Paunakte 2
2
Ciimna ii Tel
1Ka tapa awng, kong hilte sin in a, vawt a kong sawlte bangma hunin mangil heak in. 2Ciimna thute ngai in a, tuate heak tu in hanciam in. 3Hi hi, ciimna ngen in; a thuk mu theina nei natu maangkaa in. 4Ngunn ahizong a kiseal sum manphate ahizong na zon tu bangin nasia takin zong in. 5Tuabangin na ngamta le Topa kiitakna sia bang ziam ci in na he tu a, Pathian thu heakna in na nei tu hi. 6Ciimna a pia sia in Topa hi; ama kung pan heakna le tel theina hong pai hi. 7Ama in huna pia a, thutang, thumaante a sungsia hi. 8Midangte tungah a kilawm tu bangin a ngamtate ama in sungsia a, ama tungah a kipiate ama in cing hi.
9Ka pau nong ngai le, a maan, a tang le a kilawmte na he tu hi. Na vawt tute na he tu hi. 10A ciim na suak tu a, na heakna in nopsakna hong pia tu hi. 11A thuk na mu theina le na telna in nang hong sungsia tu hi, 12tuaciang a maan ngawlte na vawt ngawl natu in hong khaam tu hi. Amate pauna taw ngimna a piangsak mite kung panin tuate in hong keam tu hi, 13tuabang mite in thutang nuntakzia nusia in mawna khuazing sungah a teang uh hi, 14tuabang mite in a maan ngawl sepna sungah nuamsa a, tuaciang in khiakna nei ngawl siatnate ah thanuam uh hi, 15amate sia mihing suantaak ngawl a muan thamman ngawlte ahi uh hi.
16Nangma in numei paktat khat po ii kamthum taw hong zolnate na nalh zo tu hi, 17ama in a pasal tungah thumaan ngawlin kiciamna thiangthote a mangil nu ahi hi. 18Ama inn ah na haw le thina lampi ah khual a hawhaw na hi hi. Tua munah pai tu sia mithi khua a neak na hi hi. 19Ama kung a haw peuma hong heak kik ngeingawl hi. Tua pa in nuntakna lampi ah hong kilee kik ngei nawn ngawl hi. 20Tua ahikom mihing phate lamlaknate zui in thutang nuntakna taw nungta hamtang in. 21Thutang mi, thumaan takkhate, hisung eima ii leitang tungah a nungta tu hi. 22Ahihang Pathian in mihing seksolte leitung panin dokkhe tu a, hi mawneite leitung panin thingnote baw bangin bot tu hi.
Currently Selected:
Paunakte 2: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
