Paunakte 16
16
1Eite in tupna sawmna vawt ka leang Pathian ii deina bang bekin taangtung hi.
2Na sep na vawt theampo maan hi ci in ngaisun tha tu ni hi, ahihang Topa in na tupna laingil tungah thu hong khen hi.
3Na ngealnate Topa in thupha hong piak natu in ngen in, tua hile na sep tak ciang zawna taw, ma na tun tu hi.
4 Topa vawt sa khat simin a tawp natu khat tek om hi; a seksolte tawp natu sia lalna ahi hi.
5A kisathei pawpo Topa in ensan hi; ama in amate daan thuak natu panin a suaktasak buatu hi.
6Thumaan vun a, citak vun, Pathian in na mawna hong maisak tu hi. Topa ii thu ni vun, thusia bangma na tungah hong tung ngawl tu hi.
7 Topa na lungkimsak ciangin na ngalte zongh lawm le ngual na suaksak thei tu hi.
8Thumaan ngawlna taw sum tam mama nga sangin thumaan takin thalaw vateeina taw sum tawmno khat nei sia phazaw hi.
9Nangma in ngealna vawt thei tu na hihang Pathian in na ngamtatnate hong zeak hi.
10Kumpipa in Pathian ii thuneisakna taw pau hi; ama thukhennate sia maan tawntung hi.
11 Topa in toaisuangte le khaikhin a maan tu dei a, vanhzuak theampo a kilawm in zuak tu dei hi.
12Kumpipate in ngitlona dual zo ngawl hi, banghang ziam cile a khaikim thukhenna in kumpi khat thahatsak hi.
13Kumpipa khat in thumaan thutak za nuam a, thumaan a sonte ama in maipha pia tu hi.
14Mihing ciim khat in kumpipa lungdam in a om thei natu hanciam tu hi; kumpipa a thin a uuk le khat po in thi law thei hi.
15Kumpipa ii maipha a piakte sia khuakhaal kipat hun a, nguazusak meeikaaite bang ahi hi. Tuasung ah nuntakna om hi.
16Khamh le ngunn sangin ciimna le heakna nei tu phazaw hi — phazaw pek hi.
17Miphate in siatna a pial lampi tawn in khualhaw hi; tua ahikom na pai natu en in kidawm ta'n — tua in na nuntakna hong hun thei tu hi.
18Kiphatsakna in siatna sungah hong then a, kisaktheina in kiamsukna sung hong then hi.
19A kisatheite ii sungah kihel a, ih pawlte ii a sutol vanh hawmte ih nga sangin, kiniamkhiakin a zawngin om leang phazaw hi.
20Nang hong kihilnate nadon in tua hile zawna na nga tu hi; Topa muang lete na lungdam tu hi.
21A ciim a puicing mihing khat sia ama ii tel theina a neina pan kihe hi. Ama sia kamthum pau vaial a, ngual huai vaial hi.
22A ciimte atu in ciimna sia nuntakna tuinaak ahi hi, ahihang mihing mawmawte pilsak tu hanciamna sia hun bo thawthong hi.
23Mihing pilvangte in a pau ma in ngaisun khol uh hi; tuasia ciang amate pauna sia ngual zaak nop suak seseam hi.
24Kamthiam paunate sia khuaitui bangin thum a, ciidam natu in pha hi.
25A maan lampi hi ci in na up sia in thina sung hong then thei hi. #Pau 14:12
26Nasep haksa seam khat ii ankam limna in a nasep hatsak zaw hi, banghang ziam cile ama in a ngilvasak nuam hi.
27Mihing ngilote in ngualdangte ngim nga natu in lam zong uh hi; amate kammalte mama ngitlona taw kuang hi.
28Ngual ngensiatna sia mihing seksolte in kizelsak hi; amate in buaina piangsakin, ngualtamh hina zongh khentham hi.
29A ngoltol mihingte in a lawmte theamin lalna sungah tumpui hi.
30Nang hong maitui a hong mitsuk te kidawm in; amate in a sia pawlkhat ngaisun zo hi.
31Khansauna sia a thutangte ii thaman ahi hi; puakkaanna in minthanna kumpilukhu ahi hi.
32Thahatna sangin thinsauna phazaw hi. Khuapite na uk siat sangin nangma le nangma na ki uk zawk tu sia phazaw hi.
33Mihingte in Pathian ii deina a heak natu in aisaan uh a, ahizong a zo kikna sia Pathian ii khensatna bang bek ahi hi.
Currently Selected:
Paunakte 16: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
