Mi Simna 9
9
Paisan Poai A nii veina
1Israel mite Egypt a nusiat zawk a kum niina, tha masabel in Sinai Sennealngam ah Topa in Moses paupui hi. 2-3Ama in, “Israel mite in sep tu le zui tu ngeina om bangin tu tha ni sawm le ni li ni, nitum ciang kipanin Paisan Poai vawt tu uh hi.” ci hi. 4Tua ahikom, Moses in mipite tungah Paisan Poai vawt tu son a, 5amate in Sinai Sennealngam ah tha masabel ni sawm le ni li ni nitakin, poai vawt uh hi. Topa in Moses tungah a thupiak bangin mihingte in vawt tu teng vawt siat uh hi. #Pu 12:1-13
6Ahizong mihing pawlkhatte mithi luang tham a, biakna taw kisai in thiang ngawl ahikom tua ni Paisan Poai ah kihel thei ngawl uh hi. Amate in Moses le Aaron kungah pai a, 7“Kote in mithi luang khat thamin, ka thiang bua uh hi, ahizong Israel dangte ii Topa tung biakpiakna ah banghang hong kihelsak ngawl nu ziam?” ci uh hi.
8Moses in, “Topa tung pan sawlna thu ka nga dong ngak zii vun,” ci in zo hi.
9 Topa in Moses tungah, 10Israel mite tungah a son tu in, “Note khat po, ahibuale na suan na paalte ii mithi luang a tham hu in thiang ngawl a, ahibuale khual khuala haw in, ahihang Paisan Poai a siim nuam veve le, 11tha khat zawkciang, a tha niina ni sawm le ni li ni, nitakin poai vawt thei tu nu hi. Tol saw ngawl anluum le antee khaa taw poai vawt vun. 12A zingsang dongin anneakvaal koi heak vun a, tua a kingo nganhing ii ngute khat zongh thiaktan heak vun. Zui tu ngeina theampo om bangin Paisan Poai vawt vun.#Pu 12:46; Jn 19:36 13Ahizong mihing khat po biakna taw kisai in thiang a, khual zongh haw ngawl napi Paisan Poai a vawt bua ahile ka mi khat in kingaisun nawn ngawl tu hi, banghang ziam cile a hunin biakpiakna hong piak ngawl hang ahi hi. Ama in a mawna hu in thuak nanak tu hi.
14“Note sungah ngamdangmi khat in Paisan Poai a vawt nuam ahile sep tu le zui tu ngeina om theampo vawt tu hi. Ngamdangmi hikale ngamsung mi hikale a kuama po zui tu in a kibang thukham ahi hi,” ci in sawl hi.
Mei bang a taang Meei
(Pusuana 40:34-38)
15-16 Topa ompuina Puanbuk a kisak ni in, meei hong kaai a Puanbuk tuamcip hi. Zan in tua meei sia mei bangin taang hi. 17Tua meei a kikhaangto simin Israel te in Puanbuk phel a, meei a tuaksukna munah Puanbuk sa kik uh hi. 18Topa thupiak bangin mite in ngiaphual phelin, ama thupiak bangin ngiaphual saat uh hi. Puanbuk tungah meeikaai a taam laiteng tua ngiaphual sung ma ah amate taam uh hi. 19Khuangei mama Puanbuk tungah meeikaai a taam ciang amate in Topa thu ni in kikhiin ngawl uh hi. 20Khat vevei ni tawmvei sung bek Puanbuk tungah meeikaai om a; bangbang po hikale Topa thupiakna bangin amate taam a, ahibuale kikhiin uh hi. 21Khat vevei nitak pan zingsang dong bek meei om a, meei a kilapto po ciang amate kikhiin uh hi. Meei a kilapto hun simin amate kikhiin tan uh hi. 22Ni nii ahizong, tha khat ahizong, kum khat ahizong, khuangei zaw ahizong, Puanbuk tungah meei a om laiteng, amate zongh kikhiin ngawl hi; ahizong meei a kilapto ciang amate kikhiin uh hi. 23Topa ii Moses tungtawn a, a thupiak bang ni in, amate in ngiaphual saatna, ngiaphual phelna te seam uh hi.
Currently Selected:
Mi Simna 9: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
