Paunakte 22
22
1Minphatna le hau mamana khat sasang teal tu hi le uhte minphatna teal vun.
2A haute le a zawngte in hisia nei khawm hi: Amate nii sia Topa ii vawt khop ahi hi.
3Mihing khuangaisun theite in ngimna hong pai ciangin mu thei a pial uh hi, ahihang khuangaisun meal ngawl khat sia tua ii sungah tum vacin tu a, a zawkciang kisiik tu hi.
4 Topa ii thu ni vun a, kiniamkhiak vun, tua hile hauna, patoaina le khansauna na nga tu uh hi.
5Na nuntakna na it le, lamdung ah a kisia mihing seksolte matna thaangte na pial vun.
6Patang khat ii a nuntakzia tu na hil vun, tua hile a khan tawntungin ciamtee tu hi.
7Mizawngte in sumhaute ii sal ahi uh hi. Sum na pu le leeitopa ii sal na suak hi.
8A maan ngawl thaicii na tu uh le siatna hong po to tu hi, tuaciang ngual na zawthawkna uh sia a tawpna hong hi tu hi.
9Piakna sungah na ngo vun a, na an uh mizawngte na hawm vun. Tua hu in thupha na saang tu hi.
10A kihisak mihing sia na pial vun, tua hile kam kinialna, kihauna le min kisiatsakna a om nawn buatu hi.
11Thinsung thianthona le kamthiam paunate zak tu dik na sa le kumpipa ii lawm na hi tu hi.
12Leilot theite ii kammalte maan ngawl hi ci in lakna taw Topa in thumaan thutak sia keamcing hi.
13Pasal datham pa in inn veu ah om hi; pusuak leng tawpi in hong man thei tha tu hi ci hi.
14Palngulna sia thaang hi a — Topa thin uukna a thuakte tua thaang sungah awk hi.
15Patangte ii mawmawthuai ngamtatna le bawlpelnate a nei sia a ngeina hi lel hi, ahihang a kilawm bang a, ngoaibul bekna taw amate ngamtat zia tu kihil thei hi.
16Na hau natu in mihaute tungah letsong na pia a, ahibuale mizawngte na zothaw le nangma zongh na zawng tu hi.
Ciim Kamteptee Sawmthum
17Ngai vun, mihing ciimte pauna kong hil tu hi. Amate ii hilciannate kan vun, 18tuaciang ciamtee in, na zangh kik thei le na lungdam tu hi. 19Topa na pummuan tu ka dei hi; tua hu in tu in hong son tu khi hi. 20Nang atu in paunak sawmthum kong at zo hi. Tuate sungah heakna le ngaisut pha piaknate om hi, 21tuaciang tuate in thumaan thutak sia bang tatak ziam ci in hong hil tu hi. Tua zawkciang tuate a zong tu in hong kipaisak ciang a maan thu nong ciapui tu hi.
-1-
22Hi thei tang ci in mizawngte tung pan hamphatna la heak vun; thukhenzum ah cimaw in a dingte tung pan hamphatna la heak vun. 23Topa in amate ii thu sia amate taangin nialsak tu a, amate nuntakna a lauthawn po ii nuntakna kilauthawn tu hi.
-2-
24Mihing thinngam, thin ngeamte ngualtamh in na man heak vun. 25Amate omziate na zui tha tu a, na kikheal kik zo buatu uh hi.
-3-
26Mi dangkhat ii leibate losak tu in kamciam pia heak vun. 27Lo zawk ngawlna khat nei lete na lupna dongin amate in hong laaksak tu hi.
-4-
28Na taanghpupite ii ngisuang luite na khiin heak vun.
-5-
29Nasep pha tak a, a seam mihing khat hong lak tavun, tuaciang mihing tam mamate sang a phazaw, kumpite kitholpui tu dong a, a kilawm khat kong lak tu hi.
Currently Selected:
Paunakte 22: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
