Paunakte 19
19
1A leilot thei a mawmaw khat hi tu sangin, zawng napi a thumaan khat ih hi tu phazaw hi.
2Heakna om ngawl thalawpna in pha ngawl hi; thin vei laakna in ngimna sungah hong then tu hi.
3Mihing pawlkhatte in amate ii mawmawt ngamtatnate taw kilal sua a, tuasia ciang Topa mawsiat uh hi.
4Mihaute in ngualtamh thakte mu tawntung hi, ahihang a zawngte in ngualtamh tawmno a nei sun teng keam zo ngawl hi.
5Thukhenzum sungah leilot thu na son le daan na thuak tu hi — suatakna a om buatu hi.
6Mihing thupite tung pan maipha nga tu in a kuama po hanciam uh hi; a kuama po in phattuamna a pia theite sia ka ngualtamh hi ci tek uh hi.
7Mizawng khat in a mealheakte ngawngawn konlaw thei ngawl hi, ama ii ngualtamh a nei ngawl sia lamdang ngawl hi. Bangza in hanciam kale kuama a nga zo bua hi.
8Nangma le nangma kiphatvawt in a, na sin thei theampo sin in; tuaciang na sin sa teng ciamtee in, tua hile na khangto tu hi.
9Thukhenzum sungah leilot thu a sonte peuma daan piakna pan suakta ngawl tu hi; ama a lal ahi hi.
10A mawmawte a nuam leilam in nungta heak hen a, salte in lianzaw tate uk heak hen.
11Khuangaisun thei khat na hile na thin tomna na uk zo tu hi. Nang tung hong taa khial khat a om ciang awlmawk ngawlin om theina in phatna lian khat ahi hi.
12Kumpipa ii thin uukna in tawpi hawk bang ahi hi. Ahihang ama ii hong phatvawtna sia ih dei laitak a zu nguatui bang ahi hi.
13A mawmaw tate in a nu le a pate lalna sung then thei hi. A nawnsan zi sia mal khakhat in a taak vakek tui taw kibang hi.
14Mihing khat in a nu le a pa tung panin inn le sumte lua thei a, ahihang Topa bek in khuangaisun thei zi khat pia thei hi.
15Na datham nuam le datham in; mumu lel in, ahihang ngilkial in na om tu hi.
16Pathian thukhamte tang in, na khansauzaw tu hi; na thusim buale na thi tu hi.
17A zawngte tungah na piak ciangin Topa tungah pukthaak bang hi a, Topa in hong lo kik tu hi.
18Na tate heak thei natu in a khanmoi lai in tek in. Tuabangin na vawt buale amate le amate a kilalsua natu in a hu na hi tu hi.
19Mihing khat a thin a ngam le ama in a piang thute thuaksak in. Ngim nga natu panin khatvei na hun ngei le na hut kik kul tu hi.
20Ngaisut piakna ngai in heakna sin tu na lungngul le ni khat ni ciang na ciim tu hi.
21Mihingte in na namcin ngeal thei hi, ahihang Topa deina bang bekin piang tu hi.
22Duhopna in min paanna hi; mizawngte in a leilot theite sangin phazaw lai hi.
23 Topa thu ni in na om le khansau in na nungta tu hi, lungkim in siatna pan suakta in na om tu hi.
24Mihing pawlkhatte a kam sungah an zongh kibak naap ngawl za dongin datham mama hi.
25A phazaw ngamtatna a he ngawlte ii a heak thei natu in, kisaktheinate sia daan kipia tu hi. Na ciim le nang tungah hong kipau hong kihil ciangin na tel tu hi.
26A maizumhuai, a minpaan pa bek in a pa vawtsia tu a, ahibuale a inn panin a nu not tu hi.
27Tapa awng, pilna sinna na tawp le na heak sate zongh hai ngawlin na ngaingon tu hi.
28Tetti khat in mihing khat pawpo supna baina pia nuamin a khensat zawkciang thumaan thukhenna om thei nawn ngawl hi. A seksol mihingte in a sia nate sin tu lamnai hi.
29A kihisak a mawmaw khat in velna vuakna nga tatak tu hi.
Currently Selected:
Paunakte 19: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
