Mi Simna 5
5
A Thiang ngawl Mihingte
1 Topa in Moses tungah, 2“A kiitakhuai vun natna veite ahibuale pumtung meima naai neite le mithi luang thamna taw a thiang ngawl peuma, ngiaphual pan a hawlkhiat natu in Israel mite thupia in. 3Amate sungah ka teenna hi ngiaphual, a nitsak ngawl natu in biakna taw kisai a thiang ngawl hi mihingte theampo hawlkhia in,” ci hi. 4Israel te in thu ni a, tua mihingte ngiaphual pan hawlkhia uh hi.
Sepkhial Vawtkhial Liau kiPiakna
5 Topa in Moses tungah, 6Israel te atu in a nuai a kihilnate pia hi. Mihing khat pawpo in Topa tungah thumaan ngawlin khat pawpo tungah khialna a vawt ciang 7a thuak pa tungah a mawna pualaak hamtang in, a maw a khial man a cingin a liau zawkciang zakhat tungah kul veu belapin pia thua tu hi. 8Ahizong tua pa thi zo a, a liausum piak natu in mealheak nai a nei bua ahile, tua liausum sia thiampipa atu in Topa tungah kipia tu hi. Hi liausum sia, a maw a khialpa biakna taw kisai in thiansua natu a kizangh tuutal belapna ahi hi. #Thiam 6:1-7 9Israel te ii Topa tungah a tuam vilvel in a piak letsongte zongh tua letsong a saang thiampipa ii neisa ahi hi. 10Thiampi khat simin ama tungah a kipia biakpiaknate keam tu hi.
Pasalte ii Muanlaak a Zite Thute
11 Topa in Moses tungah, 12-14Israel te tungah a nuai a kihilna teng a piak tu in sawl hi. Tua thu sia pasal khat in ama tungah a zi thumaan ngawl a, pasal dang khat taw khialin ama pumpi ninsak ci a, muang la hi. Ahizong a khial laitak a kiman hi ngawl, tetti om ngawl a — a zi zongh in iim thei ahikom a pasal in thiang takin tel ngawl hi. Tua ahibuale hi thu sia a zi in thumaan ngawlna nei ngeingawl napi, a pasal in muang la thawthong zongh hi thei hi. 15Hi bang thu khat sasang a piang le, a pasal in a zi sia thiampipa kungah paipui tu hi. A pasal in biakpiak natu in a kisamh mangtaang vui kilogramme khat keng tu a, ahizong olive thau ahibuale ngimnamtui khat pawpo a tungah buak ngawl tu hi, banghang ziam cile hi biakpiakna sia a muang la pasal in thumaan thutak a heak nop manin a piak biakpiakna ahi hi.
16Thiampipa in tua numei, mai ah paipui in biaknatau mai ah dingsak tu hi. 17Thiampipa in leibeal sungah tui thiangtho tawm sung tu a, Topa ompui na Puanbuk sung suat tungah a om leivui tawm la in, tua tui a kha a sua natu a sungah tha tu hi. 18Tuaciang thiampipa in numei ii sam phelsak tu a, tua numei khut sungah biakpiakna anvui koi tu hi. Thiampipa in a khut sungah haamsiatna tuikhaa a om beal sia toai tu hi. 19Tuaciang thiampipa in tua numei ii thukimna la in, “Na pasal na palngul bua ahile hi haamsiatna tui neakna taw ngim na thuak buatu hi. 20Ahizong na pasal na palngul ahile, 21Topa in na min sia na mite sungah haamsiatna khat suaksak tahen. Topa in na numei thilte kinsakin, na ngil puaksak tahen. 22Hi tui na ngil sungah tum a, na ngil khangin, na numei thilte kinsak hen” ci in kiciamna vawtsak tu hi.
Tua numei in, “Ka thukim hi; Topa in tuabang vawt tahen,” ci kik tu hi.
23Tuaciang thiampipa in hi haamsiatna teng lai taw at tu a, tua tuikhaa beal sungah sil tu hi. 24Tua tui sia numeinu ngil sungah a bot mama natna a piangsak thei tu in a neaksak ma in, 25thiampipa in numei nu khut sungah a om biakpiakna anvui sia la tu a, Topa tungah aapin, biaknatau tungah koi tu hi. 26Tuaciang biakpiakna khat hi a cina in thiampipa in anvui khutdim khat la tu a, biaknatau tungah hal tu hi. A khakbel in tua tui sia numei in nesak tu hi. 27Tua numei in a pasal a palngul le tua tui in a bot mama natna piangsak tu a; a ngil khangin, a numei thilte kin tu hi. A min sia a mite sungah haamsiatna suak tu hi. 28Ahizong tua nu a khial buale bangma tat ngawl tu a, nau nei thei tu hi.
29-30Hi thu sia a zi in hong palngul hi ci in thuum a, a muang la pasal khat ii thute ah zui tu thukham ahi hi. Tua numei sia biaknatau mai ah kidingsak tu a, thiampipa in hi a zeksa teng seam tu hi. 31Hi khialna pan a pasal suakta tu a, ahizong tua numei a khial le a piang babang a thuak kul tu hi.
Currently Selected:
Mi Simna 5: SCB2
Highlight
Share
Compare
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
