Paunakte 13
13
1Tapa ciim khat in a pa ii a hil a pau ciangin nadon a, ahihang a kisathei mihing khat in khial khi hi a ci ngei bua hi.
2Mihing phate sia amate pauna tung panin thaman kipia tu a, ahihang ngualtheam theite sia andu ngilkial bangin ngoltol ngamtatna dei hi.
3Na pau po kidawm in a, na nuntakna huu in. Kidawm ngawlin a pau khat in ama le ama kisiatsua hi.
4A datham khat in na khat pawpo bangza in a dei hang, a nga ngei buatu hi.
Naseam hat khat in a dei po nga tu hi.
5Mihing thumaante in leilot thute ngaimaw hi, ahihang mihing seksolte ii kammal in maizumhuai a, minpaan huai hi.
6Thutang hina in a maw ngawlte hung hi; seksolna in mawneite ii pukna hi.
7Mihing pawlkhat sia a hau bangin kiheang ahihang, bangma a nei bua uh hi. A dang pawlkhat sia a zawng bangin kiheang ahihang, nei le lamh a nei uh hi.
8Sumhau khat in a nuntakna a huuk natu in a sum a zak kul a, ahihang a zawng khat sia ama a tawng tu kuama a om bua hi.
9Thutangte sia khuavak taang kiukiau khat taw kibang hi; a seksolte sia meiinn a mit vangeu taw kibang hi.
10Kisak theina in ngim ngana simngawl bangma dang a piangsak bua hi. Ngaisutna ngetna in ciim zawkna hi.
11Ol takin hauna na nga le na bosak pal tu hi. A haksa zaw in na thalaw le a tamzaw na nei tu hi.
12Lametna a bo ciang ngaisutna zongh lal a, ahihang na uukna khat a taangtun ciang thinnopna taw hong kidimsak hi.
13Ngaisutna phate na nial le ngimna a zong na hi hi; tuasia zui lete na ngammuang tu hi.
14A ciimte hong hilnate sia nuntakna ii tuinaak hi; tuate in launa sungah na om ciang hong suaktasak tu hi.
15Pilna in kithasiana piangsak a, ahihang a muanhuai ngawlte sia lalna lampi a tawn uh hi.
16Khuangaisun thei mihingte in a ngamtat ma in ngaisun phot tawntung hi, ahihang mihing mawmawte in a heak ngawlna uh thangsak hi.
17A muan thamman ngawl kamtaite in ngimna piangsak hi, ahihang a muanhuaite in kilemna hong then hi.
18Kihilna a ni nuam ngawl po sia zawngin mindai tu hi. A kuama po kihil kipauna a ngai sia kizakta hi.
19Na dei po na nga tu sia bangza in pha ziam! Mihing mawmawte in siatna nusia nuam ngawl hi.
20A ciimte taw na kithawl le na ciim tu hi. Mihing mawmawte taw na kipawl le na lal tu hi.
21Ngimna in mawneite mun theampo ah zuizen a, ahihang mihing thutangte sia a thaman in naphate kipia tu hi.
22Mihing pha khat in a tute atu hauna nusiat tu hi, ahihang mawneite hauna sia thutangte kung zuan tu hi.
23A kitho ngawl lote in mizawngte atu, an tam mama piangsak thei hi, ahihang a maanin a ngamta ngawlte in mizawngte thaw tu khaktan hi.
24Na tapa na hilna in daan na pia buale ama a it ngawl na hi hi. Ama na it nale hil in.
25Thutangte in a neak tu a kicing nei a, ahihang a seksolte sia a ngil uh kial tawntung hi.
Currently Selected:
Paunakte 13: SCB2
Highlight
Copy
Compare
Share
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
