Obadiah 1
1
1Hi sia in Obadiah ii kamsaanna — Edom ngam taw kisai Vaanglianpipa, Topa ii thusonte ahi hi.
Topa in Edom Daan pia tu
Topa in a kamtaipa
minam tuatuamte kungah paisak zo a,
tuaciang eite in ama ii
thupiakna ih za zo hi:
“Kithoai vun! Edom sim tu in
kuan tek tawng!” ci hi.
2 Topa in Edom tungah,
“Na tha kong zawmsak tu a;
kuama theampo in nang
hong zawngsak tu hi.
3Na kiphatsakna in nang
hong theam zo hi.
Na khuapi sia suang taw
kivawt kulhpi hi a;
na inn sia mualtung
a saangna ah om hi,
tua ahikom nang le nang
‘Akua peuma in kei
hong kaivawk zo tu ziam?’
na kici hi.
4Na inn sia aksi kawmah
a om bang na hisak natu in
muvanlai bu saanna za in
a saangna ah na vawt hial zongin,
Keima in kong kaisuk tu hi.
5“Zan in ngutate hong pai ciang,
amate in a dei teng bek la uh hi.
Mihingte in sapitnga
a law uh ciang,
amate in a sangh tawm
khe tawntung uh hi.
Ahizong na ngalte in
hong diitmaai zo hi.
6Esau suan le paalte awng,
na sumngumte hong kilaaksak zo hi.
7Na kipawlpuite in
hong theam zo a;
amate in na ngam pan
hong notkeak zo hi.
Na kilempui minamte in
tu in hong zothal zo hi;
Na an neak khoppui
na lawmte in nang thaang hong sia zo hi;
amate in, ‘A pilna teng
koi sungah koi ziam?’ hong ci uh hi.
8“Edom daan ka piak ni in,
a mipilte ka susia tu a,
tuaciang a ciimna theampo
ka zutmaai tu hi.
9Teman ii a ngalkapte
kilausak vadil tu a,
tuaciang Edom a om
ngalkap theampo kithatlum tu hi.
Edom Daan piakna ii A hangte
10“Jacob ii suan le paal
na suapui pate ii neisa suttol in that na hi ciang
nang hong kisusia tu a
a tawntungin na min hong kidaisak tu hi.
11Ngalte ii a kongpite
a sukthap ni in na tungh nuam bua hi.
Jerusalem ii nei le lamh te laaksak a,
amate sungah a hawmtham khualmite za ma in
nang a sia na hi hi.
12Judah ah a om na suapuite
kaamsiat a thuak lai in
diksa ku buale teh pha hi.
Amate ii kisiat ni in
na lungdam tu hi ngawl hi.
Amate ii ngim nga ciang
na nuisan buatu hi.
13Amate ii tuasiat ni in
ka mite ii khuapi sungah
diksa ku in na tum buatu a,
a tuasiat ni in a haunate na sut buatu hi.
14Suatak tu a hanciamte a man tu in
lamkaa ah na ding buatu hi.
Amate ii ngim nga ni in
ngalte khut sungah na aap buatu hi. #Is 34:5-17; 63:1-6; Jer 49:7-22; Eze 25:12-14; 35:1-15; Amo 1:11-12; Mal 1:2-5
Pathian in Minamte Thukhen tu
15“Keima, Topa in
Minamte theampo tungah
thu ka khen tu ni nai zo hi.
Edom awng, na ngamtatna bangin
nang hong kivawt tu hi.
Na piak bangin na nga kik tu hi.
16Ka mual thiang tungah
ka mite in daan khakna
hai khaa sia dawn zo hi.
Ahizong a kiimkot ah
minam theampo in
a khaa zawlai daan khakna
hai dawn lai tu uh a;
a dawn khawng zawkciang
mangthang tu uh hi.
Israel ii Ngalzawna
17“Ahizong Zion Mual tungah
pawlkhatte suakta tu uh a,
tuaciang tuasia
a thiangtho mun hi tu hi.
Jacob mite in amate nga tu ahi
a leitang sia tang tu uh hi.
18Jacob le Joseph mite
meikuang bang hi tu uh hi;
amate in Esau mite sia
ninteakte mei ii kak bangin susia tu uh hi.
Esau suan le paalte khat zongh
suakta ngawl tu hi,
Keima, Topa pau zo khi hi.
19“Judah thangsang mite in
Edom la tu a;
nitumna sang mualpeang ah
a teang mihingte in Philistia la tu hi;
Israel mite in Ephraim le
Samaria ngam tang tu a;
Benjamin mite in
Gilead la tu hi.
20Israel saksang pan
saltaang ngalkaphonpi hong heak kik in,
Phoenicia sia saksang ah
Zarephath dong zothal tu uh hi.
Sardis ah Jerusalem pan saltaangte in
Judah thangsang khuate la tu uh hi.
21Jerusalem ngalzote in
Edom ngam simin, uk tu uh hi.
Tuaciang Topa ama mama
kumpi hi tu hi,” ci hi.
Currently Selected:
Obadiah 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016