ni a, a tawntungin a maan in
a seamte sia mihing lungdamte ahi hi.
4 Topa awng, na mite na hu
ciangin kei hong phawk ta'n;
amate na ngup ciang
kei zongh hong hel ta'n.
5Na mihingte nopsakna hong musak ta'n a,
na minam ii lungdamna,
na mihingte ii lungdam angtannate hong siimsak ta'n.
6Ka taanghpupite ii maw
bangma in ko zongh ka maw zo uh hi;
kote in seksolin ka ngilo uh hi.
7Egypt ngam ah ka taanghpupite in Pathian ii a lamdang a sepnate tel ngawl hi;
tamvei tak, a itna a lak hunte amate in mangil hi,
tuaciangin San Tuipi ah amate in Vaanglianbelpa langpan uh hi. #Pu 14:10-12
8Ahihang ama in a kamciamsa bangin
a vaangletna lian a lakna in amate hun hi.
9Ama in San Tuipi thupia a,
tua tuipi kang hi;
ama in a mite leiko tung tawnsak in lampui hi. #Pu 14:21-31
10A ensante khut sung panin amate hun hi;
a ngalte khut sung panin amate suatak hi.
11Ahihang a ngalte ahile
tuitaa siat hi;
khat zongh a taang bua hi.
12Tuasia ciang a mite in
ama kamciamte um in pokna la a sak uh hi. #Pu 15:1-21
13Ahihang amate in ama sep sa teng mangil pai uh a,
ama ii ngaisut piakna ngak ngawlin ngamta uh hi.
14Senneal sungah amate duhopna taw kidim a,
Pathian ze et uh hi;
15tua ahikom amate nget teng ama in pia a,
a kiitakhuai mama
natna khat zongh amate sungah puak hi. #Mi 11:4-34
16Tua sennealngam sungah
amate in Moses le Topa ii
a thiangtho naseampa Aaron a eang uh hi. #Mi 16:1-35
17Tuasia ciang lei kihong in, Dathan sia lei in valh a,
Abiram le a innkuanpuite lei in hukcip hi;
18a nungzuite tungah meikuang paisuk a,
tua mihing seksolte kaanghtum hi.
19Amate in Sinai ah khamh taw khuitalno lim khat vawtin
tua milim bia uh hi;
20amate in Pathian minthanna sia
lopa a ne nganhing khat ii lim taw theak uh hi.
21Egypt ngam sungah ama ii a nasia mama sepnate taw
amate a hun Pathian, amate in mangil uh hi.
22Tua munah ama in bang a lamdang nate vawt ziam!
San Tuipi ah ama in bang a lamdangsak huaite vawt ziam! #Pu 32:1-14
23Pathian in a mite ka lalsak tu a ci ciangin
ama ii teal a naseampa, Moses in Pathian mai ah dingin
a thin uukna taw amate a lalsak ngawl natu in khaam hi.
24Tua zawkciang amate in tua ngamnuam a nolh uh hi,
banghang ziam cile amate in Pathian kamciam a um bua uh hi. #Mi 14:1-35
25Amate in a tuipuan buk sungah om in phun a,
Topa aw a nangai nuam bua uh hi.
26Tua ahikom amate sia
sennealngam sungah a thisak natu ahizong
27a suan a paalte Pathian he ngawlte kawm ah a kithethaangsak natu ahizong,
ngamdang ah a thisak natu ahizong ama in a ciliap huai kidop thei natu thupia hi. #Thiam 26:33
28Tuaciang Peor ah Pathian ii mihingte in Baal biakna pawm uh a,
nuntakna nei ngawl pathiante tungah
a kipia sangaw biak piaknate ne uh hi. #Mi 25:1-13
29Amate in a ngamtatna taw Topa
thin uukna toklosak uh a,
a kiitakhuai natna khat
amate sungah hong tung hi.
30Ahihang Phinehas dingto in a mawte daan a piak ciang,
tua pul natna thai hi.
31Hi thu sia ama maipha nga natu in tua hun pan kipan kiciamtee a,
hong pai lai tu hun theampo sungah kiphawk tu hi.
32Meribah ciktui ah tua mite in Topa thin uuksak uh a,
amate hu in Moses ngim nga hi. #Mi 20:2-13
33Amate in Moses ii thin siasak ahikom
ngaisun phot ngawlin ama pau hi.
34Amate in Topa thupiak bangin
Pathian he ngawlte a that bua uh hi, #Thkte 2:1-3; 3:5-6
35tuabang ci thada amate taw nupa in kiteang uh a,
doaibiate ii ziate zui uh hi.
36Pathian mite in milim bia uh a,
tua in amate lalna piangsak hi.
37Amate in a tapate a tanute sia
Canaan milimte tungah sangaw biakpiakna in nei uh hi. #2 Kum 17:17
38Amate in tua mawnei ngawl
patangno numeinote thatlum uh a,
tua kithalupnate in ngam ninsak hi. #Mi 35:33
39A ngamtatna uh taw amate le amate kininsak in
Pathian tungah a thumaan bua uh hi.
40Tua ahikom Topa sia ama mite tungah thin uuk hi;
ama in thasiathuai sa hi. #Thkte 2:14-18
41Pathian in amate sia Pathian he ngawlte ii khut sungah nusia a,
a ngalte in amate uk uh hi.
42Amate sia a ngalte in zothaw a,
amate khutnuai theng siat uh hi.
43Tamvei ma Topa in a mite suatak ahihang,
amate in Topa langpan tu teal zaw ahikom
amate sia mawna sungah a thuk zaw in taaksuk uh hi.
44Ahizong amate ii au in a biapui ciang Topa in za a,
amate ii dongtawnate phawsak hi.
45Amate atu in
a thuciamna phawk a,
ama ii itna lianpi hu in amate maisak hi.
46Pathian in amate a vawtsia mihing theampo sungah,
hesuakna thin neisak hi.
47 Topa kote Pathian awng, hong hun ta'n,
nang tungah lungdam kong ko thei natu le
na min thiangtho kong pok thei natu in,
minam tuatuamte sung panin, hong kaikhawm kik ta'n. #1 Khang 16:35-36
48Israel te ii Pathian, Topa pok vun;
tu le a tawntungin ama pok vun!
A kuama theampo in “Amen!” ci tahen.
Topa pok vun!
Currently Selected:
Psalm Late 106: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
