Mi Simna 7
7
Lampuite ii Piaknate
1Moses in Topa ompuina Puanbuk sak a man ni in, ama in Puanbuk le a vanhte theampo le biaknatau le a vanhte theampo, sathau noai in aapna nei hi. 2Tuaciang Israel minamte sung pan a lampui bee le phung ukpi te ahi, mihing simna ukte in, 3Topa tungah a biakpiaknate: leang luk le khuital sawm le ni, lampui nii ciang in leang khat veu le lampui khat ciang in khuital khat tek paipui uh hi. Amate in tuate a piak siat zawkciang, 4Topa in Moses tungah, 5“Puanbuk atu, nasepna ah zak tu in hi letsongte saang in a; tua teng amate nasepna tu taw kizui in Levi mite tungah pia in,” ci hi. 6Tua ahiciang Moses in leangte le khuitalte Levi te tungah pia hi. 7Ama in leang nii le khuital li Gershon te tungah pia a, 8leang li le khuital liat Mera te tungah pia hi. Amate ii nasep theampo Aaron tapa Ithamar ukna nuai ah kiseam tu hi. 9Ahizong Moses in Kohath te tungah leangte ahibuale khuitalte pia ngawl hi, banghang ziam cile amate ii kepcing a thiangtho vanhte a liangko tungah a puak kul hi.
10Biaknatau aapna vawt natu in lampuite zongh in biakpiaknate paipui uh hi. Amate in a letsongte biaknatau ah pia tu in a kingin ciang, 11Topa in Moses tungah, “Biaknatau aap natu in, lampuite khat in a letsongte ni sawm le ni nii hun sung ni sim pia tu hi ci in amate son in,” ci hi.
12-83Amate in piakkhiatnate a nuai a bangin pia uh hi:
| A ni | Anam | Lampuipa |
|---|---|---|
| Ni 1 ni | Judah | Amminadab ii tapa Nahshon |
| Ni 2 ni | Issachar | Zuar ii tapa Nethanel |
| Ni 3 ni | Zebulun | Helon ii tapa Eliab |
| Ni 4 ni | Reuben | Shedeur ii tapa Elizur |
| Ni 5 ni | Simeon | Zurishaddai ii tapa Shelumiel |
| Ni 6 ni | Gad | Deuel ii tapa Eliasaph |
| Ni 7 ni | Ephraim | Ammihud ii tapa Elishama |
| Ni 8 ni | Manasseh | Pedahzur ii tapa Gamaliel |
| Ni 9 ni | Benjamin | Gideoni ii tapa Abidan |
| Ni 10 ni | Dan | Ammishaddai ii tapa Ahiezer |
| Ni 11 ni | Asher | Ochran ii tapa Pagiel |
| Ni 12 ni | Naphtali | Enan ii tapa Ahira |
Khatsim ii a paipui biakpiaknate kibang siat hi: antang biakpiakna tu in biakinn ah a kizangh ngei khaikhin taw a kitee, kilogramme 1.5 a ngit ngunn khawbeam khat le gram 800 a ngit ngunn kuang khat ii dim sathau taw hel anvui; ngimnamtui taw a kidim gram 110 a ngit khamh pakan khat; meihal biakpiakna tu in khuital moi khat, tuutal khat le kum khat a pha tuuno khat; mawphel biakpiakna tu in keal khat; le pawlkhop biakpiakna tu in khuital nii, tuutal nga, keal nga, le kum khat a pha tuuno nga ahi hi.
84-88Lampui sawm le niite ii biaknatau aap natu a, a paipui biakpiaknate a vekpi in a nuai a bang ahi hi;
- Ngunn khawbeam sawm le nii le ngunn kuang sawm le nii a kingawm in kilogramme 27.6 ngit hi.
- ngimnamtui taw kidim khamh pakan sawm le nii hi a, a kingawm in kilogramme 1.32 ngit hi.
- Meihal biakpiaknate atu in khuital sawm le nii, tuutal sawm le nii, le kum khat a pha tuuno sawm le nii, tua teng taw piakkhop tu antang biakpiaknate,
- Mawphel biakpiaknate atu in keal sawm le nii,
- Pawlkhop biakpiaknate atu in khuital 24, tuutal 60, keal 60, kum khat a pha tuuno 60.
89 Topa taw kipaupui tu in Puanbuk sungah Moses a tum ciang, Thuciamna Thingkuang sitna tungah a om Cherubim nii kilaklaw pan Topa paupuina ama in za hi.
Currently Selected:
Mi Simna 7: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
